ސަފާރީ ރޭޕް ކޭހާއި އަލީ ވަހީދުގެ މައްސަލައިގެ މައުލޫމާތު މިއަދު ހާމަކުރަނީ
އަލީ ވަހީދު އަށް ތުހުމަތު ކުރެވެނީ މުވައްޒަފުންނަށް ޖިންސީ ގޯނާކުރި ކަމުގެ ތުހުމަތުތަކެއް
ފުލުހުންގެ އިސްވެރިކަންތަކެއް ބޭއްވި ބައްދަލުވުމެއްގެ ތެރެއިން
ހުޅުމާލޭގައި އަޅާފައި އޮތް ސާފާރީއެއްގައި ހުރި އަންހެނަކު ''ރޭޕްކުރި'' މައްސަލަ އާއި ކުރީގެ ޓޫރިޒަމް މިނިސްޓަރު އަލީ ވަހީދު މުވައްޒަފުންތަކަކަށް ޖިންސީ ގޯނާކުރި މައްސަލައިގެ މައުލޫމާތު ހާމަކުރަން ހާމަކުރަން ޕްރެސް ކޮންފަރެންސެއް ބާއްވާން ނިންމައިފިއެވެ.
ފުލުހުން ބުނީ، ނޫސްވެރިންގެ ބައްދަލުވުން އޮންނާނީ ބުރާސްފަތި ދުވަހު މެންދުރު 13:00 ގައި އިސްކަންދަރު ކޮށީގައި ކަމަށެވެ. މި ދެ މައްސަލައިގެ މައުލޫމާތު ދެއްވާނީ ޑެޕިއުޓީ ކޮމިޝަނަރ އޮފް ޕޮލިސް އަބްދުލް މަންނާނު ޔޫސުފް އާއި ޗީފް ސްޕްރިންޑެންޓް އޮފް ޕޮލިސް މުހައްމަދު ބަޝީރުގެ އިތުރުން ޗީފް އިންސްޕެކްޓަރ މަރިޔަމް އަޒްމާއެވެ.
ޖޫން މަހުގެ 25 ވަނަ ދުވަހުގެރޭ ހުޅުމާލޭ ފަޅުގައި އަޅާފައި އޮތް ސަފާރީއެއްގައި ހުރި އަންހެނަކު ރޭޕްކުރި މައްސަލާގައި ދެ ފިރިހެނަކު ހައްޔަރު ކުރިއެވެ. އެކަމަކު މާގިނަ އިރުތަކެއް ނުވަނީސް އެމީހުން ދޫކޮށްލުމުން އާއްމުންގެ ބޮޑެތި ފާޑުކިޔުންތަކެއް ވަނީ ފުލުހުންނަށް އަމާޒުވެފައެވެ. އެ މީހުން ދޫކޮށްލުމުގައި ސިޔާސީ ނުފޫޒުތަކެއް އޮތް ކަމުގެ ވާހަކަތައް ދަނި ދެކެވެމުންނެވެ.
ޓޫރިޒަމް މިނިސްޓަރު އަލީ ވަހީދު އެ މިނިސްޓްރީގެ މުވައްޒަފުންތަކަކަށް ޖިންސީ ގޯނާކުރި ކަމުގެ މައްސަލަތަކެއް އެ މުވައްޒަފުން ރައީސް އިބްރާހިމް މުހައްމަދު ސޯލިހު އަރިހަށް ގެންދެވުމުން ވަޒީރު ކަމުގެ މަގާމުން އަލީ ވަހީދު ވަނީ ވަކިކޮށްފައެވެ.
މި ދެ މައްސަލައާ ގުޅިގެން ސަރުކާރަށް ގިނަ ފާޑުކިޔުންތަކެއް އަމާޒުވެފައިވާއިރު، ބައެއް ފަރާތްތަކުން ވަނީ މި ދެ މައްސަލައިގައި ޝާމިލްވާ ފަރާތްތައް ހައްޔަރު ކުރުމަށް ގޮވާލާފައެވެ
