މޯލްޑިވްސް އޮލިމްޕިކް ކޮމިޓީ (އެމްއޯސީ) ގެ ފަރާތުން ބ. ގޮއިދުއަށް ހަދިޔާކުރި ސްކޭޓް ޕާކުގެ އަމަލީ މަސައްކަތް އަދިވެސް ނުފެށޭ ކަމަށް އެ ރަށު ކައުންސިލުން ބުނެފިއެވެ.

ގޮއިދޫގައި 2018 ވަނަ އަހަރުގެ އޭޕްރީލް މަހު ބޭއްވި އެމްއޯސީގެ އަހަރީ އާންމު ޖަލްސާގައި ވަނީ ގޮއިދޫގެ ރައްޔިތުންނަށް ސްކޭޓް ޕާކެއް ހަދިޔާކުރާނެކަން އިއުލާން ކޮށްފައެވެ. އަދި އެ ޖަލްސާއަށް ފަހު އެ ކޮމިޓީން ވަނީ އެ ރަށުގެ ބަނދަރުމަތީގައި ޕާކް އެޅުމަށް ހާއްސަކުރެވިފައިވާ ސަރަހައްދުގައި ޕާކުގެ ބިންގާ ވެސް އަޅާފައެވެ.

ގޮއިދޫ އާއި އޮލިމްޕިކް ކޮމިޓީއާ ދެމެދު އޮތް ގާތް ގުޅުން ދައްކުވައިދިނުމުގެ ގޮތުން "ގޮއިދޫ އޮލިމްޕިކް ސްކޭޓް ޕާކު" ގެ ނަމުން ނަންދޭން ނިންމާފައިވާ މި ޕާކްގެ ބިންގާ އަޅުއްވައިދެއްވީ އެ ފަހަރުގެ އަހަރީ އާންމު ޖަލްސާގެ ޝަރަފުވެރި މެހުމާން ޑރ. މުހައްމަދު ޒާހިރު ހުސައިން އާއި އޮލިމްޕިކް ކޮމިޓީގެ ހިންގާ ކޮމިޓީގެ މެމްބަރުންގެ އިތުރުން ގޮއިދޫގެ ކައުންސިލްގެ ފަރާތުން ހަތަރު ބޭފުޅެކެވެ.

ރާއްޖެ.އެމްވީއަށް މައުލޫމާތު ދެއްވަމުން ގޮއިދޫ ކައުންސިލްގެ ރައީސް މުޙައްމަދު އާމިރު ވިދާޅުވީ މިހާތަނަށް އައިރު ސްކޭޓް ޕާކުގެ އެއްވެސް މަސައްކަތެއް ފެށިފައި ނުވާ ކަމަށެވެ. އަދި އެމްއޯސީން ދާދި ފަހުން ސްކޭޓް ޕާކުގެ ވާރކް ޕްލޭން ހުށަހެޅުމަށް ކައުންސިލްގައި އެދިފައިވާ ކަމަށާއި، އެހެންކަމުން ވާރކް ޕްލޭން އެކުލަވާލުމުގެ މަސައްކަތް މިހާރު ކުރިއަށްދާ ކަމަށް ވެސް ވިދާޅުވިއެވެ.

މިކަމާ ގުޅިގެން އެމްއޯސީގެ ޖެނެރަލް ސެކްރެޓަރީ އަޙްމަދު މަރުޒޫގް (މަރޭ) ވިދާޅުވީ ގޮއިދޫ ކައުންސިލާ ގުޅިގެން ސްކޭޓް ޕާކުގެ މަސައްކަތް ކުރިއަށްދާ ކަމަށާއި، ވޯކް ޕްލޭން ލިބުނުހާ އަވަހަކަށް އަމަލީ މަސައްކަތް ފެށިގެންދާނެ ކަމަށެވެ. އަދި 2021 ވަނަ އަހަރު މަސައްކަތް އެއްކޮށް ނިންމާލެވޭނެ ކަމަށް ވެސް މަރޭ ވިދާޅުވިއެވެ.

އެމްއޯސީގެ އެހީއާއެކު ގައޮދޫގައި އެޅުމަށް ހަމަޖައްސާފައިވަނީ 2،500 އަކަފޫޓުގެ ޕާކެކެވެ. ގޮއިދުއަކީ ލިބިފައިވާ މަދު ވަސީލަތްތަކާއެކު ހުނަރިވެރި ސްކޭޓަރުން ތިބި ރަށެކެވެ. އެގޮތުން އެ ރަށުގެ މަސްވެރިން މަސް ކެނޑުމަށް ބަނދަރުމަތީގައި އަޅާފައިވާ ތަޅުން ގަނޑު މަތީގައި އެ ރަށުގެ ސްކޭޓަރުން އަންނަނީ ލަކުޑިން ހަދާފައިވާ ރޭމްޕާއެކު ފަރިތަކުރަމުންނެވެ.