ފުވައްމުލަކު ދަނޑިމަގު އަވަށު ކުޅި ސަރަޙައްދުގައި ރޯވި އަލިފާން އެމްއެންޑީއެފް ސަދަން އޭރިއާ، ފުވައްމުލަކު ފަޔަރ ސްޓޭޝަނުގެ ފަޔަރމަނުން ނިއްވާލައިފިއެވެ.
އެމްއެންޑީއެފުން ބުނީ މި ހާދިސާގެ މައުލޫމާތު ހުކުރު ދުވަހުގެ 11:45 ހާއިރު އެމްއެންޑީއެފް ސަދަން އޭރިއާއަށް ލިބުމާ ގުޅިގެން، ފުވައްމުލަކު ފަޔާ ސްޓޭޝަނުގައި ތިބި އެމްއެންޑީއެފްގެ ފަޔާމަނުން ވަނީ އެސަރަޙައްދަށް ގޮސް ވަގުތުން ހަރަކާތްތެރިވެފަ ކަމަށާއި ފަޔާމަނުން ކުރި މަސައްކަތުން، އަލިފާންގަނޑު އާންމުން ދިރިއުޅޭ ސަރަޙައްދަށް އިތުރަށް ނުފެތުރޭނެ ގޮތަށް ކޮންޓްރޯލްކޮށްފައިވާ ކަމަށެވެ.
ފުވައްމުލަކު ދަނޑިމަގު އަވަށު ކުޅި ސަރަޙައްދުގެ ބޮޑުބައެއްގައި ރޯވި މިއަލިފާންގަނޑު އެއްކޮށް ނިއްވާލާފައިވަނީ ހުކުރު ދުވަހުގެ ހަވީރު 15:30 ހާއިރު ކަމަށް އެމްއެންޑީއެފުން ބުނެ އެވެ.
މި ހާދިސާގައި އެއްވެސް މީހަކަށް ގެއްލުމެއް ލިބިފައިވާކަމުގެ މައުލޫމާތު ލިބިފައެއް ނުވެއެވެ.
