މާލީ ބަޔާން ހުށަނާލާ އޮތީ ހިމަނަން ޖެހޭ ބައެއް މައުލޫމާތު ނުލިބޭތީ ކަމަށާއި އެކަން އޮޑިޓަރ ޖެނެރަލްގެ ސަމާލު ކަމަށް ގެނެސްފައިވާނެ ކަމަށް ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވެއްޖެއެވެ.

އޮޑިޓަރ ޖެނެރަލްގެ އޮފީހުން އާންމުކޮށްފައިވާ އެސެޓް ޑިކެލަރޭޝަން ހުށަހެޅި ފަރާތްތަކުގެ މައުލޫމާތު ހިމެނޭ ރިޕޯޓުގައި ބުނެފައިވަނީ ބައެއް ވަޒީރުން އަހަރަކު އެއްފަހަރު ހުށަހަޅަން ޖެހޭ މާލީ ބަޔާން ހުށަހަޅާފައި ނުވާއިރު، ކުރީގެ ބައެއް ވަޒީރުންނާއި މިހާރުގެ ބައެއް ވަޒީރުން މަގާމާއި ހަވާލުވި ފަހުން މާލީ ބަޔާން ހުށަހަޅާފައި ނުވާ ކަމަށެވެ. މީގެ އިތުރުން މިނިވަން މުއައްސަސާތަކުގެ ކުރީގެ މެންބަރުންނާއި މިހާރުގެ މެންބަރުން ވެސް މާލީ ބަޔާން ހުށަހަޅާފައި ނުވާ ކަމަށެވެ.

އޭގެތެރޭގައި ޕީޖީ ޝަމީމު ވެސް ހިމެނިވަޑައިގަންނަވާއިރު އެކަމާއި ގުޅިގެން ކުރެއްވި ޓުވީޓެއްގައި ޝަމީމް ވިދާޅުވީ، މާލީ ބަޔާނުގައި ހިމަނަންޖެހޭ ބައެއް މަޢުލޫމާތު ނުލިބުމުގެ ސަބަބުން، މާލީ ބަޔާން ހުށަހެޅިފައި ނުވާ ވާހަކަ އާއި، އެ މަޢުލޫމާތުތައް ހޯދުމުގެ މަސައްކަތް ކުރަމުން އަންނަ ކަމަށް އޮޑިޓަރ ޖެނެރަލް އަށް އަންގަވާފައިވާނެ ކަމަށެވެ. އަދި އެ މައުލޫމާތު ލިބުނުހާ އަވަހަކަށް ބަޔާން ހުށަހަޅާނެ ވާހަކަ އޮޑިޓަރ ޖެނެރަލްގެ ސަމާލުކަމަށް ގެނެސްފައިވާނެ ކަމަށާއި މާލީ ބަޔާން ޢާންމު ކުރާނެ ކަމަށް ޕީޖީ ވަނީ ވިދާޅުވެފައެވެ.

ޕްރޮސެކިއުޓަރ ޖެނެރަލްގެ ގާނޫނުގެ 12 ވަނަ މާއްދާގެ (ށ) ގެ ދަށުން އެސެޓް ޑިކްލަރޭޝަން ޕީޖީ ހުސައިން ޝަމީމް ހުށަހަޅުއްވާފައި ނުވެއެވެ. ޕީޖީ ޝަމީމް ހުށަނާޅުއްވަނީ މަގާމާއި ހަވާލުވުމާއެކު ހުށަހަޅުއްވަން ޖެހޭ މާލީ ބަޔާނެވެ.