ކުރީގެ ރައީސް ނާސިރަކީ ކޯފާ ވިޔަސް، އަޑުގަދަ ކުރައްވާ ބޭފުޅެއް ނޫން: މައިޒާން އުމަރު މަނިކު
26 ޖުލައި 2020 | އާދީއްތަ 13:43މާވާހަކަ ގިނަ ނުކުރައްވާނެ، ވިދާޅުވާ ވާހަކައެއް ވަރަށް ސާފުކޮށް، ވިދާޅުވާނެ
އިބްރާހިމް ނާސިރު ރަންނަބަނޑޭރި ކިލެގެފާނު
ދިވެހިރާއްޖެއަށް ފުރިހަމަ މިނިވަންކަން ހޯއްދަވާ ދެއްވުމުގެ މޭސްތިޔާ، ކުރީގެ ރައީސް އަލްމަރުހޫމް އިބްރާހީމް ނާސިރުއަކީ ކޯފާ ވިޔަސް، އަޑު ގަދަ ކުރައްވާ ބޭފުޅެއް ނޫންކަމަށް، އެމަނިކުފާނުގެ ވެރިކަމުގެ ޒަމާނުގައި އަރިހުގައި އުޅުއްވި، މައިޒާން އުމަރު މަނިކު ވިދާޅުވެއްޖެއެވެ.
ރާއްޖޭގެ މިނިވަން ކަމަށް 55 އަހަރުފުރުމުގެ މުނާސަބަތާއި ގުޅިގެން، ރާއްޖެޓީވީގެ "ފަށާއިރު" ޕްރޮގްރާމަށް ދެއްވި ހާއްސަ އިންޓަވިއުއެއްގައި މައިޒާން އުމަރު މަނިކު ވިދާޅުވީ، އެންމެ ފުރަތަމަ ނާސިރުއާ ދިމާވެވަޑައިގެންނެވީ ސިލޯނުގައި ކިޔަވަން ހުންނެވި ދުވަސްވަރު ކަމަށެވެ. އަދި ފަހުން މާލެ ބަދަލުވެ، ނާސިރާއެކު މަސައްކަތް ކުރުމުގެ ފުރުސަތު ލިބިލެއްވި ކަމަށާއި އެމަނިކުފާނަކީ، ވަރަށް ގޮތެއްގައި ހުންނަވާ ބޭފުޅެއް ކަމަށެެވެ.
އެގޮތުން، ނާސިރަކީ މާގިނައިން ވާހަކަ ދައްކަވާ، ބޭފުޅެއް ނޫން ކަމަށާއި، ވިދާޅުވާ އެއްޗެއް ވަރަށް ސާފުކޮށް، ކުރަން އަންގާ ކަމެއްނަމަ، އެކަން ކުރަންޖެހޭގޮތް ވަރަށް ސާފުކޮށް ވިދާޅުވެދެއްވާ ބޭފުޅެއް ކަމަށެވެ. އެހެންކަމުން، އެކަންކަމުގައި އުޅުއްވާ ބޭފުޅުން ވަރަށް ސަމާލުވެ އަޑު އައްސަވަން ޖެހޭ ކަމަށާއި، ތަކުރާރުކޮށް، އެއް ވާހަކައެއް ދައްކަން ޖެހުމަކީ ނާސިރު އެހާ ގަޔާވެވަޑައިގަންނަވާ ކަމެއް ނޫން ކަމަށެވެ.
މައިޒާން އުމަރު މަނިކު ވިދާޅުވީ، ނާސިރަކީ، ހަށިގަނޑުގައި ވެސް ވަރަށް ބާރު ހުންނަ ބޭފުޅަކަށްވާތީ، އަމަލީ ގޮތުންވެސް ބައެއް ކަންކަން ކުރެއްވުމުގައި އުޅުއްވި ކަމަށެވެ. އެގޮތުން، ބައެއް ފަހަރު، ބަރުކަމުން ނުނެގޭ އެއްޗެއްނަމަ، މީސްމީހުންނަށް އެހީތެރިވުމުގެ ގޮތުން، ނާސިރު އަމިއްލަފުޅަށް އެހީތެރިކަން ވެދެއްވާ، އެ އެއްޗެއްގެ އެއްކޮޅުގައި ހިއްޕަވާ ކަމަށް އުމަރު މަނިކު ވިދާޅުވި އެވެ.
މީގެ އިތުރުން އުމަރު މަނިކު ވިދާޅުވީ، ނާސިރަކީ ކޯފާ އިސްކުރައްވާ ހިނދުވެސް އަޑު ގަދަ ކުރައްވާ ބޭފުޅެއް ނޫންކަމަށާއި، އެމަނިކުފާނު ކޯފާ އިސްކުރެއްވިކަން އެނގޭނީ އެ މަނިކުފާނުގެ ލޯފުޅުން ކަމަށެވެ.
ނާސިރަކީ ކާރުކޮޅު އަމިއްލައަށް ދުއްވާ، ވަރަށް ހެނދުނާ ތެދުވެވަޑައިގެން، ރަށުތެރެ ބައްލަވާ އަދި ކުރަމުންދާ މަސައްކަތްތައް ބަރާބަރަށް ބައްލަވަމުން ގެންދެވި ބޭފުޅެއްކަމަށާއި، މީސްމީހުންނާ ހަވާލު ކުރައްވާ މަސައްކަތްތައް ވާނުވާ ނޭނގޭ ގޮތަށް މައުލޫމާތު ދެއްވުމަކީ ނާސިރު ކޯފާވާ ކަމެއްކަމަށް އުމަރު މަނިކު ވިދާޅުވިއެވެ.
އިބްރާހިމް އިބްރާހިމް ނާސިރު ރަންނަބަނޑޭރި ކިލެގެފާނަކީ ދިވެހިރާއްޖެ މިއަދު މިދެކޭ، ފުރިހަމަ މިނިވަން ކަމުގެ ބާނީއެވެ. ނާސިރުގެ ވެރިކަމުގެ ދައުރުގައި ރާއްޖޭގެ ތަރައްގީއަށް ފުރިހަމަ ބިންގަލެއް އެޅިގެން ދިޔަ ކަމަށް ތާރީހު ދިރާސާކުރާ ގިނަ ފަަރާތްތަކުން ބުނެއެވެ. އަދި ރާއްޖޭގެ މަސްވެރިކަމަށް އިންގިލާބީ ބޮޑެތި ބަދަލުތަކެއް ގެންނަވައި، ފަތުރުވެރިކަން ފެށިފައިވަނީ ވެސް ނާސިރުގެ ވެރިކަމުގައެވެ.
