އެންޓި ކޮރަޕްޝަން ކޮމިޝަން (އޭސީސީ) ގެ މެންބަރުން މަގާމުގެ ނުފޫޒު ބޭނުންކޮށް، ވަކި ގޮތަކަށް މައްސަލައެއް ނިންމި ކަމަށް ބުނާ މައްސަލައެއް އާންމު ފަރާތަކުން ފުލުހުންނަށް ހުށަހަޅައިފިއެވެ.

އެ ފަރާތުން ހުށަހެޅި މި މައްސަލައިގައި ވަނީ ކުރީގެ ޗީފް އޮފް ޑިފެންސް ފޯސް، އަޙްމަދު ޝިޔާމް، މޯލްޑިވްސް ނޭޝަނަލް ޑިފެންސް ފޯސްގެ ބޭނުމަށް ވިލިމާލޭގައި ގާއިމުކުރި ވީއައިޕީ ފެސިލިޓީ، މަގާމުގެ ނުފޫޒު ބޭނުންކޮށް، އަމިއްލަ މަންފާއަށް ބޭނުންކުރައްވާފައިވާ ކަމަށެވެ. އެގޮތުން ޝިޔާމްގެ ބައްޕަ ބަލިވެގެން 1 އަހަރާއި 6 މަހަށްވުރެ ދިގު މުއްދަތެއް ވަންދެން ޕީއައިޕީ ބޭނުންކޮށް، ޝިޔާމްގެ ބައްޕައަށް ބޭނުންވާ އެކިއެކި ޚިދުމަތްތައް ދެމުން ގެންދިޔައީ ސިފައިން ކަމަށް ސިޓީގައި ވަނީ ބުނެފައެވެ.

އަދި އެއީ ޗީފް އޮފް ޑިފެންސް ފޯސްގެ މަގާމުގައި ނެތްނަމަ އަޙްމަދު ޝިޔާމަށް ލިބޭނޭ ފުރުސަތެއް ނޫން ކަމަށް ސިޓީގައި ފާހަގަކޮށްފައިވެއެވެ. ސިޓީގައި ވަނީ ވީއައިޕީ ފެސިލިޓީ ބޭނުންކުރަމުން ދިޔައީ ބޭނުންކުރާނޭ ގޮތުގެ އުސޫލެއްވެސް އެކަށައެޅިފައިނެތީސް ކަމަށާއި، އެކަންތައް ޝިޔާމް ހިންގަވާފައިވާކަން ތަހުގީގަށް ސާބިތުވެފައިވާއިރުވެސް، އެ އަމަލުގައި ކޮރަޕްޝަން ނުހިމެނޭ ކަމަށް އޭސީސީން ނިންމަވާފައިވުމަކީ މަގާމުގެ ނުފޫޒު ބޭނުންކޮށްގެން އަޙްމަދު ޝިޔާމަށް ނާޖާއިޒު މަންފާއެއް ހޯދައިދިނުމުގެ އަމަލެއް ކަމަށް ބުނެފައެވެ.

އަދި އެއީ ޤާނޫނުލްޢުޤޫބާތުގެ 513 ވަނަ މާއްދާގެ (ށ) ގައި ބަޔާންކުރާ ޖިނާއީ ކުށުގެ އަމަލެއް ކަމަށާއި، އޭސީސީގެ މެންބަރުންގެ ގޮތުގައި ތިއްބަވައިގެން އެ ކޮމިޝަންގެ މިހާރުގެ މެންބަރުން ހިންގެވި ޖިނާއީ ކުށުގެ މި އަމަލު ތަހުގީގު ކޮށްދެއްވައި، އަޅުއްވަންޖެހޭ ފިޔަވަޅުތައް އަޅުއްވައި ދެއްވުން އެދޭ ކަމަށް ސިޓީގައި ބުނެފައިވެއެވެ.

މިކަމާއި ގުޅިގެން ރާއްޖެޓީވީއަށް މައުލޫމާތު ދެމުން ފުލުހުން ބުނީ އަމިއްލަ ފަރާތަކުން ހުށަހަޅާފައިވާ މައްސަލައަކަށް ވުމުން، އެކަމާއި ގުޅިގެން ފުލުހުން ކުރަމުން އަންނަ މަސައްކަތް އެ މީހާއަށް ހިއްސާކޮށްފައިވާނެ ކަމަށާއި އެ ސިޓީ އަންގާރަ ދުވަހު ފުލުހުންނަށް އީމެއިލް މެދުވެރިކޮށް ލިބިފައިވާ ކަމަށެވެ.