ޔާމިންއަށް އިންސާފު ހޯދައިދެވޭނީ ބައިނަލް އަޤްވާމީ ތަހުޤީގަކުން:ނަޝީދު
23 އެޕްރީލު 2017 | އާދީއްތަ 10:01އިންސާފު ހޯދަން މިނިވަން ތަހުގީގެއް ކުރަންޖެހޭ ކަމަށް ވިދާޅުވި
ރައީސް މުޙައްމަދު ނަޝީދު، ބޭރުގެ ފަރާތްތައް ބައިވެރިވާ ތަހުގީގެއް ހިންގާންޖެހޭ ކަމަށް ވިދާޅުވި
ތޫނު އެއްޗެކުން ހަމަލާދީ މަރާލާފައި އޮއްވާ ފެނުނު ބްލޮގަރ އަދި ސޯޝަލް މީޑިއާ އެކްޓިވިސްޓް ޔާމިން ރަޝީދަށް އިންސާފު ހޯދައި ދެވޭނީ ބައިނަލްއަގުވާމީ ފަރާތްތައް ބައިވެރިވާ މިނިވަން ތަހުގީގަކުން ކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ނަޝީދު ކުރައްވާފައިވާ ޓްވީޓެއްގައި ވިދާޅުވެފައިވަނީ ވަރަށް އަނިޔާވެރި ގޮތަކަށް ވަރަށް ހިތްވަރު ޒުވާނެއްގެ އަޑު ކަނޑުވާލާފައިވާ ކަމަށެވެ.
ޔާމިންއަށް އިންސާފު ހޯދައިދިނުމަށް މިނިވަން ތަހުގީގެއް ކުރަންޖެހޭ ކަމަށާއި އިންސާފު ހޯދައިދެވޭނީ ބައިނަލްއަޤްވާމީ ފަރާތްތައް ޝާމިލްވާ މިނިވަން ތަހުގީގެއް ކޮށްގެން ކަމަށެވެ.
ސ ފޭދޫ ޗަނބޭލީގޭ ޔާމީން ރަޝީދު މަރާލާފައި އޮއްވައި ފެނުނީ ރޭ 2.59 އެހާއިރު އޭނާ މާލޭގައި ދިރިއުޅެމުންދާ މ ސްޕެކްޓުލާ ގޭގެ ސިޑި ކައިރީގައެވެ.
ޔާމިންއަށް ތޫނު އެއްޗަކުން ހަމަލާދީފައިވާ އިރު އޭނާގެ ހަށިގަނޑުގެ 16 ތަނަކަށް ހަމަލާދީފައިވެއެވެ.
ޔާމިންގެ ބަންޕަ، ހުސައިން ރަޝީދު ރާއްޖެ އެމްވީއަށް ބުނި ގޮތުގައި، ޔާމީންގެ މޭގެ 14 ތަނަކަށާއި ކަރަށް އަދި ބޮލަށް ހަމަލާދީފައިވެ އެވެ. މިވަރަށް ހަމަލާދީފައި އޮތުމުން، ޕޯސްޓްމޯޓެމް ހަދަން ބޭނުން ނުވާ ކަމަށާއި މަރުގެ ސަބަބު އެނގޭ ކަމަށް ވެސް އޭނާ ބުންޏެވެ.
ޔާމީން ދިރިއުޅޭ ގޭގައި ހަރުކޮށްފައި ހުރި ސީސީޓީވީގެ ކެމެރާތައް ވެސް ހުރީ އެހެން ދިމާއަކަށް އަނބުރާލާފައި ކަމަށް ވެސް ހުސައިން ރަޝީދު ބުންޏެވެ.
