އިންޓަ މިލާނަށް ލޯނު އެއްބަސްވުމެއްގެ ދަށުން ކުޅެމުން އަންނަ މެންޗެސްޓާ ޔުނައިޓެޑްގެ ފޯވާޑް އެލެކްސިސް ސަންޗޭޒްގެ އެއްބަސްވުން ދާއިމީ ކުރުމަށް އިންޓައިން ހުށަހަޅާނެ ކަމަށް މީޑިއާ ރިޕޯޓުތައް ބުނެފިއެވެ.

މިދިޔަ އަހަރުގެ އޮގަސްޓް މަހު ސަންޗޭޒް އިންޓަ އަށް ބަދަލުވީ ޖޫން މަހުގެ ނިޔަލަށް ލޯނު އެއްބަސްވުމެއްގެ ދަށުންނެވެ. އެކަމަކު ކޮވިޑް-19 އާ ގުޅިގެން ސީޒަން ދިގުލައިގެން ދާނެތީ ސަންޗޭޒް ވަނީ މި ސީޒަން ނިމެންދެން އިންޓަގައި މަޑުކުރަން ނިންމާ ލޯނު އެއްބަސްވުން އާކޮށްފައެވެ.

މެންޗެސްޓާ ޔުނައިޓެޑްގެ ލޯނު އެއްބަސްވުމެއްގެ ދަށުން ސަންޗޭޒް އިންޓައަށް ކުޅެމުން އަންނައިރު، އޭނާގެ އެއްބަސްވުން ދާއިމީ ކުރަން މިހާރު އިންޓައިން މަސައްކަތް ކުރަމުން އަންނަ ކަމަށް ރިޕޯޓުތައް ބުނެއެވެ. އެގޮތުން ސަންޗޭޒްގެ އެއްބަސްވުން ދާއިމީ ކުރުމަށް އިންޓައިން އަންނަ އާދީއްތަ ދުވަހު 20 މިލިއަން ޔޫރޯގެ ބިޑެއް ޔުނައިޓެޑަށް ހުށަހަޅާނެއެވެ.

ރިޕޯޓުތައް ބުނާ ގޮތުން ސަންޗޭޒް ވިއްކާލަން ޔުނައިޓެޑުން އޮތީ ތައްޔާރަށެވެ. ސަބަބަކީ ޔުނައިޓެޑްގެ ކޯޗު އޮލެ ގުނަ ސޯލެޝެއާގެ ޕްލޭންގައި ސަންޗޭޒް ނުހިމެނޭތީއެވެ.

2018 ވަނަ އަހަރުގެ ޖެނުއަރީ މަހު ސަންޗޭޒް ޔުނައިޓެޑަށް ބަދަލުވީ ހަތަރު އަހަރުގެ އެއްބަސްވުމެއްގެ ދަށުން އަހަރަކު 14 މިލިއަން ޕައުންޑު މުސާރައިގެ ގޮތުގައި ލިބޭ ގޮތަށެވެ. އެގޮތުން އޭނާ ޔުނައިޓެޑާއެކު ހަދާފައިވާ އެއްބަސްވުން ހަމަވާނީ 2022 ވަނަ އަހަރެވެ.

މީގެ ކުރިން ބާސާއަށްވެސް ކުޅެފައިވާ ސަންޗޭޒް ވަނީ އެ ކްލަބާއެކު ވެސް ގިނަ ކާމިޔާބީތައް ހޯދާފައެވެ. އާސެނަލްގައިވެސް ސަންޗޭޒް މޮޅު ކުޅުމެއް ދެއްކި ނަމަވެސް، ޔުނައިޓެޑްގައި އޭނާއަށް އެންމެ އެދެވޭ ކުޅުމެއް ދެއްކިފައެއް ނުވެއެވެ.

މި ސީޒަނުގައި އިންޓައަށް ބަދަލުވި ސަންޗޭޒް މިހާތަނަށް އެޓީމަށް 28 މެޗު ކުޅެދީފައިވާއިރު، އޭނާ ވަނީ ހަތަރު ލަނޑު ކާމިޔާބުކޮށްފައެވެ.