ތިމާވެއްޓާ އެއްކީލި ތަރައްޤީއެއް ގެނައުމަށް މަޖިލީހުގެ ރައީސްގެ ހުށައެޅުއްވުންތަކެއް އައިޕީޔޫއަށް!
ޤައުމުތަކުން ހިންގާ ތަރައްޤީގެ މަޝްރޫއުތަކާ ގުޅިގެން ގިނަ އަދަދެއްގެ ކާރބަން ބޭރުވޭ
ވަރޗުއަލްކޮށް ކުރިއަށް ގެންދިޔަ ޤާނޫނޫ ހަދާ މަޖިލީހުގެ ރައީސުންގެ 5 ވަނަ ބައްދަލުވުން
އިންޓަރނޭޝަނަލް ޕާލަމަންޓްރީ ޔޫނިއަން (އައިޕީޔޫ) ނުވަތަ ދުނިޔޭގެ ޤާނޫނު ހަދާ މަޖިލީސްތަކުގެ ރައީސުންގެ ބައްދަލުވުމުގައި ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު މުހިއްމު ހުށައެޅުއްވުންތަކެއް ހުށައަޅުއްވައިފިއެވެ.
ވަރޗުއަލްކޮށް ކުރިއަށް ގެންދިޔަ ޤާނޫނޫ ހަދާ މަޖިލީހުގެ ރައީސުންގެ 5 ވަނަ ބައްދަލުވުމުގައި ބުދަ ދުވަހު ވާހަކަ ދައްކަވަމުން ރައީސް ނަޝީދު ވަނީ މޫސުމަށް އަންނަ ބަދަލުތަކާއި ގުޅިގެން މަޖިލިސްތަކުން ކަންކުރެވިދާނެ ގޮތްތަކާ ގުޅޭގޮތުން ވާހަކަ ދައްކަވާފައެވެ. އެގޮތުން ރައީސް ނަޝީދު ވަނީ އެކަމާގުޅޭ މުހިއްމު ހުށައެޅުންތަކެއް ވެސް ހުށައަޅުއްވާފައެވެ.
ރައީސް ނަޝީދު ވިދާޅުވީ، ޤައުމުތަކުން ހިންގާ ތަރައްޤީގެ މަޝްރޫއުތަކާ ގުޅިގެން ގިނަ އަދަދެއްގެ ކާރބަން ޖައްވުގެ ތެރެއަށް ބޭރުވެގެންދާ ކަމަށެވެ. އެގޮތުން ފޮސިލް ފިއުލް އަންދާވަރު ގިނަވާ ވަރަކަށް، ޖައްވަށް ކާރބަން ބޭރުވާ ވަރުވެސް އިތުރުވާނެކަން ފާހަގަ ކުރައްވައި ރައީސް ނަޝީދު ވިދާޅުވީ، އެފަދައިން ކަން ކުރާ ޤައުމުތައް މުއްސަނދި ވަމުންވެސް ދާ ކަމަށެވެ. އަދި ޤައުމުތަކުން އެކަން ކުރާ މައިގަނޑު ސަބަބަކީ ވެސް އެއީ ކަމަށް ރައީސް ނަޝީދު ވިދާޅުވިއެވެ. އެހެން ނަމަވެސް މިއީ "ސުއިސައިޑް" އެއްގެ ގޮތުގައި ރައީސް ނަޝީދު ސިފަ ކުރެއްވިއެވެ.
