މަލްޓީ ޕާޓީގެ ޑިމޮކްރަސީއެއްގައި އަމަލުކުރަންޖެހޭ އުސޫލުތައް އެންމެ ރަނގަޅަށް ދައްކަވާފައިވާ ބޭފުޅަކީ ރައީސުލްޖުމްހުރީއްޔާ އަބްދުﷲ ޔާމީން ކަމަށް ޕީޕީއެމް ޕާލިމެންޓަރީ ގްރޫޕުގެ ލީޑަރު އަހްމަދު ނިހާން ހުސައިން މަނިކު ވިދާޅުވެއްޖެ އެވެ.
ބުރާސްފަތި ދުވަހު ޕީޕީއެމް އޮފީސް ހުޅުވަބް ބޭއްވި ރަސްމިއްޔާތުގައި ވާހަކަ ދައްކަވަމުން ނިހާން ވިދާޅުވީ ޕީޕީއެމް ކުރިއަރުވައި މިހާ ހިސާބަށް ގެނެވިފައިވަނީ ރައީސް ޔާމީންގެ މަސައްކަތްޕުޅުން ކަމަށެވެ. ޕީޕީއެމް އޮފީސް ހުޅުވިގެން ދިއުމުން މިހާރަށްވުރެ އަތޮޅުތަކުގެ މެންބަރުންނާ ގުޅުން ރަގަޅުވެގެންދާނެ ކަމަށް އޭނާ ވިދާޅުވި އެވެ.
" މެންބަރުން އިތުރުކުރުމަށް، މެޑަމް ފާތިމަތު އިބްރާހިމް ކުރަމުންދާ މަސައްކަތަކީ ފާހަގަކޮށްލަންޖެހޭ މަސައްކަތެއް،" ނިހާން ވިދާޅުވި އެވެ.
ރައީސް ޔާމީންގެ ތާއީދެއް ނެތް ކަމަށް ބުނެ ވާހަކަ ދައްކަވާ އިރު، 2013 ވަނަ އަހަރުގެ ރިޔާސީ އިންތިހާބުގައި ރައީސް ޔާމީން ހުވާކޮށްފައިވަނީ ތާއީދު އޮތުމުން ކަމަށް ނިހާނު ވިދާޅުވި އެވެ.
މި ރަސްމިއްޔާތުގައި ހޯމް މިނިސްޓަރ އަޒްލީން އަހްމަދު ވިދާޅުވީ ރައީސް ޔާމީން ނެތް ނަމަ ޕީޕީއެމް މިއަދު ހޯދާ ކުރިއެރުންތަކެއް ނުހޯދޭނެ ކަމަށެވެ.
"އޭރު ޕާޓީ އާ މެދު އުއްމީދު ނެތް ބަޔަކަށް ޕީޕީއެމް ފެނިއްޖެ، ތިން އަަހަރު ނުވަނީސް ލޯކަލް ކައުންސިލް އިންތިހާބާ، މަޖިލީސް އިންތިހާބުގެ އިތުރުން ރިޔާސީ އިންތިހާބު ކާބިޔާބު ވެފައިވުމަކީ އެހެން ޕާޓީއަށް ލިބިފައިވާ ކާމިޔާބީއެއް ނޫން،" އަޒްލީން ވިދާޅުވި އެވެ.
ޕީޕީއެމް އިން އަބަދުވެސް މަސައްކަތް ކުރައްވަނީ ގާތުން މަސައްކަތް ކުރެއްވުމަށް ކަމަށާއި ޕީޕީއެމްގެ ހަރަކާތްތައް ކުރިއަށް ގެންދިއުމުގައި ރައީސް ޔާމީންގެ އަނބިކަނބަލުން ފާތިމަތު އިބްރާހިމް ކުރައްވަމުން ގެންދަވާ މަސައްކަތްތައް އަޒްލީން ވަނީ ފާހަގަކުރައްވާފަ އެވެ.
