ޗެއާޕާސަން އިންތިހާބުން ޕާޓީއަށް ތަރުހީބް އޮތްކަން ހާމަވޭ: އެމްޑީޕީ
ހުކުރު ދުވަހު ކުރިއަށް ގެންދިޔަ އެމްޑީޕީގެ ޗެއާޕާސަން އިންތިހާބުގެ ތެރެއިން
އެމްޑީޕީގެ ޗެއާޕާސަން ހޮވުމަށް ބޭއްވި އިންތިހާބުން ރާއްޖޭގައި ސުލްޙަވެރި ސިޔަސީ ހަރަކާތްތައް ހިންގަމުންދާ އެންމެ ކުޅަދާން އަދި އެންމެ މަޤުބޫލު ސިޔާސީ ޕާޓީކަން ހާމަވެއްޖެކަމަށް އެޕާޓީން ބުނެފިއެވެ.
ހަސަން ލަތީފް އެމްޑީޕީގެ ޗެއާޕާސަންގެ މާގަމު ކަށަވަރުކުރުމާ ގުޅިގެން އާދީއްތަ ދުވަހު އެޕާޓީން ނެރުނު ބަޔާނުގައި ބުނެފައި ވަނީ މި އިންތިޙާބުގައި ވޯޓުލަން އެއްވެސް މަޖުބޫރުކަމެއް ނުވަތަ ބިރެއް ނެތި، ޕާޓީގެ މެމްބަރުންގެ ތެރެއިން 25،000 އަށްވުރެ ގިނަ މެމްބަރުން ޖޯޝާއި ފޯރީގައި ވޯޓުލުމުގައި ބައިވެރިވެފައިވާކަން އުފަލާއެކު ފާހަގަކުރާ ކަމަށެވެ. ވޯޓުލުމުގެ ހަރަކާތްތައް ހިންގުމަށް ސަރުކާރުން އެއްވެސް އިމާރާތެއް ދޫކުރުމަށް އިންކާރުކޮށް ހުރަސްއަޅާފައިވަނިކޮށް، ރާއްޖޭގެ ހުރިހާ ކަންކޮޅެއްގައާއި ސްރީ ލަންކާގެ ކޮލަމްބޯގައި ވޯޓުލުމުގެ އިންތިޒާމް ހަމަޖައްސައި ކުރިއަށް ގެންގޮސްފައިވުމުން އެނގެނީ ސުލްޙަވެރި ސިޔަސީ ހަރަކާތްތައް ހިންގަމުންދާ އެންމެ ކުޅަދާން ސިޔާސީ ޕާޓީ އަކީ އެމްޑީޕީން ކަން ކަމަށް، އެ ޕާޓީން ބުނެ އެވެ.
ޗެއާޕާސަން އިންތިޙާބުގައި ވާދަކުރެއްވި ހަމައެކަނި ކެންޑިޑޭޓަކީ ޙަސަން ލަތީފުކަމުގައި ވީނަމަވެސް، ޕާޓީގެ އަސާސީ ޤަވާއިދުގައި ވާގޮތުން ޗެއާޕާސަންކަމަށް ހޮވިވަޑައިގަތުމަށް މެމްބަރުންގެ އަދަދުން 10 ޕަސެންޓް ވޯޓު ލިބިވަޑައިގަންނަވަންޖެހެއެވެ. ޙަސަން ލަތީފަށް އެއަދަދަށްވުރެ އިތުރަށް އެތައް ހާސް ވޯޓު ލިބިވަޑައިގެންފައިވާކަން އެޕާޓީން ވަނީ ފާހަގަކޮށްފައެވެ.
