ތިން މަސް ދުވަސް ފަހުން ވިއެޓްނާމް އިން ކޮވިޑުގެ ކޭސްތަކެއް ފެނިއްޖެ

ފަތުރުވެރިންގެ މެދުގައި މަގުބޫލު ސިޓީއެއް ކަމަށްވާ ވިއެޓްނާމްގެ ދަނާންގުން 11 މީހަކު ކޮވިޑް-19ށް ޕޮޒިޓިވްވުމާއި ގުޅިގެން އެ ސަރަހައްދުގައި ތިބި 80،000 އެއްހާ ފަތުރުވެރިން އެ ސިޓީން ބޭރަށް ގެންދިޔުމުގެ މަސައްކަތް ފަށައިފިއެވެ.

ވިއެޓްނާމުން އެންމެ ފަހުން ކޮވިޑުގެ ކޭސްއެއް ފެނިފައިވަނީ އޭޕްރީލް މަހުއެވެ. އެއަށް ފަހު އެ ގައުމުން ކޮވިޑުގެ އެއްވެސް ކޭސްއެއް ރިޕޯޓު ކުރެވިފައެއް ނުވެއެވެ.

ވިއެޓްނާމްގެ ސަރުކާރުން ބުނީ، ހުރިހާ ފަތުރުވެރިން ސިޓީން ބޭރަށް ގެންދަން ހަތަރު ވަރަކަށް ދުވަސް ނަގާނެ ކަމަށެވެ. އެ އެންމެން އެ ސިޓީން ބޭރަށް ގެންދިޔުމަށް ކޮންމެ ދުވަހަކު ދަނަންގް އަށް 100 އެއްހާ ޑޮމެސްޓިކް ފްލައިޓް ދަތުރުކުރަން ހަމަޖެހިފައިވާ ކަމަށް ވިއެޓްނާމްގެ ސަރުކާރުން ވަނީ ބުނެފައެވެ.

އެތަނުން ގެންދާ މީހުން 14 ދުވަހަށް ކަރަންޓީނު ކުރަން ހަމަޖެހިފައިވަނީ ބަކް ގިއަން ޕްރޮވިންސުގެ އިތުރުން ބަކް ނިންގައެވެ.

ވިއެޓްނާމްގެ ހެލްތް މިނިސްޓްރީން ބުނީ، ޕޮޒިޓިވްވި 11 ކޭހަކީ ހޮސްޕިޓަލްތަކާއި ގުޅުން ހުރި ކޭސްތައް ކަމަށާއި، އޭގެ ތެރޭގައި ހަތަރު ހެލްތް ވޯކަރުން ހިމެނޭ ކަމަށެވެ.

ވިއެޓްނާމް އަކީ ކޮވިޑު ފެތުރުން ހުއްޓުވުމަށްޓަކައި ވަރުގަދަ ފިޔަވަޅުތަކެއް އެޅި ގައުމެކެވެ. ދުރާލާ އެޅި ފިޔަވަޅުތަކުގެ ސަބަބުން އެ ގައުމުގައި ބަލި ފެތުރޭ މިންވަރު ވަނީ ވަރަށް ބޮޑުތަނުން ދަށް ކުރެވިފައެވެ. އެ ގައުމުގައި 431 މީހަކު ކޮވިޑަށް ޕޮޒިޓިވްވެފައިވާއިރު ބަލި ޖެހިގެން އެއްވެސް މީހަކު މަރެއް ނުވެއެވެ.