ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު (ފިއްޓެ) ގެ ޓެސްޓްގެ ނަތީޖާ ކޮވިޑް-19 އަށް ނެގެޓިވް ވެއްޖެއެވެ.
މެންބަރު ޒިޔާދު ކޮވިޑް-19 އަށް ޕޮޒިޓިވް ވެފައިވާ ކަމުގެ އަޑު ފެތުރުމާއި ގުޅިގެން އޭނާ ކޮވިޑް -19 އަށް ޓެސްޓް ހަދާފައިވަނީ ބުރާސްފަތި ދުވަހުގެ ރެއެވެ.
ހުކުރު ދުވަހު ހަވީރު ޒިޔާދުގެ ޓެސްޓްގެ ނަތީޖާ ލިބުނުއިރު އޭނާ ވަނީ ކޮވިޑް-19 އަށް ނެގެޓިވް ވެފައެވެ.
ރާއްޖެ އެމްވީއަށް މައުލޫމާތު ދެއްވަމުން ޒިޔާދު ވިދާޅުވީ ކޮވިޑް-19 އަށް އޭނާ ޓެސްޓް ހެދީ ކޮވިޑަށް އޭނާ ޕޮޒިޓިވްވި އަޑު ފެތުރުމާއި ގުޅިގެން ކަމަށެވެ.
ޒިޔާދު ވިދާޅުވީ ޕޮޒިޓިވް ވެފައިވަނީ އޭނާގެ އާއިލާގެ މީހެއް ކަމަށާއި ނަމަވެސް އެއީ ޑައިރެކްޓް ކޮންޓެކްޓެއް ނޫން ކަމަށެވެ.
ޒިޔާދުގެ ނަތީޖާ ނެގެޓިވް ވެފައިވާއިރު މަޖިލިސް އިދާރާގެ މުވައްޒަފަކު ކޮވިޑް-19 އަށް ޕޮޒިޓިވް ވުމާއި ގުޅިގެން ވަނީ އޭނާގެ ކޮންޓެކްޓް ޓްރޭސިން ހަދާފައެވެ.އޭނާ ޕޮޒިޓިވް ވުމާއި ގުޅިގެން މަޖިލިސް އިދާރާ ބަންދުކޮށް ޑިސްއިންފެކްޓް ކުރުމަށްފަހު އަލުން ވަނީ ހުޅުވާފައެވެ.
