ދަރިފުޅާ ގުޅުވާ ފައްޔާޒުގެ ފަރާތުން އިންޒާރުދިން ވާހަކަ އަކީ ދޮގެއް: އަނދުން ހުސައިން
16 އޯގަސްޓު 2020 | އާދީއްތަ 02:35ފައްޔާޒަކީ ވަރަށް ގާތް ބޭފުޅެއް ކަމަށް ވިދާޅުވި
ހެންވޭރު ދެކުނު ދާއިރާގެ މެންބަރު ހުސައިން ޝަމީމް (އަނދުން ހުސައިން)
ރައްޔިތުންގެ މަޖިލީހުގެ ހެންވޭރު ދެކުނު ދާއިރާގެ މެންބަރު ހުސައިން ޝަމީމް (އަނދުން ހުސައިން)ގެ ދަރިފުޅާ ގުޅުވައި އިކޮނޮމިކް މިނިސްޓަރ ފައްޔާޒު އިސްމާއިލް ބިރު ދެއްކެވި ކަމަށް ބުނާ ވާހަކަތައް އަނދުން ހުސައިން ދޮގުކުރައްވައިފިއެވެ.
ހުސައިން އަކީ، ފައްޔާޒުގެ އިތުބާރު ނެތް ކަމުގެ މައްސަލަ މަޖިލީހަށް ހުށަހެޅުމުގައި އިސްކޮށް އުޅުއްވާ އެއްބޭފުޅުކެވެ. އޭނާގެ މައްސަލައާއި ގުޅިގެން އަނދުން ހުސައިންގެ ދަރިފުޅު މުހައްމަދު ފަޒީލް ހުސައިން، ވަޒީފާއިން ވަކި ކުރައްވާނެ ކަމަށް އިކޮނޮމިކް މިނިސްޓަރ ފައްޔާޒު އިސްމާއިލްގެ ފަރާތުން އިންޒާރު ދެއްވައިފާއި ވާކަމަށް ބައެއް މީޑިއާ ތަކުން ވަނީ ރިޕޯޓް ކޮށްފައެވެ.
އެކަމާ ގުޅިގެން ރާއްޖެ އެމްވީއަށް މައުލޫމާތު ދެއްވަމުން ހުސައިން ވިދާޅުވީ އޭނާ އާއި މިނިސްޓަރ ފައްޔާޒަކީ ވަރަށް ގާތް ދެ ބޭފުޅުން ކަމަށާއި، އެފަދަ އިންޒާރެއް ފައްޔާޒުގެ ފަރާތުން ދެއްވާފައި ނުވާ ކަމަށެވެ. އަދި އޭނާގެ ދަރިފުޅާ ގުޅުވައި ބައެއް މީޑިއާ ތަކުގައި ފަތުރަމުން ދަނީ ދޮގު ވާހަކަތަކެއް ކަމަށް ހުސައިން ވިދާޅުވިއެވެ.
ހުސައިންގެ ދަރިފުޅު ފަޒީލްއަށް ޖަރުމަނުގައި ހުންނަ ދިވެހި އެމްބަސީން ވަޒީފާ ހަމަޖެހިފައިވަނީ ވަޒީފާ އިއުލާން ކުރުމުން އެއަށް އެޕްލައިކޮށްގެން އޮންނަ އުސޫލްގެ ދަށުން ކަމަށް ހުސައިން ވިދާޅުވިއެވެ..
މި ސަރުކާރުގެ ނަތީޖާ ނެރޭ ވަޒީރުންގެ ތެރޭ ހިމެނޭ އެއް ވަޒީރެއް ކަމުގައިވާ ފައްޔާޒުގެ އިތުބާރު ނެތް ކަމުގެ މައްސަލަ މަޖިޅިހަށް ހުށަހަޅަނީ ކޮން ސަބަބަކާ ހުރެ ކަމެއް އަދި ނޭނގެއެވެ. ރާއްޖެ އެމްވީއަށް އެނގިފައިވާ ގޮތުގައި މިހާތަނަށް 22 އަކަށް މެމްމަބަރުން ވަނީ އެ މައްސަލައިގައި ސޮއިކޮށްފައެވެ. އަދި ބައެއް މެމްބަރުން ދަނީ ފައްޔާޒުގެ އިތުބާރު ނެތް ކަމުގެ މައްސަލަ ހުށަހަޅަން ޖެހޭ ސަބަބެއް ނެތް ކަމަށް އެމަނިކުފާނުގެ ދިފާއުގައި ވާހަކަ ދައްކަވަމުންނެވެ.
މިއީ މި ސަރުކާރުގެ ވަޒީރެއްގެ އިތުބާރު ނެތް ކަމުގެ މައްސަލައެއް ހުށަހަޅާ ފުރަތަމަ ފަހަރެވެ. ވަޒީރެއް އިތުބާރު ނެތް ކަމުގެ މައްސަލަ ހުށަހަޅަން ބޭނުން ވަނީ 10 މެމްބަރުންގެ ސޮޔެވެ. އަދި އެ މައްސަލަ މަޖިލީހުން ފާސް ކުރަން ބޭނުން ވަނީ 43 މެމްބަރުންގެ ވޯޓެވެ.
