ކ. މާލެ
|
20 ޖުލައި 2020 | ހޯމަ 19:28
ވޭލްސްގެ ފޯވާޑް ގެރެތު ބޭލް: އޭނާ ވަނީ ރެއާލާއެކު ކާމިޔާބު ސީޒަންތަކެއް ހޭދަކޮށްފައި
ވޭލްސްގެ ފޯވާޑް ގެރެތު ބޭލް: އޭނާ ވަނީ ރެއާލާއެކު ކާމިޔާބު ސީޒަންތަކެއް ހޭދަކޮށްފައި
ގެޓީ އިމޭޖަސް
ގެރެތު ބޭލްގެ ކުރިމަގު
ރެއާލްގައި ބޭލް މަޑުކުރާނެ: އޭޖެންޓް
 
"ބޭލް އަކީ ރެއާލަށް މުހިންމު ކުޅުންތެރިއެއް"
 
"ބޭލް އާއި ޒިދާނާ ދެމެދު އެއްވެސް މައްސަލައެއް ނެތް"

ވޭލްސްގެ ފޯވާޑް ގެރެތު ބޭލް ރެއާލް މެޑްރިޑުގައި މަޑކުރާނެ ކަމަށް އޭނާގެ އޭޖެންޓް ޖޮނަތަން ބާނެޓް ބުނެފިއެވެ.

މި ފަހަކަށް އައިސް ރެއާލްގެ ފުރަތަމަ އެގާރައިން ބޭލްއަށް ޖާގައެއް ނުލިބެއެވެ. ރެއާލަށް 2013 ވަނަ އަހަރުގެ ސީޒަނުގައި ބަދަލުވި ބޭލް، އެ ކްލަބާއެކު ހަދާފައިވާ އެއްބަސްވުން ވަނީ 2022 ގެ ނިޔަލަށް އާކޮށްފައެވެ.

ބޭލްގެ އޭޖެންޓް ބާނެޓް ބުނީ ބޭލް އަކީ ލޯނަށް އެހެން ކްލަބަކަށް ބަދަލުވާނެ ކުޅުންތެރިއެއް ނޫން ކަމަށާއި، އޭނާ އަންނަ ސީޒަނުގައި ވެސް ފެންނާނީ ރެއާލްގެ ސްކޮޑުން ކަމަށެވެ. އަދި ރެއާލާއެކު ބޭލް ހަދައިފައިވާ އެއްބަސްވުމުގައި ބާކީ ދެއަހަރު އެބައޮތް ކަމަށާއި، ބޭލް ރެއާލްގައި ހުރީ ހިތްހަމަޖެހިގެން ކަމަށްވެސް ބުންޏެވެ.

ރެއާލުން ސްޕެނިޝް ލީގުގައި އެންމެ ފަހުން ލެގަނޭސް އާއި ދެކޮޅަށް ކުޅުނު މެޗަށް އެކުލަވާލި ސްކޮޑުގައި ބޭލް ހިމަނާފައިނުވި ނަމަވެސް، ރެއާލްގެ ކޯޗު ޒިނެދިން ޒިދާން ވަނީ ބޭލް އަކީ ރެއާލަށް މުހިންމު ކުޅުންތެރިއެއް ކަމަށް ބުނެފައެވެ.

ބޭލްގެ އޭޖެންޓް ބާނެޓް ބުނީ ރެއާލްގެ ކޯޗު ޒިނެދިން ޒިދާނާއި ބޭލްއާ ދެމެދު މައްސަލައެއް ޖެހިފައިނުވާ ކަމަށާއި، ޒިދާން އަކީ ބޭލް އިހުތިރާމުކުރާ ކޯޗެއް ކަމަށެވެ.

މި ފަހުން ރެއާލުން ކުޅުނު ހަ މެޗުގައި ވެސް ބޭލްއަށް ކުޅުމުގެ ފުރުސަތު ލިބިފައި ނުވާއިރު، އޭނާ ބެންޗުގައި އިނދެ ނިދުމުގެ އިތުރުން މި ނޫންވެސް އެކިއެކި ކަންކަން ކުރަމުން އަންނާތީ ރެއާލްގެ ސަޕޯޓަރުން އަންނަނީ ފާޑު ކިޔަމުންނެވެ. ބޭލް މައްސަލައިގައި ރެއާލްގެ ސަޕޯޓަރުންވެސް ވަނީ އޭނާ ރެއާލް ދޫކޮށްލުމަށް ގޮވާލާފައެވެ.

މި ސީޒަނުގައި ބޭލް ރެއާލްގެ ޖާޒީގައި ފެނިގެން ގޮސްފައިވަނީ އެންމެ 14 މެޗުގައެވެ. މީގެ ކުރިން ރެއާލްގައި ބޭލް މޮޅު ކުޅުމެއް ދެއްކިއިރު، އޭނާ ވަނީ ރެއާލްއާއެކު ޖުމްލަ 12 ތަށި ހޯދާފައެވެ. އަދި ވަނީ ރެއާލްއަށް ކުޅެދިން 251 މެޗުގައި 105 ލަނޑު ކާމިޔާބުކޮށްފައެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: އިސްމާޢީލް ޝާހް
33%
67%
0%
0%
0%
0%
ކޮމެންޓް