މާލޭ ވިލިމާލޭގައި މަރުވާ މީހުން ކުރިއަށް އޮތް ދެ އަހަރު ދުވަހު މާލޭ އައު ސަހަރާގައި ވަޅުލާނެ ޖާގަ އެބަ އޮތް ކަމަށް މާލޭ ސިޓީ ކައުންސިލް މެމްބަރު ސަމާއު ޝަރީފް ވިދާޅުވެއްޖެއެވެ.
ސަމާއު މިގޮތަށް ވިދާޅުވީ މާލެ އާއި ވިލިމާލެއިން މަރުވާމީހުން ހުޅުމާލޭ ސަހަރާގައި ވަޅުލާ ގޮތަށް އިސްލާމް މިނިސްޓްރީން ނިންމުމާ ގުޅިގެނެވެ. ފެބުރުއަރީ މަހުން ފެށިގެން މާލޭގައި މަރުވާ މީހުންގެ ޖަނާޒާގެ ހުރިހާ ކަމެއް ކުރިއަށް ގެންދަނީ ހުޅުމާލޭ ސަހަރާގައި އެވެ.
ރާއްޖެއެމްވީއަށް މައުލޫމާތު ދެއްވަމުން ސަމާއު ވިދާޅުވީ މާލޭ ވިލިމާލޭގައި މަރުވާމީހުން އިސްލާމިކް މިނިސްޓްރީން ހުޅުމާލޭ އައު ސަހަރާގައި ވަޅުލާ ގޮތަށް ނިންމީ ރައްޔިތުންނަން ވަރަށް ބޮޑަށް އޮޅުވާލައިގެން ކަމަށެވެ. މާލޭ އައު ސަހަރާގައި ޖާގަ ނެތް ކަމަށް އެ މިނިސްޓްރީން ބުނި ނަމަވެސް، އެ ސަހަރާގައި ކުރިއަށް އޮތް ދެ އަހަރު ދުވަހު ވެސް މީހުން ވަޅުލާނެ ޖާގަ އެބައޮތް ކަމަށް އޭނާ ވިދާޅުވިއެވެ.
"މާލޭ އަދި ވިލިމާލޭގައި މަރުވާމީހުން ކުރިއަށް އޮތް ދެ އަހަރު ދުވަހު ވަޅުލާނެ ޖާގަ އާސަހަރާގައި އެބަ އޮތް، ކަނޑައެޅިގެން ދޮގު އިސްލާމިކް މިނިސްޓްރީން އެ ހަދަނީ" ސަމާއު ވިދާޅުވިއެވެ.
އެމްބިއުލާންސްގައި، މައްޔިތާ އުފުލާފެރީ ހޮސްޕިޓަލުން ނަސަންދުރާ ކުރިމައްޗަށް ގެންގޮސްދެނީ 60 ރުފިޔާއަށާއި އެމްޓީސީސިގެ ފެރީގައި މައްޔިތާ ހުޅުމާލެއަށް ގެންގޮސް ދެނީ 600 ރުފިޔާއަށް ކަމަށް ޝަމާއު ވިދާޅުވި އެވެ. ހުޅުމާލޭ ސަހާރައަށް ވެހިކަލެއްގައި ގަބުރު ގެންގޮސްދެނީ 160 ރުޔިޔާއަށެވެ.
ސަމާއު ވިދާޅުވީ އައިޖީއެމްޗުން މަރުވާ މީހުން މިހާރު ދެ ގަޑީއިރު ތެރޭގައި ހޮސްޕިޓަލުން ނެރެ އެމްބިއލާންސަށް އަރުވާން ޖެހޭ ކަމަށާއި އެ ހޮސްޕިޓަލުން އެގޮތަށް އަމަލުކުރަން ފެށުމުން، ރައްޔިތުންނަން އިތުރު ހިތްދަތިކަމަކާއި ކުރިމަތިލާން ޖެހޭ ކަމަށް އޭނާ ވިދާޅުވިއެވެ.
އެމްޓީސީސީ ފެރީގައި މައްޔިތާއާއެކު ތިން މީހުންނަން ދަތުރުކުރެވޭ ގޮތަށް ހަމަޖެއްސުމުން، ޖަނާޒާގައި ބައިވެރިވާން ބޭނުންވާ އެންމެނަން ޖަނާޒާގައި ބައިވެރިނުވޭ ކަމަށް ވެސް ސަމާއު ވިދާޅުވިއެވެ. އަދި އެމްޓީސީސީ އެއްފަހަރާ ދެ މައްޔިތުން ގެންދެވޭގޮތަށް ފަރުވާ ކޮށްފައިވާ ފެރީ އަކީ އެކަމަށް އެންމެ އެކަށީގެންވާ ފެރީއެއް ނޫން ކަމަށް އެނާ ވިދާޅުވިއެވެ.
މި ނިންމުން ނިންމާ ސަރުކާރުންވަނީ މާލޭ ސަރަހައްދުގެ މީހުން ވަޅުލުމުގެ ހުރިހާ ކަމެއްވެސް އިސްލާމިކް މިނިސްޓްރީގެ ބެލުމުގެ ދަށަށް ބަދަލުކޮށްފަ މާލޭ އައު ސަހަރާގައި ތަޅުއަޅުވާފައެވެ. މި ބަދަލާއި ގުޅިގެން ރައްޔިތުން ދަނީ ކަންބޮޑުވުން ފާޅުކުރަމުނެވެ.
