ރައީސް ނަޝީދުގެ "ދެ ރަދުން" ފޮތް ބުކް ޝޮޕްތަކަށް ނެރެފި

ދިވެހި ތާރީޚުގެ ގިނަ ވާހަކަތަކާއިއެކު ލިޔުންތެރިޔާ އަދި ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ލިޔުއްވި "ދެރަދުން" ފޮތް ބުކް ޝޮޕްތަކުން ވިއްކަން ފަށައިފިއެވެ.

ރައީސް ނަޝީދު ލިޔުއްވާފައިވާ "ދެރަދުން" މި ފޮތަކީ 1800ން، 1900ށް ދިވެހި ޤައުމުގެ ހިންގުމުގެ ކަންކަމާއި، އޭރު ދިވެހިންގެ ދިރިއުޅުމުގެ ހާލަތަށް ބައްލަވައި ލިޔުއްވާފައިވާ ފޮތެކެވެ.

ބުކް ޝޮޕްތަކަށް މިފޮތް ނެރެދެއްވުމަށް ނޮވެލްޓީ ބުކް ޝޮޕްގައި ބުދަ ދުވަހު ބޭއްވި ރަސްމިއްޔާތުގައި ވާހަކަ ދައްކަވަމުން ރައީސް ނަޝީދު ވިދާޅުވީ އެމަނިކުފާނު، މިފޮތް ލިޔުއްވަން ފެއްޓެވީ، 2015 ވަނަ އަހަރު އެމަނިކުފާނު ޖަލަށްލުމާއެކު، ޖަލުގައި ހޭދަ ކުރެއްވި ދުވަސްވަރު ކަމަށެވެެ. އަދި އޭގެފަހުން އިނގިރޭސި ވިލާތަށް ވަޑައިގެން ހުންނެވި ދުވަސްވަރާއި އަވައްޓެރި ސްރީލަންކާގައި އުޅުއްވި ދުވަސްވަރު މި ފޮތް ލިޔުއްވުމުގެ މަސައްކަތް ކުރެއްވި ކަމަށް ވެސް ރައީސް ނަޝީދު ވިދާޅުވިއެވެ.

"ދެ ރަދުން" 235 ސަފުހާގެ މިފޮތުގައި ރާއްޖެފަދަ ކުދި ޤައުމުތަކާއި، އަދި ދުޝްމިނުންގެ ކިބައިން ޤައުމުގެ ޙިމާޔަތް ކުރުމަށް ރާއްޖެއިން ކޮށްފައިވާ މަސައްކަތް ހިމެނޭއިރު، ރާއްޖެ އަކީ އަވަށްޓެރި ކުދި ޤައުމުތަކާއި އެއްހަމައެއްގައި، ޤައުމު ޙިމާޔަތް ކުރުމަށް މަސައްކަތް ކުރި ޤައުމެއް ކަމަށް ވެސް ރައީސް ނަޝީދު ވިދާޅުވިއެވެ.

ރައީސް ނަޝީދުގެ މިފޮތުގައި، އެދުވަސްވަރު ވިޔަފާރީގެ ކަންކަން ކުރިއަށްގެންދިޔަ ގޮތާއި، ރާއްޖޭގެ އެކި ސަރަޙައްދުތަކުގައި ކެއިންބުއިމުގެ ކަންކަން ހުރިގޮތާއި ގުޅޭ ތަފްސީލް މަޢުލޫމާތުތައް ހިމަނާފައެވެ.

އެގޮތުން، 1856 ވަނަ އަހަރުން ފެށިގެން 1881 އަހަރާ ދެމެދު، ރާއްޖެއިން ސިލޯނަށް ކަހަނބުފަތް ބޭރުކޮށްފައިވާ މިންވަރާއި ލިބުނު ފައިސާގެ ތަފްސީލުތައް ފަދަ މިފަދަ މުހިއްމު ބައެއް ތަފްސީލުތައް ވެސް ހިމެނެއެވެ. އެގޮތުން 1860 ވަނަ އަހަރުން 1900 ވަނަ އަހަރާ ދެމެދު އެވްރެޖް ގޮތެއްގައި ސިލޯނަށް ބޭރުކުރި ތަކެތީގެ ބާވަތާއި ބޭރުކުރި މިންވަރު ވެސް ހިމެނެއެވެ. އެގޮތުން އެންމެ ގިނަ އަދަދަކަށް ސިލޯނަށް ބޭރުކޮށްފައިވަނީ، ހިކިމަހާއި ލޮނުމަހެވެ. އަދި ކާއްޓާއި ރޯނާއި ބޮއްޔާއި ގޮވާން އަދި ރިހާކުރު ފަދަ ތަކެތި ހިމެނެއެވެ.

މިފޮތުގައި، ރާއްޖޭގެ ރަސްރަސްކަލުންގެ ބައެއް މައުލޫމާތުތައް ވެސް ހިމަނާފައިވެއެވެ.

މިފޮތުގައި ރާއްޖޭގެ ދަތުރުފަތުރާއި ގުޅޭ މަޢުލޫމާތާއި، ރާއްޖެއާއި ބަންގާޅާއި ދެމެދު އޭރު ދަތުރުކޮށް އުޅުނުގޮތާއިގުޅޭ މަޢުލޫމާތު ވެސް ހިމަނާފައިވެއެވެ.

ބުކް ޝޮޕްތަކަށް މިފޮތް ނެރެދެއްވުމާއެކު، ރައީސް ނަޝީދު ވަނީ، އެވަގުތު ނޮވެލްޓީ ބުކް ޝޮޕުން އެފޮތް ގަތް ފަރާތްތަކުގެ ފޮތްތަކުގައި އެމަނިކުފާނުގެ ސޮއި ކުރައްވާފައެވެ. އަދި ރައީސް ނަޝީދުގެ ސޮއި ކުރެއްވުމުގެ މި ހަރަކާތް މި ފޮތް ވިއްކާ އެހެން ބުކް ޝޮޕްތަކުގައި ހިންގުމަށް ވެސް ވަނީ ހަމަޖެހިފައެވެ.

ނޮވެލްޓީ ބުކް ޝޮޕްގައި ރައީސް ނަޝީދު ހޭދަކުރެއްވި އެކުޑަ ވަގުތު ކޮޅުގައިވެސް، 60 އަށްވުރެ ގިނަ ފޮތް ވިކިފައިވެއެވެ.

"ދެ ރަދުން" ފޮތުގެ އަގަކީ 200ރ އެވެ. ހާޑް ކަވަރ ގޮތެއްގެ ފޮތް ވިއްކާ އަގަކީ 300ރ އެވެ.