ވަޅިހަރައި މަރާލާނެ ކަމަށް ބުނެ، ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔަޒް ފަހުމީއަށް މަރުގެ އިންޒާރުދިންތާ 15 ދުވަސް ފާއިތުވިވެފައިވާއިރު، މިހާތަނަށް އެއްވެސް މީހަކު ހައްޔަރު ނުކުރާ ކަމަށް ފުލުހުން ބުނެފި އެވެ.

އާދިއްތަ ދުވަހު "ރާއްޖެއެމްވީ"އަށް މައުލޫމާތު ދެއްވަމުން ފުލުހުންގެ މީޑިއާ އޮފިޝަލް ވިދާޅުވީ މެމްބަރު އިމްތިޔާޒު ފަހުމީއަށް މަރުގެ އިންޒާރު ދިން މައްސަލާގައި މިހާތަނަށް އެއްވެސް މީހަކު ހައްޔަރު ނުކުރާ ކަމަށާއި ނަމަވެސް އެމައްސަލައިގެ ތަހުގީގު ކުރަމުންދާ ކަމަށެވެ.

އިމްތިޔަޒް ފަހުމީއަށް ނުދަންނަ ނަމްބަރަކުން ފޮނުވާފައިވާ މެސެޖުގައި ބުނެފައިވަނީ "ކަލޭ ވަޅި ހަރައި މަރާލާނެ" ކަމަށެވެ. އޭގެ އިތުރުން އެއްވެސް އެއްޗެއް ބުނެފަ އެއް ނުވެއެވެ.

ރައްޔިތުންގެ މަޖިލީހުގެ މެމްބަރުންނަށް ފުރިހަމަ ރައްކާތެރިކަމާއި، ހިމާޔަތް ފޯރުކޮށްދޭންޖެހޭނެކަމަށް ޤާނޫނުތަކުގައި ފުލުހުންނާއި، ސިފައިންގެ މައްޗަށް ލާޒިމްކޮށްފައިވާއިރު، މެމްބަރު އިމްތިޔާޒަށް މަރުގެ އިންޒާރުދިންއިރު، އޭނާއަށް ރައްކާތެރިކަން ފޯރުކޮށްދެމުންދާކަމެއް ކަށަވަރެއް ނުވެއެވެ. އެނގިފައިވާ ގޮތުގައި ރައްޔިތުންގެ މަޖިލީހުގެ މެމްބަރުންގެ ސަލާމަތީކަންކަން ވަކިވަކިން އެމްއެންޑީއެފުން މިހާރު ބަލަހައްޓަމުންނެއް ނުގެންދެއެވެ.

ރައްޔިތުންގެ މަޖިލީހުގެ އިދިކޮޅު މެމްބަރުންނަށް މީގެ ކުރިންވެސް ވަނީ މަރުގެ ގިނަ އިންޒާރުތަކެއްދީފަ އެވެ. ނަމަވެސް އެއިން އެއްވެސް މައްސަލައެއް ތަހުޤީޤްކޮށްފައިވާކަން ފުލުހުން ހާމަކޮށްފައެއް ނުވެއެވެ. އެ ގޮތުން އިމްތިޔާޒް ގަޔަށް ކަޅު ތެޔޮ ޖެހި މައްސަލައެއް ވެސް މީގެ ކުރިން ވަނީ ފުލުހުންނަށް ހުށަހަޅާފައެވެ.

އިމްތިޔަޒް ފަހުމީއަށް މަރުގެ އިންޒާރުދިންއިރު، އޭނާއަކީ ސަރުކާރަށް ވަރަށް ބޮޑަށް ފާޑުވިދާޅުވަމުންގެންދަވާ ބޭފުޅެކެވެ.އިމްތިޔާޒަށް މަރުގެ އިންޒާރުދިނުމާ ގުޅިގެން ރައްޔިތުންގެ މަޖިލީހުގެ ބައެއް މެމްބަރުން ވަނީ ކަންބޮޑުވުން ފާޅުކޮށްފަ އެވެ. އެގޮތުން ރައްޔިތުންގެ މަޖިލީހުގެ ކުރީގެ ރައީސް އަބްދުﷲ ޝާހިދު ވިދާޅުވީ، އިމްތިޔާޒް ފަހުމީއަށް ވަގުތުން ވަގުތަށް ސަލާމަތިކަންކަން ހަމަޖައްސައިދީ، އިންޒާރުގެ މައްސަލަ ތަހުޤީޤްކުރުމަށް ދައުލަތުގެ އިދާރާތަކަށް ގޮވާލައްވާ ކަމަށެވެ. އެ ގޮވާލެއްވުން ވަނީ ކުރީގެ ޕޮލިސް ކޮމިޝަނަރ އަބްދުﷲ ރިޔާޒްވެސް ތަކުރާރުކުރައްވާފަ އެވެ.