ސަފާރީ ރޭޕް ކޭސްގައި އަނިޔާ ލިބުނު މީހާ އާޒިމާ ޝަކޫރާ އެއްވެސް މުއާމަލާތެއް ނުކުރޭ: ވަކީލުން
މެންދުރު އޮންލައިން އިން ހަދަނީ ކަނޑައެޅިގެން ދޮގެއް ކަމަށް ވިދާޅުވި
ކުރީގެ ބަންޑާރަނައިބް އާޒިމާ ޝަކޫރް- އާޒިމާވެސް ވަނީ މެންދުރު އޮންލައިންއަށް މައުލޫމާތު ނުދެއްވާކަމަށް ވިދާޅުވެފައި
ހުޅުމާލެ ކައިރީ އަޅާފައި އޮތް ސަފާރީއަކަށް ދިޔަ ބިދޭސީ އަންހެނަކަށް ޖިންސީ ގޯނާ ކުރި މައްސަލައިގައި އަނިޔާ ލިބުނު މީހާ ކުރީގެ ބަންޑާރަނައިބް އާޒިމާ ޝަކޫރާ މުއާމަލާތު ކުރިކަމަށް ބުނާ ޚަބަރު އަނިޔާ ލިބުނު މީހާގެ ޤާނޫނީ ޓީމުން ދޮގުކޮށްފިއެވެ.
މި ހާދިސާގައި އަނިޔާ ލިބުނު ކެންޔާ އަންހެންމީހާގެ ވަކީލުންގެ ޓީމުން ނެރުނު ބަޔާނެއްގައި ބުނީ، އޭނާއަށް ދިމާވި ކަންކަން ކުރީގެ ބަންޑާރަ ނައިބާ ހިއްސާ ކޮށްފައިވާ ކަމަށް ބުނެ، މެންދުރު އޮންލައިން ކިޔާ ނޫހަކުން ނެރުނު ބަޔާނުގައި ވަނީ ސައްޙަ ނޫން މައުލޫމާތުތަކެއް ކަމަށެވެ. އެގޮތުން އާޒިމާ އަކީ އޭނާ ދަންނަ ފަރާތެއް ނޫން ކަމަށާއި، އެއްވެސް އިރެއްގައި އާޒިމާއާއެކު އެއްވެސް މުއާމަލާތެއް ހިންގާފައި ނުވާ ކަމަށް ބަޔާން ކޮށްފައިވެއެވެ.
ރޭޕް ކޭސްގެ މައްސަލައިގައި މެންދުރު އޮންލައިންގައި ޝާޢިއު ކޮށްފައިވާ ލިޔުމަކީ އާޒިމާ ދެއްވި މައުލޫމާތުގެ މައްޗަށް ބިނާކޮށް ލިޔެފައިވާ ލިޔުމެއް ކަމަށް އެއޮންލައިންއިން ބުނުމާއި ގުޅިގެން އެއަށް އާޒިމާ ވެސް ވަނީ ރައްދު ދެއްވާފައެވެ. އެގޮތުން އާޒިމާ ވިދާޅުވީ، މެންދުރު އޮންލައިން އިން ހަދަނީ ކަނޑައެޅިގެން ދޮގެއް ކަމަށެވެ.
އަދި އެފަދަ އެއްވެސް ނޫހަކާއި ވާހަކަ ދައްކާފައި ނުވާނެ ކަމަށާއި މި މައްސަލައިގައި ޤާނޫނީ ފިޔަވަޅު އަޅުއްވާނެ ކަމަށް އާޒިމާ ވިދާޅުވިއެވެ.
އާޒިމް އިތުރަށް ވިދާޅުވެފައި ވަނީ މެންދުރު އޮންލައިންއަށް އެކަމަނާ މައުލޫމާތު ދެއްވިނަމަ ދެއްވި ގޮތަކާއި ވާހަކަ ދެއްކި މީހަކު ހުންނަންވާނެ ކަމަށެވެ.
