ފާއިތުވި 24 ގަޑީއިރު ރާއްޖެއަށް އައިސްފައިވަނީ ހަތަރު ފްލައިޓް
17.8 ޓަނުގެ މުދާ ރާއްޖެ އެތެރެކޮށްފައިވާއިރު، 20 ޓަނުގެ މުދާ ރާއްޖެއިން ބޭރުކޮށްފައިވޭ
ރާއްޖޭގެ ބޯޑަރު ހުޅުވާލުން - އެވްރެޖްކޮށް ދުވާލެއްގެ މައްޗަށް އިންޓަރނޭޝަނަލް ތިނެއް ނުވަތަ ހަތަރު ފްލައިޓް ރާއްޖެ އާދޭ
ޖުލައި މަހުގެ 15 ގައި ރާއްޖޭގެ ބޯޑަރު ހުޅުވާލުމުން، އެވްރެޖްކޮށް ދުވާލެއްގެ މައްޗަށް އިންޓަރނޭޝަނަލް ތިނެއް ނުވަތަ ހަތަރު ފްލައިޓް ރާއްޖެ އަންނައިރު، ޑޮމެސްޓިކް ފަހެއް ނުވަތަ ހަ ފްލައިޓް އަދި ޕްރައިވެޓް ދޭއް ނުވަތަ ތިން ޖެޓު ރާއްޖެއަށް އާދެއެވެ.
އިންޓަރނޭޝަނަލް ފްލައިޓްތަކަށް ބަލާލާއިރު، ފާއިތުވި 24 ގަޑީއިރު ހަތަރު ފްލައިޓެއް އޮޕަރޭޓްކޮށްފައިވެއެވެ. އެއީ މޯލްޑިވިއަނުން ބަގްލަދޭޝްގެ ވެރިރަށް ޑާކާ އަށް 200 މީހުންނާއެކު ދަތުރުކުރި ފްލައިޓާއި، މެލޭޝިއާ، ގަތަރު، ސްޕައިސް ޖެޓް ހިމަނައިގެންނެއެވެ.
އޮގަސްޓު 17ވަނަ ދުވަހު ރާއްޖެއަށް އައިސްފައިވަނީ 475 ފަތުރުވެރިންނެވެ. އަދި ރާއްޖެއިން ގޮސްފައިވަނީ 533 މީހުންނެވެ. އެއީ ޑާކާއަށް ދިޔަ ބަންގްލަދޭޝްގެ 200 ރައްޔިތުންނާއި އެކީގައެވެ.
ޑޮމެސްޓިކް ފްލައިޓްތަކަށް ބަލާލާއިރު،6 ފްލައިޓެއް އޮޕަރޭޓްކޮށްފައިވެއެވެ. އެއީ ހދ.ހަނިމާދޫ، ގއ.ކޫއްޑޫ، ސ.ގަން، ފުވައްމުލަށް، ބ.ދަރަވަންދޫ، ނ.މަނަފަރެވެ.
ޑޮމެސްޓިކް އެއަރޕޯޓްތަކުން، ހޯމަ ދުވަހު މާލެ އައިސްފައިވަނީ، 117 މީހުންނެވެ. މާލެއިން ޑޮމެސްޓިކް އެއަރޕޯތްތަކަށް ގޮސްފައިވަނީ 90 މީހުންނެވެ.
ޕްރައިވެޓް ޖެޓްތަކަށް ބަލާއިރު،އެއް ޖެޓު މާލެއިން ޔުނައިޓެޓް އަރަބި އެމިރޭޓްސްގެ ޝާރުޖާއަށް ގޮސްފައިވެއެވެ.
ކާގޯއަށް ބަލާއިރު، ކާގޯ އެއް ފްލައިޓު، ޓާކިޝް އެއަލައިނުން އިސްތަންބޫލާ ދޭތެރޭ ދަތުރުކޮށްފައިވެއެވެ. ޝެޑިއުލް ފްލައިޓްތަކުގެ ކާގޯއާއި އެކު ޖުމްލަ 17.8 ޓަނުގެ މުދާ ރާއްޖެ އެތެރެކޮށްފައިވާއިރު، 20 ޓަނުގެ މުދާ ރާއްޖެއިން ބޭރުކޮށްފައިވެއެވެ.
ޖުލައި މަހުގެ 15 ގައި ރާއްޖޭގެ ބޯޑަރު ހުޅުވާލުމުން، އެންމެ ގިނައިން ފަތުރުވެރިން އެތެރެވި ގައުމަކީ ޔުނައިޓެޑް އަރަބް އެމިރޭޓްސް (ޔޫއޭއީ) އެވެ.
ޔޫއޭއީގެ 504 ފަތުރުވެރިން ރާއްޖެ އައިސްފައިވާއިރު، ދެވަނައަށް އެންމެ ގިނަ ފަތުރުވެރިން ރާއްޖެ އައިސްފައިވަނީ އިނގިރޭސީވިލާތުންނެވެ. އެއީ 421 ފަތުރުވެރިންނެވެ. ތިންވަނައަށް އެންމެ ގިނަ ފަތުރުވެރިން އައިސްފައިވާ ޤައުމަކަށް އެމެރިކާ ހިމެނިފައިވާއިރު، އެއީ 336 ފަތުރުވެރިންނެވެ. 250 ފަތުރުވެރިން ސްޕެއިންއިން ރާއްޖެ އައިސްފައިވާއިރު، 193 ފަތުރުވެރިއަކު ރަޝިއާއިން އައިސްފައިވެއެވެ.
ރާއްޖޭގެ ބޯޑަރު ޖުލައި މަހުގެ 15ގައި ހުޅުވާލާފައިވާއިރު، އެ ދުވަހުން ފެށިގެން ޖުލައި 31ށް ރާއްޖެ އައިސްފައިވަނީ 1700 ފަތުރުވެރިންނެވެ. އޮގަސްޓު 1ން 15ށް ދެ ގުނަ އިތުރުވެފައިވާއިރު، ރާއްޖެ އައި ފަތުރުވެރިންގެ އަދަދަކީ 3400 އެވެ.
ޓަރމިނަލް އޮޕަރޭޝަންސްގެ ޖެނެރަލް މެނޭޖަރ އިބްރާހިމް ހުސެއިން ވިދާޅުވި ގޮތުގައި ޗައިނާ، ރަޝިއާ، އިންޑިއާގެ ބޯޑަރުތައް ހުޅުވާލުމުން މި އަދަދު އަދި މިއަށްވުރެވެސް އިތުރުވެގެން ދާނެއެވެ.
ކޮވިޑް-19 ފެތުރުން ކޮންޓްރޯލްކުރުމަށް ރާއްޖޭގެ ބޯޑަރުތައް ބަންދުކުރީ މާރޗް މަހުގެ 27 ވަނަ ދުވަހުއެވެ.
