އޭޑީކޭ ހޮސްޕިޓަލަށް 30 އަހަރު ފުރިގެންދާއިރު، އެންމެ ބޮޑު އަމާޒަކީ، ޒަމާނީ ވަސީލަތްތަކާ އެކުގައި އިތުރު ހިދުމަތްތަކެއް ތައާރަފްކުރުން ކަމަށާއި، މިއަހަރުގެ ތެރޭގައި ގިނަ ހިދުމަތްތަކެއް ތައާރަފްކުރާނެ ކަމަށް ހޮސްޕިޓަލުން ބުނެފި އެވެ.

ހޮސްޕޓަލްގެ 30 އަހަރުގެ ތެރޭގައި ބޮޑެތި ކުރިއެރުންތަކެއް ހޯދާފައިވާއިރު، އާންމު ރައްޔިތުންގެ ބޮޑު އިތުބާރެއް ވެސް އޭޑިކޭ ހޮސްޕިޓަލުން ހޯދައިފެއެވެ. 15 މާރިޗު 1987 ވަނަ އަހަރު "މެޑިކްލިނިކް"ގެ ނަމުގައި ފެށި ހިދުމަތް މިއަދު ވަނީ، ފަހުގެ ވަސިލަތްތަކާ އެކު، ފުޅާ ދާއިރާއެއްގައި ހިދުމަތްފޯރުކޮށްދޭ ސްޓޭޓް އޮފް ދި އާރޓް ހޮސްޕިޓަލެއްގެ ގޮތުގައި ތަރައްޤީކޮށްފަ އެވެ.

ތިރީސް އަހަރުގެ ކާމިޔާބީ ފާހަގަކުރާއިރު، އޭޑިކޭ ހޮސްޕިޓަލުން ބުނީ، އެ ހޮސްޕިޓަލުން އަބަދުވެސް މަސައްކަތްކުރަނީ ދިވެހި ރައްޔިތުންނަށް ބޭނުންވާ ސިއްހީ ހިދުމަތްތައް ރަނގަޅު ފެންވަރުގައި، އަމިއްލަ ޤައުމުގައި ތިބެގެން ހޯދޭނެ މަގުފަހިކޮށްދިނުމަށް ކަމަށެވެ. އެގޮތުން ޒަމާނީ ވަސީލަތްތަކާއި، މަޝިނަރީޒްތައް ބޭނުންކޮށްގެން ފެންވަރު ރަނގަޅު، ފަންނަނީ އަދި ޓެކްނިކަލް މުވައްޒަފުންގެ އެހީތެރިކަމާ އެކު، ސިއްހީ ދާއިރާގައި ގިނަ ކުރިއެރުންތަކާއި، ކާމިޔާބީތައް ހޯދެމުން އަންނަކަން ހޮސްޕިޓަލުން ފާހަގަކުރެއެވެ.

ސިއްހީ ހިދުމަތް ފޯރުކޮށްދިނުމުގައި 30 އަހަރުގެ ތެރޭގައި އާންމު ރައްޔިތުންގެ ބޮޑު އިތުބާރެއް ހޯދިފައިވާއިރު، ހޮސްޕިޓަލުން ބުނާ ގޮތުގައި މިއަދުގެ ވެސް އަމާޒަކީ، ބަލި މީހުންނަށް ރައްކާތެރިކަން ކަށަވަރުކޮށްދިނުމާ އެކުގައި ރަނގަޅު ހިދުމަތެއް ފޯރުކޮށްދިނުން ކަމަށެވެ. އަދި ލަފާކުރަނީ އަވަސް މުސްތަޤުބަލެއްގައި އޭޑިކޭ ހޮސްޕިޓަލަކީ ބައިނަލްއަޤުވާމީ ފެންވަރުގައި އެކްރެޑިޓް ހޮސްޕިޓަލަކަށް ހެދުން ކަމަށް ހޮސްޕިޓަލުން ބުނެ އެވެ.

ސިއްހީ ގޮތުން ރައްޔިތުން ހޭލުންތެރިކުރުމާއި، ދުޅަހެޔޮ ސިއްހަތަކަށް މަގުފަހިވާނެހެން ރައްޔިތުންގެ އާދަތައް ގެންގުޅުމަށް ހިތްވަރުދީ ހޭލުންތެރިކުރުވުމުގެ މަސައްކަތަކީ ހޮސްޕިޓަލުން ބޮޑު އިސްކަމެއްދީގެން ކުރާ ކަމެއް ކަމަށް ހޮސްޕިޓަލުން ބުނެއެވެ.

ހޮސްޕިޓަލުގެ 30 އަހަރުގެ ކާމިޔާބީ ފާހަގަކުރާއިރު، ހޮސްޕިޓަލުން ވަނީ އާންމު ރައްޔިތުންނަށް އުފާވެރި ހަބަރެއް ވެސް ދީފަ އެވެ. އެގޮތުން އޭޑިކޭ ހޮސްޕިޓަލުން ބުނީ މި ހިނގާ 2017 ވަނަ އަހަރުގައި ހޮސްޕިޓަލުންދޭ ހިދުމަތްތައް ވަރަށް ބޮޑަށް ފުޅާކުރާނެ ކަމަށެވެ. އެގޮތުން އިތުރު ވަސީލަތްތަކާއި، މުޅިން އަލަށް ތައަރަފްކުރެވޭ ހިދުމަތްތަކާ އެކު، ހޮސްޕިޓަލުގެ އިމާރާތާއި، ތިއޭޓާ ކޮމްޕްލެކްސްއެއް ހުޅުމަށް ތައްޔާރުވަމުންދާ ކަމަށް ހޮސްޕިޓަލުން ބުނެއެވެ.