މި ސީޒަނުގެ ސްޕެނިޝް ލީގު ކާމިޔާބުކުރުމާ ފިޔަވަޅަކާ ގާތަށް ޖެހިލާފައިވާ ރެއާލް މެޑްރިޑުން، އުފާފާޅު ކުރުމަށް މަގުތަކަށް އެއްނުވުމަށް ސަޕޯޓަރުންގެ ކިބައިން އެދިއްޖެއެވެ.

ބުރާސްފަތި ދުވަހުގެރޭ ވިޔަރެއާލް ބަލިކޮށް ލީގު ޗެމްޕިއަންކަން ކަށަވަރުކުރުމުގެ ފުރުސަތު ރެއާލަށް އޮތް ނަމަވެސް، ސަޕޯޓަރުން މަގުތަކަށް އެއްނުވުމަށް ރެއާލުން އެދިފައިވަނީ ކޮވިޑް-19 ގެ ނުރައްކާ އަދިވެސް އޮތުމާއެކުގައެވެ.

ކޮވިޑް-19 އާ ގުޅިގެން ސްޕެއިނުން އަންނަނީ އިޖުތިމާޢީ ގައިދުރުކަން ހިފެހެއްޓުމަށް ހަރުކަށި ފިޔަވަޅުތަކެއް އަޅަމުންނެވެ.

ލީގު ޗެމްޕިއަންކަން ރެއާލަށް ކަށަވަރުވި ކަމުގައިވިޔަސް، ސަޕޯޓަރުން މަގުތަކަށް އެއްނުވުމަށް ގޮވާލާ ރެއާލުން ނެރުނު ބަޔާނުގައި ބުނެފައިވަނީ ސަޕޯޓަރުން ނުރައްކަލެއްގެ ތެރެއަށްލުން އެއީ ރެއާލުން ބޭނުންވާ ގޮތެއް ނޫން ކަމަށާއި، އެހެންކަމުން އުފާފާޅުކުރުމުގެ ގޮތުން ރެއާލްގެ ކުޅުންތެރިންނާއި މުވައްޒަފުންވެސް މަގުތަކަށް އެއްނުވާނެ ކަމަށެވެ. އެކަމަކު ކޮވިޑް-19 ގެ ހާލަތު ބަދަލުވިހާ އަވަހަށް ސަޕޯޓަރުންނަށް އުފާފާޅުކުރުމުގެ ގޮތުން ރެއާލްގެ ރަސްމީ ދަނޑު ސަންޓިއާގޯ ބާނަބައުގައި ހާއްސަ ހަރަކާތެއް ބާއްވާނެ ކަމަށްވެސް ރެއާލްގެ ބަޔާނުގައި ބުނެފައިވެއެވެ.

ރެއާލް މެޑްރިޑުން ސްޕެނިޝް ލީގު މިހާތަނަށް 33 ފަހަރު ކާމިޔާބުކޮށްފައިވާއިރު، ރެއާލްއަކީ ސްޕެނިޝް ލީގުގެ ތާރީޚުގައި އެންމެ ކާމިޔާބު ޓީމެވެ.

ސްޕެނިޝް ލީގުގެ ތާވަލުގެ އެއްވަނައިގައި ރެއާލް މިވަގުތު އޮތީ ކުޅުނު 36 މެޗުން ލިބުނު 83 ޕޮއިންޓާއެކުގައެވެ. ދެވަނައިގައި އޮތް ވާދަވެރި ބާސެލޯނާއަށް 36 މެޗުން ލިބިފައިވަނީ 79 ޕޮއިންޓެވެ.