ރައީސް ޔާމީނާއި ބައްދަލުކުރެއްވުމަށް ކަރެކްޝަންސް އިން ދަނީ ހުރަސް އަޅަމުން: ޤާނޫނީ ވަކީލުން

ޖަލު ހުކުމެއް ތަންފީޒު ކުރައްވަމުން ގެންދަވާ، ކުރީގެ ރައީސް އަބްދުﷲ ޔާމީން އަބްދުލް ގައްޔޫމްއަށް އެމަނިކުފާނުގެ ޤާނޫނީ ވަކީލުންނާ ބައްދަލުކޮށް، ޤާނޫނީ ވަކީލުންގެ އެހީތެރިކަން ހޯދުމުގެ ހައްގަށް މޯލްޑިވްސް ކަރެކްޝަނަލް ސަރވިސް އިން ހުރަސް އަޅަމުންދާ ރައީސް ޔާމީންގެ ގާނޫނީ ވަކީލުން ކަމަށް ވިދާޅުވެއްޖެއެވެ.

ރައީސް ޔާމީންގެ ގާނޫނީ ވަކީލުން އަންގާރަ ދުވަހު ނެރެފައިވާ ނޫސްބަޔާނެއްގައި ބުނެފައިވަނީ، ކޮވިޑް19 އާ ގުޅިގެން ސަރުކާރުން އިޢުލާނު ކުރި ލޮކްޑައުންގެ ގިނަ އުޞޫލުތައް އުވާލައި، ގިނަ ކަންކަމަށް ބޮޑެތި ލުއިތަކެއްދީފައިވާއިރު، އަދި ކޯޓުތައް ވެސް މިހާރު ހުޅުވައި ޝަރީޢަތްތައް ވެސް ފަށާފައިވާއިރު، ރައީސް ޔާމީނާ ގުޅޭ ބައެއް ޝަރީއަތުގެ އަޑުއެހުންތައް ވެސް ފަށާފައިވާ ކަމަށެވެ. ނަމަވެސް، ޤާނޫނު އަސާސީގެ 51 ވަނަ މާއްދާގެ ދަށުން އެފަދަ ޝަރީޢަތްތަކުގައި ރައީސް ޔާމީނަށް ލިއްބައިދޭ، ޤާނޫނީ ވަކީލެއްގެ އެހީތެރިކަން ހޯދުމުގެ ޙައްޤަށް ކަރެކްޝަނަލް ސަރވިސްއިން ހުރަސް އަޅަމުން ގެންދާތީ އެކަމާމެދު ނުހަނު ބޮޑަށް ކަންބޮޑުވުން ފާޅުކުރާ ކަމަށްވެސް ނޫސްބަޔާނުގައި ބުނެފައެވެ.

Advertisement

މީގެއިތުރުން، ބުނެފައިވަނީ، ހައިކޯޓުން މިމަހުގެ 8 ވަނަ ދުވަހު ބޭއްވި ޝަރީއަތުގެ އަޑުއެހުން ނިންމަވާލައްވާފައި ވަނީ، ރައީސް ޔާމީނާއި އެމަނިކުފާނުގެ ޤާނޫނީ ވަކީލުންނާ ސީދާކޮށް ބައްދަލު ކުރެވޭނެ އިންތިޒާމް ހަމަޖައްސަވައި ދެއްވުމަށް ދައުލަތަށް އެންގެވުމާއެކު އެ މައްސަލައިގައި ރައީސް ޔާމީނަށް އެ ފުރުޞަތު ލިބުމަށްފަހު އިތުރު އަޑުއެހުމެއް ބާއްވާނެ ކަމަށް އިޢުލާނު ކުރެއްވުމަށް ފަހުގައި ކަމަށެވެ.

