ކޮވިޑް-19: ޔުނިވަރސަލުން ޕީސީއާރު ދެ މެޝިން ހަދިޔާ ކޮށްފި
29 ޖުލައި 2020 | ބުދަ 07:39ޕީސީއާރު ދެ މެޝިނާއެކު "ރަންކުރަން" ބޭނުންވާ ސާމާނު ވެސް ފޯރުކޮށްދިން
ޔުނިވަރސަލްއިން ހަދިޔާ ކުރި ޕީސީއާރު 2 މެޝިން ހަވާލުވުމުގެ ލިޔުމުގައި ހެލްތް މިނިސްޓަރ އަމީން ހަވާލުވެލައްވަނީ
ރާއްޖޭގައި ކޮވިޑް-19 އަށް ޓެސްޓްކުރުން އިތުރަށް ހަރުދަނާ ކުރުމުގެ މަސައްކަތަށް އެހީތެރިވުމުގެ ގޮތުން ރާއްޖޭގެ ފަތުރުވެރިކަމުގެ ދާއިރާގައި އެންމެ ދުވަސްވީ އެއް ކުންފުނި ޔުނިވަރސަލް އެންޓަރޕްރައިސަސްގެ ފަރާތުން ޕީސީއާރު ދެ މެޝިން ހަދިޔާކޮށްފިއެވެ.
ޕީ.ސީ.އާރު މެޝިންތައް ރަސްމީކޮށް މިނިސްޓްރީ އޮފް ހެލްތާއި ހަވާލުކުރީ މިކަމަށްޓަކައި ހެލްތު އިމަރޖެންސީ އޮޕަރޭޝަންސް ސެންޓަރުގައި އަންގާރަ ދުވަހު ބޭއްވި ރަސްމިއްޔާތެއްގައެވެ. ޔުނިވަރސަލުން ހަދިޔާ ކުރި ޕީސީއާރު ދެ މެޝިނުގެ ލިޔުމާއި ހަވާލުވެވަޑައިގެންނެވީ ހެލްތް މިނިސްޓަރ އަބްދުﷲ އަމީން އެވެ. ޔުނިވަރސަލްގެ ފަރާތުން އެލިޔުން ހަވާލުކޮށްދެއްވީ، އެކުންފުނީގެ ޖެނެރަލް މެނޭޖަރ ހިއުމަން ރިސޯސަސް، އަލީ އާދަމް އެވެ.
މި ރަސްމިއްޔާތުގައި ހެލްތް މިނިސްޓަރ އަމީން ވަނީ ޔުނިވާސަލް އެންޓަޕްރައިސަސްގެ ފަރާތުން ލިބުނު އެހީތެރިކަމާއި އެއްބާރުލުން ފާހަގަކުރައްވައި އެކުންފުންޏަށް ޝުކުރު އަދާކުރައްވާފައެވެ.
"ރާއްޖެއެމްވީ" މައުލޫމާތު ދެއްވަމުން އަލީ އާދަމް ވިދާޅުވީ، އެ މެޝިނާއެކު، އެ މެޝިން "ރަންކުރަން" ބޭނުންވާ ވަސީލަތްތައް ވެސް ފޯރުކޮށްދީފައިވާނެ ކަމަށެވެ.
ޔުނިވާސަލްގެ ފަރާތުން މީގެކުރިން ވަނީ 20،000 ޓެސްޓް ކިޓް ވެސް ހަދިޔާކޮށްފައެވެ.
މާލޭގެ އިތުރުން، ރާއްޖޭގެ 5 ސަރަޙައްދުގައި މިހާރު ވަނީ ކޮވިޑް-19އަށް ޓެސްޓް ކުރެވޭނެ އިންތިޒާމްތަކާއި ފަރުވާދެވޭނެ ފެސިލިޓީތަށް ޤާއިމުކޮށްފައެވެ.