ރޭޕް ކޭސް އާ ގުޅޭގޮތުން އާޒިމާ މައުލޫމާތު ދެއްވި ކަމަށް ބުނެ މެންދުރު އޮންލައިންގެ ފަރާތުން ނެރެފައިވާ ނޫސް ބަޔާނެއްގައި ބުނެފައި ވަނީ އެ އޮންލައިންގެ ފަރާތަކަށް ކުރީގެ ބަންޑާރަ ނައިބުކަން ވެސް ކުރައްވާފައިވާ ބޭކަނބަލަކު ބޭރުގެ އަންހެން ކުއްޖެއް ސަފާރީ އެއްގައި ރޭޕް ކޮށްގެން އުޅޭ ކަމަށާއި އަދި މިވާހަކަ މެންދުރު އޮންލައިން އަށް ސީދާ ވިކްޓިމްގެ ފަރާތުން ގެނެސްދޭނެ ކަމަށް ބުނެ ވަރަށް އިތުބާރު ކުރެވޭ ގޮތަކަށް މަޢުލޫމާތު ދީފައިވާ ކަމަށެވެ.
އަދި ވިކްޓިމް ކަމަށް ބުނާ ފަރާތަކުން ފޯނު ދެމުވެރިކޮށް ކުޑައިރުކޮޅެއްވަންދެން ވާހަކަ ދެއްކުމަށްފަހު، ވިކްޓިމްއަށް މިވާހަކަތައް ކިޔައިދޭން ވަރަށް އުނދަނގޫވާނޭ ކަމަށް ބުނެ، ކަން ހިނގައިދިޔަ ގޮތުގެ ތަފްސީލު މެންދުރު އޮންލައިން އަށް ކިޔައިދިނީ ދިވެހިބަހުން ކުރީގެ ބަންޑާރަ ނައިބު އާޒިމާ ޝުކޫރު ކަމަށް ބަޔާނުގައި ވެއެވެ.
ނަމަވެސް މިފަހުން މެންދުރު އޮންލައިން އިން ބެލި ބެލުމުން އެނގިގެން ދިޔައީ، ސަފާރީގައި ހިނގާފައިވަނީ ރޭޕްގެ މައްސަލައެއް ނޫންކަމަށާއި މި މައްސަލަ ”ރޭޕް ކޭސް“ ގެ ގޮތުގައި، ބޮޑުކޮށްލީ މީގައި ސިޔާސީ ފަރާތްތަކަކާއި ގުޅުން ހުރި ބައެއް ތިބުމުން، މިކަން ސިޔާސީ ކޮށްލުމަށްޓަކައި އެ ނިޔަތުގައިކަން މެންދުރު އޮންލައިން އަށް ކަށަވަރުވެފައިވާ ކަަމަށް އެ އޮންލައިނުން ބުނެއެވެ.
އެހެންކަމުން މެންދުރު އޮންލައިން އަށް ބޮޑުއޮޅުވާލުމެއް އޮޅުވާލާ އަދި މެންދުރު އޮންލައިން މިފަދަ ސިޔާސީ ކަމެއްގައި ޖައްސާ އަދި ގަންބުވާލާފައިވާތީ، ވިކްޓިމްގެ ކިބައިންނާއި އަދި މި މައްސަލައިގައި ހިމެނޭ އެންމެހައި ފަރާތްތަކުންނާއި އަދި އާންމު ރައްޔިތުންގެ ކިބައިން މާފަށް އެދޭ ކަމަށް ބަޔާނުގައި ވެއެވެ.
މި މައްސަލާގައި ވިކްޓިމްއާ ހަވާލާދީ ފުލުހުން ބުނެފައިވަނީ މެންދުރު އޮންލައިންއަށް އޭނާ އެއްވެސް މައުލޫމާތެއް ދީފައި ނުވާ ކަމަށެވެ.
