ފުވައްމުލަކު ހޮސްޕިޓަލުން ހުޅުމާލޭ ހޮސްޕިޓަލާ ގުޅިގެން، އިންޑިއާގެ އަމްރިތާ ހޮސްޕިޓަލުގެ ކެންސަރަށް ފަރުވާދޭ ޑިޕާޓްމަންޓްގެ ޚާއްޞަ ޑޮކްޓަރަކާ އޮންލައިން ކޮންސަލްޓޭޝަނެއް ކުރިއަށް ގެންގޮސްފިއެވެ.
ބުދަ ދުވަހު ފުވައްމުލަކު ހޮސްޕިޓަލުން ނެރުނު ބަޔާނެއްގައި ބުނީ، މިއީ ފުވައްމުލަކު ހޮސްޕިޓަލުގެ ތާރީޚުގައި އެހެން ހޮސްޕިޓަލެއްގެ ޚާއްޞަ ޑޮކްޓަރަކާ އޮންލައިން ކޮންސަލްޓޭޝަން ހެދި ފުރަތަމަ ފަހަރު ކަމަށެވެ. އަދި އިންޑިއާގެ ބޮޑު ހޮސްޕިޓަލަކާއެކު މި ޚިދުމަތް ފެށިގެން ދިއުން އެއީ ހޮސްޕިޓަލުގެ މުވައްޒަފުންނަށް ލިބުނު ޚާއްޞަ ފަޚުރެއް ކަމަށް ބުނެފައިވެއެވެ.
އޭގެ އިތުރުން، މި ޚިދުމަތުގެ ސަބަބުން ބޮޑެތި ބަލިތަކުގައި ފަރުވާ ހޯއްދަވާ ބޭފުޅުންނަށް ދޭތެރެ ދޭތެރެއިން ދަތުރު ކުރުމުގެ ބަދަލުގައި ފަރުވާ ހޯއްދަވާ ޑޮކްޓަރާ ފުވައްމުލަކުގައި ތިއްބަވައިގެން ބައްދަލުވެވޭ ގޮތްވުމަށް މަގުފަހިވެގެންދާނެ ކަމަށް ހޮސްޕިޓަލުން ބުނެއެވެ. އަދި އެކަމުގެ ސަބަބުން ޚަރަދު ކުޑަވެ އެތައް ގޮތަކުން ލުއިފަސޭކަން ލިބޭނެކަމަށް ބުނެފައިވެއެވެ.
ފުވައްމުލަކު ހޮސްޕިޓަލުން ބުނީ، ކުރިމަގުގައި ރާއްޖެއާއި ބޭރުގެ ބޮޑެތި އެހެން ހޮސްޕިޓަލްތަކުގެ ޑޮކްޓަރުންނާއެކު ކޮންސަލްޓޭޝަން ހެދުމުގެ ފުރުސަތު ހޯދައި ދިނުމަށް ހޮސްޕިޓަލުން މަސައްކަތް ކުރާނެ ކަމަށެވެ.
