ރައީސް ޔާމީންގެ ޝަރީއަތް: ދައުވާއާ ގުޅޭ އާ ވަހަކައެއް ދިފާއުގައި ދައްކަވާފައެއް ނުވޭ
8 ޖުލައި 2020 | ބުދަ 14:11ރައީސް ޔާމީން އެދިވަޑައިގެންނެވުމުގެ މަތިން އިތުރު އަޑުއެހުމެއް ބާއްވަން ވަނީ ނިންމާފައި
ރައީސް ޔާމީނާއި ގާނޫނީ ވަކީލު ޖަމީލު ފުލުސް އޮފީހުން ނިކުންނަވަނީ: ރައީސް ޔާމީންގެ މައްޗަށް ހިޔާނާތުގެ ގިނަ ތުހުމަތުތަކެއް ކުރެވޭ
ކުރީގެ ރައީސް އަބްދުﷲ ޔާމީންގެ މައްޗަށް ކްރިމިނަލް ކޯޓުން ސާބިތުވެ، 5 އަހަރަށް ޖަލަށްލުމާއެކު 5 މިލިއަން ޑޮލަރުން ޖޫރިމަނާކުރި މައްސަލާގައި، އިސްތިނާފު މަރުހަލާގެ، ފަހު އަޑުއެހުމަށް އައިއިރު، ދިފާއުގައި އާ ވާހަކައެއް ދައްކަވާފައި ނުވާ ކަމަށް ދައުލަތުގެ ގާނޫނީ ވަކީލާ ވިދާޅުވެއްޖެއެވެ.
ބުދަ ދުވަހު، ހައިކޯޓުގައި ބޭއްވީ، އިސްތިއުނާފް މައްސަލައިގެ، ފަހު އަޑުއެހުން ކަމަށްވިޔަސް، ރައީސް ޔާމީންގެ އެދިވަޑައިގެންނެވުމުގެ މަތިން ވަނީ އިތުރު އަޑުއެހުމެއް ބޭއްވުމަށް ނިންމަވާފައެވެ. ނަމަވެސް ބުދަ ދުވަހުގެ އަޑުއެހުމުގައި، ރައީސް ޔާމީންގެ ގާނޫނީ ވަކީލުންނާއި ދައުލަތުގެ ގާނޫނީ ވަކީލުން ހުލާސާ ގޮތެއްގައި ވިދާޅުވާން ބޭނުންފުޅުވާ ވާހަކަތައް ނުވަތަ ނުކުތާތައް ފާހަގަކުރުމަށް ކޮންމެ ފަރާތަކަށް ވެސް 30 މިނެޓްގެ ވަގުތު ކޮޅެއް ދެއްވާފައެވެ. އަދި އިތުރު އަޑުއެހުމެއް ބާއްވައި ދެއްވުމަށް ރައީސް ޔާމީން އެދިވަޑައިގެންނެވީ ފަހު ބަހަކަށް އެމަނިކުފާނު ވިދާޅުވާ ބޭނުންފުޅުވާ ވާހަކަފުޅެއް ދެއްކެވުމަށް، އެމަނިކުފަނުގެ އެދިވަޑައިގެންނެވުމުގެ މަތިން ދެއްވި 10 މިނެޓްގެ ފުރުސަތުގައެވެ.
ރައީސް ޔާމީންގެ ފަރާތުން ދިފާއުގައި 75 ނުކުތާއެއް، ހައިކޯޓަށް ވަރަށް ތަފްސީލީ ގޮތެއްގައި ޝަރީއަތަށް ވަނީ މީގެކުރިން ބޭއްވި އަޑުއެހުންތަކުގައި ހުށަހަޅުއްވާފައެވެ. އަދި އެ 75 ނުކުތާއާ ގުޅިގެން ދައުލަތުން ވެސް ވަނީ ޖަވާބު ދެއްވާފައެވެ. އެހެންކަމުން ބުދަ ދުވަހު ޝަރީއަތުގައި އޮތީ ހުލާސާ ގޮތެއްގައި ދެ ފަރާތުން ދައްކަން ހުރި ވާހަކަތައް ދެއްކެވުމަށް ފުރުސަތު ދެއްވުމެވެ.
މި ފުރުސަތުގައި ވެސް، ރައީސް ޔާމީންގެ ގާނޫނީ ވަކީލުންގެ ޓީމުން މައިގަނޑު ގޮތެއްގައި ފާހަގަ ކުރެއްވީ ކުރިންވެސް ފާހަގަ ކުރެއްްވި ވާހަކަތައް ހުލާސާ ގޮތެއްގައެވެ. އަދި ދައުލަތުން ވެސް ވަނީ ހުލާސާ ގޮތެއްގައި އެވާހަކަތަކެއް ކަމަށް ވިދާޅުވެ ރައްދު ދެއްވާފައެވެ.
ބުދަ ދުވަހުގެ ޝަރީއަތުގައި މައިގަޑު ގޮތެއްގައި ރައީސް ޔާމީންގެ ގާނޫނީ ޓީމުން ފާހަގަކުރެއްވީ، އެސްއޯއެފް ކުންފުނީގެ އެކައުންޓުން ރައީސް ޔާމީންގެ އެކައުންޓަށް 1 މިލިއަން ޑޮލަރު ޖަމާކޮށްފައިވާއިރު، އެއީ ގއ. ވޮޑުމުލާ ގެ އިކުއިޒިޝަން ފީގެ ގޮތުގައި ދައުލަތަށް ލިބެންޖެހޭ ފައިސާކަން އެއްވެސް ގޮތަކަށް ސާބިތުކޮށް ނުދެވޭ ކަމަށެވެ. ހަމައެކަނި އޮތީ ދައުލަތުން ބުނާ ބަސް އެކަނި ކަމަށް ވެސް ގާނޫނީ ޓީމުގެ އިސް ގާނޫނީ ވަކީލު ޑރ. މުހައްމަދު ޖަމީލު އަހުމަދު ވިދާޅުވި އެވެ.
