ރައީސް ޔާމީން އެދިވަޑައިގެންނެވުމުން މާދަމާގެ ޝަރީއަތުގެ އަޑުއެހުން ކެންސަލް ކޮށްފި
4 އޯގަސްޓު 2020 | އަންގާރަ 11:30މިދިއަ ޖުލައި މަހު 8 ވަނަ ދުވަހު ބޭއްވީ ހުލާސާ ގޮތެއްގައި ވާހަކަ ދެއްކެވުމަށް ދެފަރާތަށް ފުރުސަތު ދިނުމަށް ބޭއްވި އަޑުއެހުމެއް
ކުރީގެ ރައީސް އަބްދުﷲ ޔާމީން އަބްދުލްގައްޔޫމް: އެމަނިކުފާނުގެ ޝަރީއަތް އަވަސް ކުރަން އެމަނިކުފާނު ބޭނުންފުޅުވޭ، އެކަމަކު އަޑުއެހުންތައް ކެންސަލް ކުރައްވަން އެދިވަޑައިގަންނަވަނީ ވެސް އެމަނިކުފާނު
އެމްއެމްޕީއާރުސީގެ ހިޔާނާތުގެ ފައިސާއިން މަނީ ލޯންޑަރ ކުރުމުގެ ކުށް ސާބިތުވެ، ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ފަރާތުން އިސްތިއުނާފް ކުރައްވާފައިވާ މައްސަލައިގެ ބުދަ ދުވަހު ބާއްވަން ތާވަލްކުރި އަޑުއެހުން ކެންސަލް ކޮށްފި އެވެ.
ހައިކޯޓުން ވަނީ ރައީސް ޔާމީންގެ ފަރާތުން އިސްތިއުނާފް ކުރައްވާފައިވާ މައްސަލައިގެ އިސްތިއުނާފްގެ ޝަރީއަތުގެ އަޑު އެހުމެއް ބުދަ ދުވަހު ބޭއްވުމަށް ތާވަލް ކުރިކަން ކަށަވަރު ކޮށްދެއްވާފަ އެވެ. އަދި ބުދަ ދުވަހު ބާއްވަން ތާވަލް ކުރި އަޑުއެހުމުން ކެންސަލް ކޮށްފައިވަނީ ރައީސް ޔާމީން އެދިވަޑައިގެންނެވުމުގެ މަތިން ކަމަށްވެސް ހައިކޯޓުން ބުނެފައި ވެއެވެ.
ރައީސް ޔާމީންގެ ފަރާތުން ހައިކޯޓުގައި އިސްތިއުނާފްކޮށްފައިވާ، މައްސަލައިގެ ޝަރީއަތް އަވަސް ކުރަން، އެމަނިކުފާނާއި އެމަނިކުފާނުގެ ޕާޓީން ބޭނުންވި ނަމަވެސް، މިއީ މިގޮތަށް އަޑުއެހުން ފަސްކުރި ދެވަނަ ފަހަރެވެ. މިދިޔަ ޖުލައި މަހުގެ 8 ވަނަ ދުވަހު، ހުލާސާ ގޮތެއްގައި ވާހަކަ ދެއްކުމުގެ ފަހު ފުރުސަތު ދިނުމުގެ ގޮތުން ބޭއްވި އަޑުއެހުމުގައި ވެސް ރައީސް ޔާމީން ވަނީ އިތުރު އަޑުއެހުމެއް ބާއްވާ ދެއްވުމަށް އެދިވަޑައިގަންނަވާފަ އެވެ. އެގޮތުގެ މަތިން އިތުރު އަޑުއެހުމެއްގެ ގޮތުގައި ބުދަ ދުވަހުގެ އަޑުއެހުން ހައިކޯޓުން ތާވަލް ކޮށްފައިވަނިކޮށް، އަނެއްކާވެސް ރައީސް ޔާމީން އެދިވަޑައިގެންނެވުމުގެ މަތިން މިވަނީ ކެންސަލް ކޮށްފަ އެވެ.
ރައީސް ޔާމީންގެ ފަރާތުން ހައިކޯޓުގައި އިސްތިއުނާފު ކުރައްވާފައިވަނީ، މަނީ ލޯންޑަރ ކުރުމުގެ ކުށުގެ ދައުވާ އާގުޅިގެން، ކްރިމިނަލް ކޯޓުގައި އެދައުވާ އެމަނިކުފާނުގެ މައްޗަށް ސާބިތުވެ، 5 އަހަރަށް ޖަލަށްލުމާއެކު 5 މިލިއަން ޑޮލަރުން ޖޫރިމަނާކުރި މައްސަލައެވެ.
އެމްއެމްޕީއާރުސީގެ ހިޔާނާތުގެ ފައިސާއިން، މަނީ ލޯންޑަރ ކުރުމުގެ ކުށުގެ ދައުވާ އާގުޅިގެން ކްރިމިނަލް ކޯޓުން އެމަނިކުފާނުގެ މައްޗަށް ހުކުމް ކޮށްފައިވަނީ މިދިއަ އަހަރުގެ ނޮވެމްބަރު 28 ގަ އެވެ.
ގއ. ވޮޑަމުލާގެ އިކުއިޒިޝަން ކޯސްޓްގެ ގޮތުގައި ދައުލަތަށް ލިބެންޖެހޭ 1،000،000 ޑޮލަރު ރައީސް ޔާމީންގެ އެކައުންޓަށް ޖަމާކޮށްފައިވާއިރު، އެމްއެމްޕީއާރުސީގެ އިތުރު މައްސަލަތަކެއްގެ ތަހުގީގުތައް ކުރިއަށްދެ އެވެ. ދާދިފަހުން ވަނީ އެމްއެމްޕީއާރުސީގެ ހިޔާނާތުގައި ހިމެނޭ، ރ. ފުއްގިރި ރިސޯޓެއް ތަރައްގީ ކުރުމަށް ކުއްޔަށް ދިން މައްސަލައެއްގައި މަނީ ލޯންޑަރ ކުރުމުގެ ދައުވާއަކާއި ކޮރަޕްޝަންގެ ދައުވާއެއް ކްރިމިނަލް ކޯޓަށް ހުށަހަޅާފައެވެ. މި މައްސަލާގައި ދައުލަތުން ރައީސް ޔަމީންގެ މައްޗަށް ހޯދުމަށް މަސައްކަތް ކުރާ، ޖުމްލަ ފައިސާގެ އަދަދަކީ 591 މިލިއަން ރުފިޔާއެވެ.