ރައީސް ނަޝީދު ވަނީ ހުޅަނގުގެ ބައެއް ޤައުމުތަކުން ކާރބަން ބޭރު ކުރާ މިންވަރަށް ވެސް އަލިއަޅުވާލައްވާފައެވެ. މިސާލެއްގެ ގޮތުން އޮސްޓްރޭލިއާގައި އަހަރެއްގެ މައްޗަށް 10،000 ކިލޯވޯޓް/ގަޑިއިރަކަށް ބޭރު ކުރާކަން ފާހަގަ ކުރައްވައި ރައީސް ނަޝީދު ވިދާޅުވީ، އަވައްޓެރި ބަންގްލަދޭޝްއިން އެ އަދަދު އުޅެނީ 300 ގައި ކަމަށެވެ. އަދި އިތިއޯޕިއާގައި އެ އަދަދު އުޅެނީ 69 ގައި ކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ، މި ކަމުގައި ޤައުމުތަކުން ގެންގުޅޭ ވިސްނުން މިއަދު ބަދަލު ކުރަން ޖެހިފައިވާ ކަމަށެވެ. އެގޮތުން ކުރިއަރަމުން އަންނަ ޤައުމުތަކުން ކުރިއަށް އޮތް 10 ވަރަކަށް އަހަރު ތެރޭގައި ކަރަންޓް ބޭނުން ކުރާ މިންވަރު އިތުރުވާނެކަން ފާހަގަ ކުރައްވައި ރައީސް ނަޝީދު ވިދާޅުވީ، އެކަން ކުރެވޭނެ ހަމައެކަނި މަގަކީ ފޮސިލް ފިއުލް އެންދުން ނޫން ކަމަށެވެ. އެގޮތުން ތަރައްޤީގެ ޕްލޭންތައް ކުރާއިރު "ޒީރޯ ކާރބަން ޕްލޭން"އެއްގެ ދަށުން، 2050 ވަނަ އަހަރު އަންނަންވާއިރަށް ކާރބަން ބޭރު ކުރާ މިންވަރު 0ށް ހެދުމަށް އަމާޒު ހިފަން ޖެހޭ ކަމަށް ރައީސް ނަޝީދު ވިދާޅުވިއެވެ. އަދި އެކަމަށްޓަކައި އިޤްތިސާދީ އަދި ހަކަތައާ ގުޅޭ ތަޖުރިބާކާރުންގެ ފަންނީ އެހީތެރިކަން ބޭނުންވާ ކަމަށް ވެސް ރައީސް ނަޝީދު ވިދާޅުވިއެވެ.
އަދި އެފަދަ ޕްލޭންތައް ހިންގުމަށް މަޖިލިސްތަކުން އެ ޤައުމެއްގެ ސަރުކާރަށް ބާރުއެޅިދާނެ ކަމަށް ރައީސް ނަޝީދު ވިދާޅުވިއެވެ. ރައީސް ނަޝީދު ވިދާޅުވީ، މިއަދު ދުނިޔޭގެ ހުރިހާ ކަންކޮޅުތަކަށް ބަލާލި ނަމަވެސް، އިޔާދަކުރަނިވި ހަކަތައިގެ އަގު ބޮޑުތަނުން ހެޔޮ ކަމަށެވެ.
ދުނިޔޭގެ ގައުމުތަކުގެ ޤާނޫނު ހަދާ މަޖިލީސްތަކުގެ ރައީސުން ބައިވެރިވެ ވަޑައިގެންނެވި މި ބައްދަލުވުމަކީ ކޮންމެ ފަސް އަހަރަކުން އެއް އަހަރު ބާއްވާ ބައްދަލުވުމެކެވެ. މިފަހަރުގެ ބައްދަލުވުން އިންތިޒާމު ކޮށްފައިވަނީ އިންޓަރ ޕާލަމަންޓްރީ ޔޫނިއަންއާއި އޮސްޓްރިއާގެ ޤާނޫނު ހަދާ މަޖިލީހާ ގުޅިގެންނެވެ. މިފަހަރުގެ ތީމަކީ ޕާލަމަންޓްރީ ލީޑަރޝިޕް ފޮރ މޯރ އިފެކްޓިވް މަލްޓިރިއަލިޒަމް ދެޓް ޑެލިވަރސް ޕީސް އެންޑް ސަސްޓެއިނަބްލް ޑިވެލޮޕްމަންޓް ފޯރ ދަ ޕީޕަލް އެންޑް ޕްލެނެޓް އެވެ.
