ޖެހިޖެހިގެން ދެ ވަނަ ދުވަހު ރިކޯޑް އަދަދަކަށް މީހުންނަށް ކޮވިޑް-19 ޖެހިއްޖެ

ޖެހިޖެހިގެން ދެ ވަނަ ދުވަހު ރިކޯޑް އަދަދަކަށް މީހުންނަށް ކޮވިޑް-19 ޖެހިފައިވާކަމަށް ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ) އިން ބުނެފި އެވެ.

ފާއިތުވި 24 ގަޑިއިރު ތެރޭގައި މުޅި ދުނިޔެއިން 259،848 (ދެ ލައްކަ ފަންސާސް ނުވަ ހާސް އަށް ސަތޭކަ ސާޅީސް އަށް) މީހުންނަށް ކޮވިޑް-19 ވަނީ ޖެހިފަ އެވެ.

ހޮނިހިރު ދުވަހު އެންމެ ގިނަ މީހުންނަށް ވައިރަސް ޖެހިގެން ރިޕޯޓްކޮށްފައި ވަނީ އެމެރިކާ، ބްރެޒިލް، އިންޑިޔާ އަދި ދެކުނު އެފްރިކާއިންނެވެ. އެއީ އެމެރިކާ އިން 71،483 މީހުންނާއި، ބްރެޒިލްއިން 45,403 މީހުންނަށް އަދި އިންޑިޔާއިން 34,884 މީހުންނެވެ. އަދި ދެކުނު އެފްރިކާއިން 13,373 މީހުންނެވެ.

ހުކުރު ދުވަހު ވަނީ މުޅި ދުނިޔެއިން 237،743 (ދެ ލައްކަ ތިރީސް ހަތް ހާސް ހަތްސަތޭކަ ސާޅީސް ތިން) މީހުންނަށް ވައިރަސް ޖެހިފަ އެވެ. އެދުވަހު ވައިރަސް ޖެހިގެން މަރުވެފައިވާ މީހުންގެ އަދަދުވެސް ވަނީ މަތިވެފަ އެވެ. އެއީ 7360 މީހުންނެވެ. މިއީ މެއި މަހުގެ 10 ވަނަ ދުވަހުގެ ފަހުން ވައިރަސް ޖެހިގެން އެއް ދުވަހާ އެންމެ ގިނަ މީހުން މަރުވެގެން ރިޕޯޓްކުރި ދުވަސްވެސް މެއެވެ. ޖުލައި މަހު އާންމުކޮށް ދުވާލެއްގެ ތެރޭ ވައިރަސްޖެހިގެން މަރުވެފައިވަނީ 4800 މީހުންނެވެ. ޖޫން މަހު އެއަދަދު އުޅުނީ 4600 ގައެވެ.

މުޅި ދުނިޔޭގައި ވައިރަސް ޖެހިފައިވާ މީހުންގެ އަދަދު 14 މިލިއަނަށް އަރާފައިވަނީ ހުކުރު ދުވަހު އެވެ. ވައިރަސް ދުނިޔޭގައި ފެތުރެން ފެށިތާ ހަތް މަސްވެފައިވާއިރު މިހާތަނަށް އައިއިރު ހަ ލައްކަ މީހުން ވަނީ ވައިރަސްޖެހިގެން މަރުވެފަ އެވެ.

ދުނިޔޭގައި ތިން ވަނަ އަށް އެންމެ ގިނަ މީހުންނަށް ވައިރަސް ޖެހޭ ގައުމަކަށް އިންޑިޔާ ވެގެން ދިޔައީ ހުކުރު ދުވަހު އެވެ. އަދި ދެ މިލިއަން މީހުންނަށް ވައިރަސް ޖެހިގެން ބްރެޒިލް އިން ރިޕޯޓް ކުރީ ބުރާސްފަތި ދުވަހު އެވެ. އެމެރިކާއިން 3.7 މިލިއަން މީހުންނަށް ވަނީ މިހާތަނަށް އައިއިރު ކޮވިޑް-19 ޖެހިފަ އެވެ.

މީގެކުރިން ރިކޯޑް އަދަދަކަށް މީހުންނަށް ވައިރަސް ޖެހިގެން ރިޕޯޓްކުރީ ޖުލައި މަހުގެ 12 ވަނަ ދުވަހު އެވެ. އެއީ 230،370 (ދެ ލައްކަ ތިރީސް ހާސް ތިން ސަތޭކަ ހަތްދިހަ) މީހުންނެވެ. އޭގެކުރިން ޖުލައި މަހުގެ 10 ވަނަ ދުވަހު 228،102 (ދެ ލައްކަ އަށާވީސް ހާސް ސަތޭކަ ދެ) މީހުންނަށް ވައިރަސް ޖެހިގެން ރިކޯޑް ކޮށްފައިވެ އެވެ. އަދި ޖުލައި މަހުގެ 5 ވަނަ ދުވަހު 212,326 (ދެ ލައްކަ ބާރަހާސް ތިން ސަތޭކަ ސައްބީސް) މީހުންނަށް އެއްދުވަހާ ވައިރަސް ޖެހިގެން ވަނީ ރިޕޯޓްކޮށްފަ އެވެ.