މިވަގުތު ވިސްނުން ހުރީ ޗެމްޕިއަންސް ލީގަށް: ގާޑިއޯލާ

އަންނަ ސީޒަނަށް ވިސްނަން އަދި އަވަސް ކަމަށާއި، މިވަގުތު ވިސްނުން ހުރީ ޔުއެފާ ޗެމްޕިއަންސް ލީގަށް ކަމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނެފިއެވެ.

ސިޓީއަށް މި ސީޒަނުގެ އިނގިރޭސި ޕްރިމިއާ ލީގު ދެވަނައިގައި އޮވެ ނިންމާލަން ޖެހިފައިވާއިރު، އެޓީމު ވަނީ އެފްއޭ ކަޕްގެ ސެމީފައިނަލްގައި އާސެނަލް އަތުން ބަލިވެ މުބާރާތުން ކަޓާފައެވެ.

ގާޑިއޯލާ ބުނީ އަންނަ ސީޒަނަށް ތައްޔާރުވާން އަދި އަވަސް ކަމަށާއި، ސިޓީއަށް ޔޫރަޕްގެ އެންމެ ބޮޑު މުބާރާތް ކާމިޔާބު ކުރުމަށް ފުރުސަތު މި ސީޒަނުގައި އެބައޮތް ކަމަށެވެ. އެހެންކަމުން ސިޓީގެ ވިސްނުން މިވަގުތު ހުރީ ޗެމްޕިއަންސް ލީގުގެ ދެވަނަ ބުރުގައި ސްޕެނިޝް ލީގުގެ ޗެމްޕިއަން ރެއާލް މެޑްރިޑާ ދެކޮޅަށް ވާދަކުރާ މެޗަށް ކަމަށް ގާޑިއޯލާ ބުންޏެވެ.

އަދި އަންނަ ސީޒަނަށް ސިޓީ ވިސްނާނީ ޗެމްޕިއަންސް ލީގު ނިމުމުން ކަމަށާއި، ޗެމްޕިއަންސް ލީގުގެ ދެވަނަ ބުރުގެ ފުރަތަމަ ލެގުން ސިޓީ މޮޅުވެފައި އޮތުމަކީ ދެވަނަ ލެގަށް ނުކުންނައިރު ލިބޭ ބޮޑު ފައިދާއެއް ކަމަށް ގާޑިއޯލާ ބުންޏެވެ.

ސިޓީގައި މިވަގުތު އޮތް ސްކޮޑަކީ ރެއާލް ބަލި ކުރެވޭނެ ވަރުގެ ސްކޮޑެއް ކަމަށާއި، މި މެޗު ވެގެންދާނީ ސިޓީ މިވަގުތު އޮތް ފޯމުން އަރައި ގަތުމަށް ލިބޭ ބޮޑު ހިތްވަރެއް ކަމަށްވެސް ގާޑިއޯލާ ބުންޏެވެ.

އަންނަ އޮގަސްޓް މަހު ޗެމްޕިއަންސް ލީގު އަލުން ފަށާއިރު، ސިޓީން ވަނީ ދެވަނަ ބުރުގެ ފުރަތަމަ ލެގުގައި ރަށުން ބޭރުގައި 2-1 ން ރެއާލް ބަލިކޮށްފައެވެ.

ޗެމްޕިއަންސް ލީގުގައި ރެއާލުން ސިޓީއާ ދެކޮޅަށް ނުކުންނައިރު، ރެއާލުން ވަނީ ކޮވިޑް-19 ގެ ބްރޭކަށްފަހު ކުޅުނު 10 މެޗުންވެސް މޮޅުވެ، މި ސީޒަނުގެ ސްޕެނިޝް ލީގު ކާމިޔާބުކޮށްފައެވެ. އެއާ ޚިލާފަށް ގާޑިއޯލާގެ ސިޓީން އަންނަނީ މި ފަހަކަށް އައިސް ދަށް ކުޅުމެއް ދައްކަމުންނެވެ. އެގޮތުން އެފްއޭ ކަޕުން ސިޓީ ކެޓިއިރު، އިނގިރޭސި ޕްރިމިއާ ލީގުގައި ސިޓީ ވަނީ މި މަހުގެ ކުރީކޮޅު ސައުތެމްޓަން އަތުން ބަލިވެފައެވެ.

އޮގަސްޓް މަހު ޗެމްޕިއަންސް ލީގު އަލުން ފަށާއިރު، ދެވަނަ ބުރުގެ ދެވަނަ ލެގުގައި އަމިއްލަ ދަނޑުގައި ސިޓީ ކުޅޭ މެޗު އޮގަސްޓް މަހުގެ އަށްވަނަ ދުވަހަށް ވަނީ ތާވަލުކޮށްފައެވެ.