އެހެންނަމަވެސް، ރައީސް ޔާމީނާ ބައްދަލުކުރުމަށްޓަކައި ވަކީލު ބައްދަލުވުމަށް އެދޭ ފޯމު ކަރެކްޝަނަލް ސަރވިސްގެ މާލޭ ޖަލަށް ހުށަހަޅަން ދިއުމުން ރައީސް ޔާމީނާ ސީދާކޮށް ގާތުން ބައްދަލުކުރުމުގެ ފުރުޞަތެއް ނުލިބޭނެ ކަމަށް އަންގައި ވަކީލު ބައްދަލުވުން ހަމަޖައްސައިދީފަ ނުވާ ކަމަށެވެ. އަދި ބައްދަލުވުމަށް އެދުނީ ހައިކޯޓުން އެންގެވި އެންގުމާ ގުޅިގެން ކަމަށް ބަޔާންކޮށް އަދި ބައްދަލުވުން ހަމަޖެހޭނެ ކަމަށް އަންގައި ކަރެކްޝަނަލް ސަރވިސް އިން ފޮނުވާފައިވާ ސިޓީ ދެއްކުމުން ވެސް ވަކީލު ބައްދަލުވުން ހަމަޖައްސައިދިނުމަށް އިންކާރުކޮށް ފޯމު ވެސް ބަލައިގަނެފައެއް ނުވާ ކަމަށް ބަޔާނުގައި ބުނެފައި ވެއެވެ.

އެހެންކަމުން، ހައިކޯޓުން ވެސް އަންގަވާފައިވާ ގޮތަށް ރައީސް ޔާމީނާއި ވަކީލުން ސީދާކޮށް ގާތުން ބައްދަލުކުރެވޭނެ އިންތިޒާމް ހަމަޖައްސައި ނުދީ ޤާނޫނު އަސާސީން އެމަނިކުފާނަށް ލިބިލައްވާ ޤާނޫނީ ވަކީލެއްގެ އެހީތެރިކަން ހޯދުމުގެ ޙައްޤަށް ހުރަސް ނުއެޅުމަށް ކަރެކްޝަނަލް ސަރވިސް އަށް އިލްތިމާސް ކުރާ ކަމަށް ވެސް ރައީސް ޔާމީންގެ ޤާނޫނީ ވަކީލުން ނެރެފައިވާ ބަޔާނުގައި ބުނެފައިވެއެވެ.

މީގެއިތުރުން، ކަރެކްޝަނަލް ސަރވިސް އިން ތައްޔާރުކުރައްވައި 12 ޖަނަވަރީ 2020ގައި ޢަމަލުކުރަން ފަށާފައިވާ، ސްޕެޝަލް ޕްރޮޓެކްޝަން ދޭންޖެހޭ ކަމަށް ކަނޑައަޅާ ޤައިދީންނާއި ބަންދު މީހުންނާމެދު ޢަމަލު ކުރަންވީ ގޮތުގެ ޢާއްމު އުޞޫލަށް ބަލާއިރު ޚަބަރު ފަތުރާ ވަޞީލަތްތައް ލިބުމުގެ ފުރުޞަތު އެފަދަ ފަރާތްތަކަށް ލިބެންޖެހޭކަން އެނގޭއިރު ރައީސް ޔާމީން އެ ފުރުޞަތުން މަޙުރޫމު ކުރެވިގެން ވާތީއާއި، އެގޮތުން މީގެ ކުރިން ޕަބްލިކް ސަރވިސް މީޑިއާގެ ޗެނަލްތައް ޓީވީ މެދުވެރިކޮށް ބެލުމުގެ އިންތިޒާމް ހަމަޖެހިފައި ވީނަމަވެސް މިހާރު އެ ވަޞީލަތް ބޭނުންކުރުމުން ވެސް ރައީސް ޔާމީން މަޙްރޫމްކޮށް، ޚަބަރު ފަތުރާ އެއްވެސް ވަޞީލަތެއް ލިއްބައިނުދީ އެކަމަށް ކަރެކްޝަނަލް ސަރވިސް އިން ހުރަސް އަޅަމުންދާ ދިއުން ހުއްޓާލުމަށް ވެސް ކަރެކްޝަނަލް ސަރވިސް އަށް އިލްތިމާސް ކުރާ ކަމަށް ވެސް ގާނޫނީ ވަކީލުންގެ ޓީމުން ނެރެފައިވާ ބަޔާނުގައި ބުނެފައި ވެއެވެ.