ރައީސް ޔާމީންގެ ސަރުކާރުން ސޮއިކުރި އެއްބަސްވުމުގެ ދަށުން އިންޑިއާއިން މަތިންދާ ބޯޓެއް ދޭން ނިންމައިފި
މަތިންދާ ބޯޓު ރާއްޖެއަށް ފޮނުވުމުގެ މަސައްކަތް ކުރިއަށްދާ ކަމަށްވޭ
ކުރީގެ ރައީސުލްޖުމްހޫރިއްޔާ އަބްދުﷲ ޔާމީން އާއި އިންޑިއާގެ ބޮޑުވަޒީރު ނަރެންދްރަ މޯދީ
ކުރީގެ ރައީސުލްޖުމްހޫރިއްޔާ އަބްދުﷲ ޔާމީންގެ ވެރިކަމުގައި 2016 ވަނަ އަހަރުގެ އެޕްރީލް މަހު އެމަނިކުފާނު އިންޑިއާއަށް ކުރެއްވި ފުރަމާނަ ދަތުރުފުޅުގައި ރާއްޖެއާ އިންޑިއާ އާދެމެދު ސޮއިކުރެވުނު ޑިފެންސް އެކްޝަން ޕްލޭންގައި ހިމެނޭ ޑޯނިއަރ އެއާކްރާފް ރާއްޖެއަށް ދިނުމަށް އިންޑިއާއިން ނިންމައިފިއެވެ.
ރާއްޖެ.އެމްވީ އަށް މައުލޫމާތު ލިބިފައިވާ ގޮތުގައި ރައީސް ޔާމީންގެ އެ ދަތުރުފުޅަށްފަހު 2016 ވަނަ އަހަރުގެ ޖުލައި މަހު އިންޑިއާއާއި ދިވެހިރާއްޖެއާ ދެމެދު ބޭއްވުނު ޑިފެންސް ކޯޕަރޭޝަން ޑައިލޮގްގެ ތެރޭގައި ދިވެހި ސަރުކާރުން ވަނީ އެ މަތިންދާ ބޯޓު ހޯދުމާ ގުޅޭ އިތުރު މަޝްވަރާތައް އިންޑިއާ ސަރުކާރާ އެކުކޮށް، މަތިންދާ ބޯޓު އަވަހަށް ރާއްޖެއަށް ގެނައުމާ ގުޅޭ މަޝްވަރާތައް ބާއްވާފައެވެ. އެ މަޝްވަރާތަކަށްފަހު ރާއްޖެއަށް ދޭނެ މަތިންދާ ބޯޓެއް ހަމަޖައްސައި، މަތިންދާ ބޯޓު ރާއްޖެއަށް ފޮނުވުމުގެ މަސައްކަތް މިހާރު ކުރިއަށްދާކަމަށް އެނގިފައިވެއެވެ.
އެނގިފައިވާ ގޮތުގައި މި އެއަރކްރާފްޓް ވެސް ބޭނުންކުރާނީ ރާއްޖޭގެ ކަނޑުގެ ސަރަހައްދު ޕެޓްރޯލް ކުރުމަށާއި، ރާއްޖޭގެ ސަރަހައްދީ އިމުގެ އެތެރޭގެ ސަލާމަތާއި ރައްކާތެރިކަން ކަށަވަރު ކުރުމުގެ އިތުރުން ސާޗް އެންޑް ރެސްކިއު އޮޕަރޭޝަންތަކުގައެވެ. އަދި މަތިންދާ ބޯޓު ދުއްވާނީ ރާއްޖޭގެ ޕައިލެޓުންނާއި އިންޑިއާ ޕައިލެޓުންނެވެ. މީގެ އިތުރުން މި މަތިންދާބޯޓުގެ މެއިންޓަނަންސް މަސައްކަތް ކުރުމަށް ސިފައިންގެ އިންޖިނިއަރުން އިންޑިއާއިން ތަމްރީނު ކުރުމަށް ދިވެހި ސަރުކާރުން ހުށަހަޅާފައިވާ ކަމަށާއި، އިންޖިނިއަރުން ތަމްރީންކުރުމަށް އިންޑިއާ ސަރުކާރުން ފެހި ސިގްނަލް ދީފައިވާ ކަމަށް ވެސް މައުލޫމާތު ލިބެއެވެ.
