ރޮޒައިނާ އެމްޑީޕީން ވަކި ކުރަން ރައީސް ނަޝީދު ހުށަހަޅުއްވައިފި
16 އޯގަސްޓު 2020 | އާދީއްތަ 20:58އެކަން ހުށަހަޅުއްވާފައި ވަނީ އެމްޑީޕީގެ ގައުމީ މަޖިލީހުގެ ރަސްމީ ވަޓްސްއަޕް ގުރޫޕުގައި
އެމްޑީޕީގެ ރައީސް މުހައްމަދު ނަޝީދާއި އައްޑޫ މީދޫ ދާއިރާގެ މެންބަރު ރޮޒައިނާ އާދަމް
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ މެންބަރު ކަމުން އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވަކިކުރަން އެ ޕާޓީގެ ރައީސް މުހައްމަދު ނަޝީދު ހުށަހަޅުއްވަން ނިންމަވައިފިއެވެ.
ރައީސް ނަޝީދު އެކަން ހުށަހަޅުއްވާފައި ވަނީ އެމްޑީޕީގެ ގައުމީ މަޖިލީހުގެ ރަސްމީ ވަޓްސްއަޕް ގުރޫޕުގައެވެ.
އެކަން ޕާޓީގެ ބައެއް މަޖިލިސް މެންބަރުން ރާއްޖެ ޓީވީއަށް ވަނީ ކަށަވަރު ކޮށްދެއްވާފައެވެ.
ރޮޒައިނާ ޕާޓީން ވަކިކުރަން ރައީސް ނަޝީދު ހުށަހަޅުއްވަން ނިންމަވާފައި މިވަނީ ދެބޭފުޅުންގެ ދެމެދުގައި ޚިޔާލުތަފާތުވުންތަކެއް އުފެދިފައިވާ ދަނޑިވަޅެއްގައެވެ.
އިކޮނިމިކް މިނިސްޓަރ ފައްޔަޒު އިސްމާއިލްގެ އިތުބާނެތްކަމުގެ މައްސަލަ ހުށަހެޅުމަށް ރައީސް ނަޝީދު އިސްނަގަންވައިގެން ކުރައްވަމުން ގެންދަވާ މަސައްކަތުގައި ރޮޒައިނާ ގެންދަވަނީ ރައީސް ނަޝީދާއި ދެކޮޅަށް ވާހަކަ ދައްކަވަމުންނެވެ. އަދި ފައްޔާޒުއަށް އިތުބާރުއޮތް ކަމަށް ވިދާޅުވެ، އޭނާގެ ދިފާއުގައި ރޮޒައިނާ ގެންދަވަނީ ވާހަކަ ދައްކަވަމުންނެވެ.
