ކުރީގެ ނައިބް ރައީސް އަހުމަދު އަދީބްގެ ބޭސްފަރުވާއަށް ހުރަސް ނާޅާ އޭނާއަށް ބޭސްފަރުވާ ކުރެވޭނެ އިންތިޒާމު ހަމަޖެއްސުމަށް ވަރލްޑް އޯގަނައިޒޭޝަން އެގެއިންސްޓް ޓޯޗަރ (އޯއެމްސީޓީ) އިން ގޮވާލައިފިއެވެ.
އެ ޖަމިއްޔާއިން މިގޮތަށް ގޮވާލާފައިވަނީ ދީބްގެ ބޭސްފަރުވާއަށް ހުރަސް ނާޅާ އޭނާއަށް ބޭސްފަރުވާ ކުރެވޭނެ އިންތިޒާމު ހަމަޖައްސަން ގޮވާލާ އެމްނެސްޓީ އިންޓަނޭޝަނަލް އިން، ރައީސް އިބްރާހިމް މުހައްމަދު ސޯލިހުއަށް ސިޓީއެއް ފޮނުވާފައިވަނިކޮށެވެ.
އޯއެމްސީޓީން ބުނީ ބޭސް ފަރުވާ އަކީ އެންމެންނަށްވެސް ލިބެންޖެހޭ ހައްގެއް ކަމަށެވެ.
އެމްނެސްޓީން ރައީސް ސޯލިހު އަށް ފޮނުވާފައިވާ ސިޓީގައި ބުނެފައިވަނީ އަދީބުއަށް ސިއްހީ ގޮތުން ދިމާވެފައިވާ މައްސަލަތަކަކީ ރާއްޖެއިން ފަރުވާ ހޯދޭނެ މައްސަލަތަކެއް ނޫންކަން މީގެ ކުރިންވެސް އޭނާގެ ވަކީލުން ކަރެކްޝަންސްއަށް އަންގާފައިވާ ކަމަށެވެ.
އޭގެ އިތުރުން، މި ސަރުކާރުން އަދީބަށް ބޭސް ފަރުވާކުރުމުގެ ފުރުސަތު ދިނަސް އެއީ ރާއްޖެއިން ހޯދޭނެ ކަންތައްތައް ނޫން ކަމަށާއި ބަންދުގައި ތިބޭ މީހުންނަށް ބޭސްފަރުވާ ދިނުމަކީ ޖަލު އަދި ޕެރޯލްގެ ގާނޫނުގެ ދަށުން ލާޒިމުކުރާ ކަމެއް ކަމަށެވެ. ބޭސްފަރުވާ ފޯރުކޮށް ދިނުމަކީ ދުނިޔޭގެ މުއާހަދާތަކުން ދައުލަތަށް ލާޒިމްކުރާ ކަމެއް ކަމަށް ވެސް އެމްނެސްޓީން ބުންޏެވެ.
އެމްއެމްޕީއާރުސީގެ ހިޔާނާތާއި ގުޅިގެން އަދީބުގެ މައްޗަށް ދައުލަތުން ހަތް ދައުވާއެއް އުފުލިއެވެ. އެ ދައުވާތައް ޖުލައި މަހުގެ 14 ވަނަ ދުވަހު ކްރިމިނަލް ކޯޓުން ބާޠިލްކަމަށް ނިންމުމުން އަދީބު ހުންނެވީ މިނިވަން ވީނަމަވެސް، އެ މައްސަލަ ހައިކޯޓުގައި އިސްތިއުނާފްކޮށް ދައުވާތަކުގެ ޝަރީއަތްތައް ނިމެންދެން، އަދީބު ރިމާންޑް ޖަލެއްގައި ބެހެއްޓުމަށް ހައިކޯޓުން އަމުރު ކުރިއެވެ.
