ބިދޭސީންނަކީ ގައުމީ ސަލާމަތަށް އޮތް ނުރައްކަލެކޭ ބުނަނީ ފޭލްވެފައި އޮތް ނިޒާމެއް ފޮރުވަން: ހިއުމަން ރައިޓްސް ވޮޗް
24 ޖުލައި 2020 | ހުކުރު 07:06ހައްޔަރުކޮށްފައި ތިބި ބިދޭސީން ދޫކޮށްލަން ގޮވާލި
ރާއްޖޭގައި މަސައްކަތްކުރާ ބިދޭސީންތަކެއް
ރާއްޖޭގައި ބިދޭސީންގެ މައްސަލަ ގޮސްފައި އޮތް ހިސާބަކީ ގައުމީ ސަލާމަތަށް ނުރައްކާވާ ހިސާބަށް ގޮސް އޮތް މައްސަލައެއް ކަމަށް ސަރުކާރުގެ މަތީ ފަންތީގެ ބޭފުޅުން ވިދާޅުވަނީ، ފެއިލްވެފައިވާ ނިޒާމު ފޮރުވަން ވެގެން ކަމަށް ހިއުމަން ރައިސްޓްސް ވޮޗް (އެޗްއާރްޑަބްލިއު) އިން ތުހުމަތު ކޮށްފިއެވެ.
ބިދޭސީންނަކީ ރާއްޖޭގެ ގައުމީ ސަލާމަތަށް އޮތް ނުރައްކަލެއްގެ ގޮތުގައި ކަނޑައަޅާފައިވާ ކަމަށް ރައްޔިތުންގެ މަޖިލީހުގެ ގައުމީ ސަލާމަތާއި ހާރިޖީ ގުޅުންތަކުގެ ކޮމިޓީގައި ޗީފް އޮފް ޑިފެންސް މޭޖަރ ޖެނެރަލް އަބްދުﷲ ޝަމާލް ވަނީ ވިދާޅުވެފައެވެ. ޝަމާލް ސިފަކުރައްވާ ގޮތުގައި ރާއްޖެއިން ފެންނަނީ އަސްކަރީ ބާރަަކުން ގައުމެއް ހިފުމުން ފެންނަ މަންޒަރެވެ.
ބިދޭސީންނާ މެދު ރާއްޖެއިން ކަންތައްކުރަމުންދާ ގޮތާއި މެދު ކަންބޮޑުވުން ފާޅުކުރަމުން އެޗްއާރްޑަބްލިއު އިން ނެރުނު ބަޔާނެއްގައި އެ ޖަމިއްޔާއިން ވަނީ ހައްޔަރު ކޮށްފައި ތިބި ބިދޭސީންނަށް ދައުވާ ނުކުރުމަށް ގޮވާލާފައެވެ. އަދި އެ ބިދޭސީން މިހާރުން މިހާރަށް މިނިވަންކޮށް ބިދޭސީންނަށް ކުރިމަތިވާ މައްސަލަތަކަަށް ހައްލެއް ގެނައުމަށް ވެސް ގޮވާލާފައެވެ. އެ ޖަމިއްޔާގެ އޭޝިޔާގެ ޑިރެކްޓަރ ޕެޓްރީޝިއާ ގޮސްމަން ވިދާޅުވީ، ބިދޭސީން ކުރަމުންދާ މުޒާހަރާތައް ހުއްޓުވުމުގެ ބަދަލުގައި އެ އެމީހުންނަށް ދޭން ޖެހޭ އަސާސީ ހައްގުތައް ކަށަވަރު ކޮށްދޭން ޖެހޭ ކަމަށެވެ.
ރާއްޖޭގައި މަސައްކަތް ކުރަމުންދާ ބިދޭސީންނާ މެދު އަމަލުކުރަނީ ވަރަށް އިހާނެތި ގޮތަށް ކަމަށް އެޗްއާރްޑަބްލިއު އިން ބުންޏެވެ. ބިދޭސީންގެ ހައްގުތައް ރައްކާތެރިކޮށްދޭ އިންޓަނޭޝަނަލް ކޮންވެންޝަން އޮފް މައިގްރެންޓް ވޯކާސް އާއި އިންޓަނޭޝަނަލް ލޭބަރ އޯގަނައިޒޭޝަންގެ 2014، ޕްރޮޓްކޯލް ޓު ދަ ފޯސް ލޭބަރ ކޮންވެންޝަން އަށް ސަރުކާރުން އަމަލުކުރަން ޖެހޭ ކަމަށް އެޖަމިއްޔާގެ ބަޔާނުގައި ގޮވާލިއެވެ.
އެމެރިކާގެ ސްޓޭޓް ޑިޕާޓްމެންޓުން ނެރޭ ޓްރެފިކިން އިން ޕަރސަން ރިޕޯޓްގެ ޖޫން މަހުގެ އެޑިޝަންގައި ރާއްޖެ ހިމަނާފައިވަނީ ''ޓަޔަރ 2 ވޮޗް ލިސްޓް'' ގައެވެ. އެއީ ވަގުފާރި ކުރުމާއި، ގަދަކަމުން މަސައްކަތް ކުރުވަން މަޖްބޫރު ކުރުވުމާއި، އޮޅުވާލައިގެން ބިދޭސީން އެތެރެކުރާ ކަމުގެ ތުހުމަތުތަކާއި އެކުއެވެ.
ގޮސްމަން ވިދާޅުވީ، ބިދޭސީންގެ ވަގުފާރި ނިމުމަކަށް ގެނެސް ބަސް ބުނުމުގެ މިނިވަންކަން ފަހިކޮށްދީ، ބިދޭސީ މަސައްކަތްތެރިން ތިބޭނެ ތަނަކާއި، އެމީހުންނަށް ސިއްހީ ނިޒާމުގެ އިތުރުން އަސާސީ މުސާރާ ލިބޭތޯ ސަރުކާރުން ކަަށަވަރު ކުރަން ޖެހޭ ކަމަށެވެ.
