ސިޓީގެ އަގު ވައްޓާލި މީހުން މާފަށް އެދެން ޖެހޭ: ގާޑިއޯލާ
15 ޖުލައި 2020 | ބުދަ 10:36ސީއޭއެސްއިން ވަނީ ސަސްޕެންޝަނުގެ މައްސަލަ ސިޓީއާ އެއްކޮޅަށް ނިންމާފައި
މެންޗެސްޓާ ސިޓީގެ ކޯޗު ޕެޕް ގާޑިއޯލާ
ޔުއެފާއިން ދިން ސަސްޕެންޝަނާއެކު މެންޗެސްޓާ ސިޓީގެ އަގު ވައްޓާލައި، ތަފާތު އެކި ގޮތްގޮތައް އެކަމާ ގުޅިގެން ވާހަކަ ދެއްކި މީހުން ސިޓީގެ ކިބައިން މާފަށް އެދެން ޖެހޭ ކަމަށް އެ ކްލަބުގެ ކޯޗު ޕެޕް ގާޑިއޯލާ ބުނެފިއެވެ.
ޔުއެފާއިން ސިޓީ ސަސްޕެންޑް ކުރީ ފައިނޭންޝިއަލް ފެއާ ޕްލޭ (އެފްއެފްޕީ) ގަވާއިދާ ޚިލާފުވީ ކަމަށް ބުނެއެވެ. އެކަމަކު ސިޓީން ވަނީ މި މައްސަލަ ކޯޓް އޮފް އާބިޓްރޭޝަން ފޯ ސްޕޯޓްސް (ސީއޭއެސް) ގައި އިސްތިއުނާފު ކޮށްފައެވެ. އަދި ސީއޭއެސް އިން ވަނީ އިސްތިއުނާފުގެ މައްސަލަ ސިޓީއާ އެއްކޮޅަށް ނިންމާ ޔުއެފާއިން ދިން އަދަބު އުވާލާފައެވެ.
ގާޑިއޯލާ ބުނީ ސިޓީގެ އަގު ވައްޓާލައި، ސިޓީއާ ދެކޮޅަށް ވާހަކަ ދެއްކި މީހުން މާފަށް އެދެން ޖެހޭނެ ކަމަށާއި، އިސްތިއުނާފުގެ މައްސަލަ ސިޓީއާ އެއްކޮޅަށް ނިމުމުން، އެއިން އެނގިގެންދަނީ ސިޓީގެ ކުށެއް ނެތްކަން ކަމަށެވެ. އަދި ސިޓީން ގޯސްކޮށް ކަމެއް ކޮށްފައިވާނަމަ، އެކަމުގެ އަދަބު އެ ކްލަބަށްވެސް ލިބެންޖެހޭނެ ކަމަށްވެސް ގާޑިއޯ ބުންޏެވެ.
ސިޓީގެ ސަސްޕެންޝަން އުވާލުމާ ގުޅިގެން ޓޮޓެންހަމްގެ ކޯޗު ހޯސޭ މޮރީނިއޯ އާއި ލިވަޕޫލްގެ ކޯޗު ޔާގެން ކްލޮޕް ވަނީ އެކަމާ ދެކޮޅަށް ވާހަކަ ދައްކާފައެވެ. އެ ދެ ކޯޗުން ބުނީ އެފްއެފްޕީ ގަވާއިދުގައިވާ ކަންތައްތަކާ އެއްގޮތަށް ކަންތައްތައް ހިނގާތޯ ބަލަން ޔުއެފާއިން ކުރާ މަސައްކަތް ބަލިކަށިކޮށް އޮތުމަކީ ބަލައިގަނެވޭނެ ކަމެއް ނޫން ކަމަށާއި، ގަވާއިދެއް ހެދިފައިވާނަަމަ އޭގެ ބާރެއް ނެތި ބޭނުން ބަޔަކަށް ވަކި އުސޫލުތަކެއްގެ ތެރެއިން ސަލާމަތްވެވޭނަމަ އެ ގަވާއިދެއްގެ ބޭނުމެއް ނެތް ކަމަށެވެ.
އިސްތިއުނާފުގެ މައްސަލަ ސިޓީއާ އެއްކޮޅަށް ނިމުމުން ސިޓީއަށް ވަނީ އަންނަ ސީޒަނުގެ ޔުއެފާ ޗެމްޕިއަންސް ލީގުގެ ޖާގައެއް ކަށަވަރުވެފައެވެ.
އެފްއެފްޕީ ގަވާއިދާ ޚިލާފުވުމުން ޔުއެފާއިން ސިޓީއަށް ދިން އަދަބު ސީއޭއެސްއިން އުވާލިއިރު، އެފްއެފްޕީ ގަވާއިދާ ޚިލާފުވެގެން ޔުއެފާއިން މީގެ ކުރިންވެސް ވަނީ ސިޓީއަށް 2014 ވަނަ އަހަރު ފިޔަވަޅު އަޅާފައެވެ. އެ ފަހަރު 49 މިލިއަން ޕައުންޑުން ޖޫރިމަނާ ކުރުމަށް ފަހު، އެ އަހަރުގެ ޗެމްޕިއަންސް ލީގުގައި ސިޓީގެ ސްކޮޑު މަދުކުރަން ޔުއެފާއިން ނިންމިއެވެ.
