ރާއްޖެޓީވީއަށް އިންޒާރުދިން މައްސަލާގައި މީހަކު ހައްޔަރެއް ނުކުރޭ!
އެމައްސަލާގައި މީހަކު ހައްޔަރު ނުކުރިނަމަވެސް ތަހުގީގު ކުރަމުންދާ ކަމަށް ފުލުހުން ބުނޭ
ރާއްޖޭޓީވީގެ ސީއޯއޯ ހުސައިން ފިޔާޒު މޫސާ އާއި ނޫސްވެރިޔާ އަޒްމޫން އަހުމަދު ފުލުހުންގެ އިދާރާއަށް ވަންނަނީ
ފ. އަތޮޅު ވިއްކާލުމާ ދެކޮޅަށް އެ އަތޮޅުގެ ރައްޔިތުން ބޭއްވި މުޒާހަރާ ކަވަރުކުރަން ރާއްޖެޓީވީގެ ޓީމް ދާން އުޅުމުން، ނޫސްވެރިންނަށް މަރުގެ އިންޒާރުދީ، ސްޓޭޝަނަށް ގެއްލުން ދޭނެ ކަމަށް ބުނި މައްސަލާގައި މިހާތަނަށް އެއްވެސް މީހަކު ހައްޔަރު ނުކުރާ ކަމަށް ފުލުހުން ބުނެފި އެވެ.
ފުލުހުންގެ މީޑިއާގެ މީޑިއާ އޮފިޝަލް އާދިއްތަ ދުވަހު ވިދާޅުވީ ރާއްޖެޓީވީ ނޫސްވެރިންނަށާއި ސްޓޭޝަނަށް އިންޒާރުދިން މައްސަލާގައި މިހާތަނަށް އެއްވެސް މީހަކު ހައްޔަރު ކޮށްފައިނުވާ ކަމަށެވެ. ނަމަވެސް އެމައްސަލަ ތަހުގީގު ކުރަމުންދާ ކަމަށް އޮފިޝަލް ވިދާޅުވި އެވެ.
ރާއްޖެޓީވީއަށް ފޯނުން ގުޅައި އިންޒާރުދިން ފަރާތްތަކުން ބުނެފައިވަނީ ފ.އަތޮޅުގެ މަޝްރޫޢުގެ މައުލޫމާތު ހޯދަން އެ އަތޮޅަށް "ރާއްޖޭޓީވީގެ ބަޔަކު އަރައިފިނަމަ ފުނޑާލާނަން" ކަމަށެވެ.
މި މާރޗު މަހުގެ ދެވަނަ ދުވަހު، އެތައް ފަހަރެއްގެ މަތިން ރާއްޖޭޓީވީއަށް ފޯނުންގުޅައި އިންޒާރު ދިން ފަރާތްތަކުން ބުނެފައިވަނީ "ތިތަނުގެ ބަޔަކު މިކޮޅަށް އަންނަން އުޅޭކަން އެނގޭ ކަމަށާއި، އަންނަ ގަޑިޔާ ހުރިހާ މައުލޫމާތެއް ވަނީ ލިބިފައި" ކަމަށެވެ. ވަރަށް ހަޑި ހުތުރުބަހުން މުޢާމަލާތް ކުރަމުން އެ ފަރާތުން ބުނެފައިވަނީ "އަތު ޖެހިއްޖެއްޔާ މަރާލާނަން" ކަމަށެވެ.
މަރުގެ އިންޒާރު ދިން ނަމަވެސް، ރާއްޖެޓީވީން ފ. އަތޮޅަށް ގޮސް މުޒާހަރާ ކަވަރުކޮށްފައިވެ އެވެ.
ރާއްޖެޓީވީން ބުނެފައިވަނީ ސްޓޭޝަނުގެ ނޫސްވެރިނަށް މަރުގެ އިންޒާރުދީ ބިރުދެއްކި ނަމަވެސް، ޚަބަރާއި މައުލޫމާތު ގެނެސްދިނުމުގައި އެ ސްޓޭޝަނުން ކުރަމުން އަންނަ މަސައްކަތުގައި ފަހަތަށް ނުޖެހޭނެ ކަމަށެވެ.
ރާއްޖެޓީވީއަށް އިންޒާރުދީފައިވާ އިރު ފ. އަތޮޅުގެ މަޝްރޫޢުގެ މައުލޫމާތު ހޯދަން އެ އަތޮޅު ނިލަންދޫއަށް ދިޔަ ދެ އެހެން ނޫސް އެޖެންސީއެއްގެ ދެ ނޫސްވެރިޔަކަށް ބަޔަކު އިންޒާރުދިނުމުގެ ސަބަބުން ވަނީ ފުލުހުންގެ ހިމާޔަތަށް އެދިފައެވެ.