މީގެއިތުރުން ޖަމީލް ވަނީ، ދައުލަތުން ހެކީންގެ ގޮތުގައި ހުށަހެޅި، އެންޓި ކޮރަޕްޝަން ކޮމިޝަންގެ ކުރީގެ ނައިބު ރައީސް މުއައްވިޒު ރަޝީދުގެ ހެކިބަހާއި، އެމްއެމްޕީއާރުސީގެ ކުރީގެ މެނޭޖިންގ ޑިރެކްޓަރ އަބްދުﷲ ޒިޔާތުގެ ހެކިބަހާއި އަދި ކުރީގެ ނައިބު ރައީސް އަހުމަދު އަދީބުގެ ހެކިބަހަކީ، މި މައްސަލާގައި ބަލައިގެންވާނެ ހެކިބަސްތަކެއް ކަމަށް ގަބޫލު ނުކުރައްވާ ކަމަށެވެ. އަދި މުއައްވިޒު ފުލުސް އޮފީހަށް ފޮނުވި ސިޓީއަކަށް މިތަހުގީގު ހިންގާ، ދައުވާ ކުރިއިރު، މުއައްވިޒު ކުރިން ދީފައިވާ ބަޔާނާއި ފަހުން ކޯޓުގައި ދިން ހެކިބަހާ ދިމާ ނުވާ ކަމަށާއި، މުއައްވިޒު ދޮގު ހައްދަވާފައިވާ ކަމަށް ވެސް ޖަމީލު ތުހުމަތު ކުރެއްވިއެވެ.
މީގެއިތުރުން މި ދައުވާއަކީ، ފުލުހުން ނުވެސް ހިންގާ ތަހުގީގެއްގެ މައްޗަށް ކޮށްފައިވާ ދައުވާއެއް ކަމަށް ވެސް ޖަމީލް ވިދާޅުވ އެވެ.
މީގެއިތުރުން، ކްރިމިނަލް ކޯޓުގައި ޝަރީއަތް ހިންގި އިޖުރާއަތުތަކާ ގުޅޭ ބައެއް ކަންކަން ޖަމީލު ފާހަގަ ކުރެއްވިއެވެ. އެގޮތުން، ކްރިމިނަލް ކޯޓުގައި މި މައްސަލަ ބެއްލި ފަނޑިޔާރުންގެ ބެންޗުގެ އިސްގާޒީ، މި މައްސަލައާ ގުޅުންހުރި ކަމަކާ ގުޅޭގޮތުން، މީޑިއާއަށް މައުލޫމާތު ދެއްވާފައިވާ ކަމަށް ޖަމީލު ފާހަގަ ކުރެއްވިއެވެ.
ޖަމީލުގެ އެވާހަކަތަކަށް ދައުލަތުގެ ގާނޫނީ ވަކީލާ ރައްދު ދެއްވައި ވިދާޅުވީ، ކުރިން ވެސް މިކަންކަން ދިފާއުގައި ފާހަގަ ކުރައްވާފައިވާތީ، ދައުލަތުން ލިޔުމުން ޝަރީއަތަށް ޖަވާބު ދެއްވާފައިވާނެ ކަމަށެވެެ. ނަމަވެސް ގާނޫނީ ވަކީލާ ވަނީ ހުލާސާ ގޮތެއްގައި، ޖަމީލު ފާހަގަ ކުރެއްވި ކަންކަމަށް ޖަވާބު ދެއްވާފަ އެވެ.
ހުލާސާ ގޮތެއްގައި ދައުލަތުގެ ވަކީލާ ވިދާޅުވީ، މިއީ މަނީ ލޯންޑަރިންގެ ދައުވާއެއް ކަމަށާއި، މިފަދަ ތަހުގީގުތައް ހިންގުމުގެ ބާރު ލިބިގެން ވަނީ ފުލުހުންނަށް ކަމަށްވާތީ، މި ތަހުގީގު ހިންގީ ފުލުހުން ކަމަށެވެ. ދައުލަތުގެ ވަކީލާ ވިދާޅުވީ، އެމްއެމްޕީއާރުސީގެ ހިޔާނާތާއި ކޮރަޕްޝަނުގެ މައްސަލަތައް އޭސީސީންނާއި ފުލުހުން ގުޅިގެން ހިންގި ނަމަވެސް މިއީ ތަފާތު މައްސަލައެއް ކަމަށާއި މިއީ މަނީ ލޯންޑަރ ކުރުމުގެ ކުށުގެ ތަހުގީގެއް ކަަމަށާއި އަދި ދައުވާއެއް ކަމަށެވެ.
އެހެންކަމުން މި މައްސަލާގައި ފުލުހުންގެ ތަހުގީގަށް މުއައްވިޒާއި ޒިޔަތާއި އަދި އަދީބު ދެއްވާފައިވާ ބަޔާނާއި، ހެކިބަހާއި، އަދި ވަށައިގެން ހިނގާފައިވާ ކަންކަމަށް ބަލާއިރު، މިއީ ސާބިތުވާ މައްސަލައެއް ކަމަށާއި އަދި ކްރިމިނަލް ކޯޓުން ކޮށްފައިވާ ހުކުމަކީ ރަނގަޅު ހުކުމެއް ކަމަށް ދައުލަތުން ގަބޫލު ކުރާ ކަމަށެވެ.
