ހަމަނުޖެހުން ހިންގި ބިދޭސީންނާ މެދު ހަރުކަށި ފިޔަވަޅު އަޅާނެ ކަމުގެ އިންޒާރު ފުލުހުން ދީފި
14 ޖުލައި 2020 | އަންގާރަ 01:58ބިދޭސީންނަކީ އައިލެންޑް އެކްސްޕާޓް ކުންފުނީގެ މުވައްޒަފުން
ހުޅުމާލޭގައި ހަމަނުޖެހުން ހިންގި ބިދޭސީންތައް
ހުޅުމާލޭގައި ބިދޭސީ މަސައްކަތްތެރިން ހޯމަ ދުވަހު ހިންގި ހަމަނުޖެހުމުގައި މީހުންގެ މުދަލަށް ގެއްލުން ދިން މީހުންނާ މެދު ގާނޫނުތަކާއި ގަވާއިދުތަކުގެ ތެރެއިން އެޅެން އޮތް އެންމެ ހަރުކަށި ފިޔަވަޅު އަޅަން ކުރަން ޖެހޭ މަސައްކަތް ކުރާނެ ކަމަށް މޯލްޑިވްސް ޕޮލިސް ސަރވިސް އިން ބުނެފިއެވެ.
އައިލެންޑް އެކްސްޕާޓްގެ ބިދޭސީ މުވައްޒަފުން ހިންގި ހަމަނުޖެހުންތަަކާއި ގުޅިގެން ފުލުހުން ނެރުނު ބަޔާނެއްގައި ބުނީ ބިދޭސީ މަސައްކަތްތެރިންނަށް ލިބެން ޖެހޭ މުސާރަ ނުލިބޭ ކަމަށް ބުނެ އެކަމާ ހިތްހަމަނުޖެހުން ފާޅުކޮށް ކުރި އިހުތިޖާޖުގައި، އެ ސަރަހައްދަށް ދިޔަ ފުލުހުންނާ ދިމާލަށް ގާ އުކައި ހަމަނުޖެހުން ހިންގާފައިވާ ކަމަށެވެ.
އެ ހަމަނުޖެހުން ތަކުގައި ބައެއް ފުލުހުންނަށް އަނިޔާވުމުގެ އިތުރުން ފުލުހުންގެ ވެހިކަލަކަށާއި އާންމު ރައްޔިތުންގެ މުދަލަށް ގެއްލުންވެފައިވާ ކަމަށް ފުލުހުން ބުންޏެވެ. އެސްއޯ ފުލުހުންގެ ޓީމެއް ހުޅުމާލެ ގޮސް 41 ބިދޭސީއަކު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ. އެ މައްސަލަ ފުލުހުންގެ ސީރިއަސް އެންޑްއޯގަނައިޒްޑް ކްރައިމް ޑިޕާޓްމަންޓުން ދަނީ ތަހުގީގު ކުރަމުންނެވެ.
ފުލުހުން ބުނީ، މާލޭގެ މަގުތަކުގެ އަމާންކަން ނަގާލައި ދައުލަތާއި ރައްޔިތުންގެ މުދަލަށް ގެއްލުން ދިނުން ހަރުކަށި އިބާރާތުން ކުށްވެރި ކުރާ ކަމަށެވެ.
މުސާރަ ނުލިބުން ފަދަ މައްސަލަތައް ހައްލުކުރުމުގައި، އެ ކަންކަން ހައްލުކުރުމަށް އެކަށައަޅާފައިވާ ގާނޫނީ އުސޫލުތަކުގެ ތެރެއިން އަމަލުތައް ބެހެއްޓެމަށް ފުލުހުން ވަނީ އިލްތިމާސްކޮށްފައެވެ.
ފުލުހުންނަށް ހަމަލާދިނުމާއި ދައުލަތުގެ މުދަލަށާއި އާންމު ރައްޔިތުންގެ މުދަލަށް ގެންލުން ދިނުން ފަދަ ކަންކަން ތަކުރާރު ވިޔަ ނުދިނުމަށްޓަކައި، ރައްޔިތުންގެ ސަލާމަތާއި ރައްކާތެރިކަން ކަށަވަރުކޮށް ދައުލަތާއި ރައްޔިތުންގެ މުދާ ހިމާޔަތްކުރުމަށް އެޅެންހުރި އެންމެހާ ފިޔަވަޅުތައް އެޅުމުގައި ފަސް ނުޖެހޭނެ ކަމަށް ފުލުހުން ނެރުނު ބަޔާނުގައިވެއެވެ.
ބިދޭސީންނާއި މުސާރަ ނުދޭ މައްސަލަތައް މިފަހަކަށް އައިސް ފެންމަތިވަމުން އަންނައިރު ދާދި ފަހުން ބ. ބޮޑުފިނޮޅުގައި ރިސޯޓެއް ތަރައްގީ ކުރުމުގެ މަސައްކަތާ ހަވާލުވެފައިވާ އާރުއައިއެކްސް (ރިޒް) ކޮމްޕެނީ ޕްރައިވެޓް ލިމިޓެޑުން ބިދޭސީން މަސައްކަތްތެރިންނަށް މުސާރަ ނުދޭތާ ގިނަ ދުވަސްތަކެއް ވެގެން އެކަމާއި ހިތްހަމަ ނުޖެހިގެން އެ ރިސޯޓުގައި ވެސް ބިދޭސީ މަސައްކަތްތެރިން ވަނީ މުޒާހަރާކޮށްފައެވެ. އެ މައްސަލާގައި ހައްޔަރުކުރި 19 ބިދޭސީއަކު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ.
