ކޮވިޑް ރޯގާ ހުއްޓުވުމަށް އަޅާފައިވާ ފިޔަވަޅުތައް ވަރުގަދަކުރުމަށް އެމްއާރްއެމުން ގޮވާލައިފި

ކޮވިޑް-19އަށް ޕޮޒިޓިވްވާ މީހުންގެ އަދަދު ގިނަވަމުންދާތީ، ސަރުކާރުން ދީފާއިވާ ލުއިތަކަށް ބަދަލު ގެނެސް ހަރުދަނާ ފިޔަވަޅުތަކެއް އަޅަން ސަރުކާރު ހިންގާ ކޯލިޝަންގައި ހިމެނޭ މޯލްޑިވްސް ރިފޯމް މޫވްމެންޓު, އެމްއާރުއެމުން ގޮވާލައިފިއެވެ.

އެމްއާރުއެމުން އެހެން ގޮވާލީ އާދިއްތަ ދުވަހު ފާހަގަކުރާ 55 ވަނަ މިނިވަން ދުވަހުގެ މުނާސަބަތުގައި އާއްމުކޮށްފައިވާ ހިތާބެއްގައެވެ. އެ ޕާޓީން ބުނީ، މިނިވަން ދުވަހާ ބައްދަލުކުރިއިރު ކޮވިޑުގެ ސަބަބުން އާއްމުންގެ ދިރިއުޅުމަށް ބޮޑެތި ބަދަލުތަކެއް ގެންނަން ޖެހިފައިވާ ކަމަށެވެ. ބަލީގެ ސަބަބުން ދިރިއުޅުމުގެ މިނިވަން ކަމަށް މިވަނީ ހީނުކުރާފަދަ ބޮޑެތި ދަތިތަކަކާ ކުރިމަތި ލާންޖެހިފަ ކަމަށް އެޕާޓީގެ ބަޔާނުގައި ބުންޏެވެ.

އެމްއާރްއެމުން ބުނީ، ބަލިން ސަލާމަތްވެ ކުރީގައި އުޅުނު މިނިވަން ދިރިއުޅުން އިއާދަ ކުރެވޭނީ، އެންމެން އެކުގައި އެއް އަމާޒަކަށް މަސައްކަތް ކުރުމާއި އެކު ސަރުކާރުގެ އެންގުންތަކާ އެއްގޮތަށް އަމަލު ކޮށްގެން ކަމަށެވެ.

މިނިވަން ދުވަހާ ކުރިމަތިވިއިރު އިރު ރައްޔިތުންނަށް މިވަނީ، މިނިވަންކަމާއެކު އެއްރަށުން އަނެއް ރަށަށް ދަތުރުކުރެވޭނެ ހާލަތާއި ގޮތް ނެތިފައި އެކަމުގެ ދަތިތަކާއި ކުރިމަލާން ޖެހިފައިވާ ކަމަށް އެމްއާރުއެމުން ބުންޏެވެ. އެހެން ކަމުން ހާލަތު ރަނގަޅުކުރުމަށާއި ރައްޔިތުންނަށް ފަސޭހަ ގޮތްތައް ފަހިކޮށްދިނުމުގައި ދިވެހި ސަރުކާރުން ހަމަޖައްސާފައިވާ އިންތިޒާމުތައް މިހާރަށްވުރެ ހަރުދަނާ ކުރުން މުހިންމު ކަމުގައި އެމްއާރުއެމްގެ ބަޔާނުގައި ބުނެއެވެ.