މިނިވަންކަން މިގޮތުގައި އަންނަން އޮތް ޖީލުތަކަށް ގެންގޮސް ދިނުމަކީ އަޅުގަނޑުމެންގެ ބޮޑު ވާޖިބެއް: މާރިޔާ

ދިވެހިރާއްޖެއަކީ ޒަމާނުއްސުރެން މިނިވަން ކަންމަތީގައި އޮތް ގައުމެއް ކަމަށާއި، މިނިވަންކަން މިގޮތުގައި އަންނަން އޮތް ޖީލުތަކަށް ގެންގޮސްދިނުމަކީ މިއަދުގެ ދިވެހި ރައްޔިތުންގެ ބޮޑު ވާޖިބެއް ޑިފެންސް މިނިސްޓަރ މާރިޔާ އަހުމަދު ދީދީ ވިދާޅުވެއްޖެ އެވެ.

ދިވެހިރާއްޖޭގެ މިނިވަންކަމަށް 55 އަހަރުފުރި، 56 ވަނަ މިނިވަން ދުވަހުގެ ތަހުނިޔާ ރާއްޖޭގެ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އަށާއި ދިވެހި ރައްޔިތުންނަށް ފޮނުއްވި މެސެޖުގައި، ޑިފެންސް މިނިސްޓަރ މާރިޔާ ވިދާޅުވީ، ދިވެހިރާއްޖެ އަކީ ޒަމާނުއްސުރެއް މިނިވަން ކަންމަތީގައި އޮތް ގައުމެއް ކަމަށެވެ.

މާރިޔާ ވިދާޅުވީ، މިނިވަންކަން މަތީ ގައުމު ބޭއްވުމުގައި އެންމެ އިސްދައުރެއް އަދާކުރާ އެއްބަޔަކީ ދިވެހި ސިފައިން ކަމަށެވެ.

ދިވެހިރާއްޖޭގެ މިނިވަންކަމާ އިސްތިގްލާލް ދެމެހެއްޓުމަށްޓަކައި ދިވެހި ސިފައިން ވެފައިވާ ގުރުބާނީ، އަދި ވަމުންދާ ގުރުބާނީ ފާހަގަ ކުރައްވާ ކަމަށް ވެސް މާރިޔާ ވިދާޅުވި އެވެ.

މާރިޔާ ވިދާޅުވީ މިގޮތުގައި ސިފައިން ތިބޭނެކަމުގެ ޔަގީންކަން ޑިފެންސް މިނިސްޓަރގެ ހައިސިއްޔަތުން ދިވެހި ރައްޔިތުންނަށް އަރުވާ ކަމަށެވެ.

މާރިޔާ އަކީ ރާއްޖޭގެ ޑިފެންސް މިނިސްޓަރުކަން ކުރައްވާ ފުރަތަމަ އަންހެން ކަމަނާ އެވެ. އަދި މާރިޔާ އަކީ ގާނޫނީ ދާއިރާއިން މަތީ ތައުލީމް ހާސިލު ކުރައްވާފައިވާ ތަޖުރިބާކާރު ގާނޫނީ ވަކީލެއް ވެސް މެއެވެ.