މިހާރު ކުރަމުންދާ ވިއްސާރާގައި ރާއްޖޭގެ އެކި ރަށްތަކަށް އުދައިގެ އަސަރު ކުރަމުންދާއިރު، ކުރިޔަށް އޮތް ދެ ދުވަހު ވެސް އުދަ އެރުން އެކަށީގެންވާ ކަމަށް މޫސުމާއި ބެހޭ ގައުމީ އިދާރާ (މެޓް) އިން ލަފާކޮށްފިއެވެ.

މައުލޫމާތު ލިބިފައިވާ ގޮތުން އުދައިގެ އަސަރުކޮށްފައިވަނީ، ގދ. ފަރެސްމާދޮޑާ ވ. ރަކީދޫ އަދި ގދ. ތިނަދޫގެ އިތުރުން އއ. އުކުޅަހަށެވެ. މި ރަށްތަކަށް އެރި އުދައިގެން ސަބަބުން ބަނދަރުގައި އަޅާފައި ހުރި ބޯޓު ފަހަރުތަކަށް އޭގެ އަސަރު ކޮށްފައިވެއެވެ.

ރާއްޖެ.އެމްވީއާ ވާހަކަ ދައްކަވަމުން ގދ. ތިނަދޫ ކައުންސިލްގެ ރައީސް އަލީ އަމްޖަދު ވިދާޅުވީ، އެ ރަށަށް އުދައިގެ އަސަރު ކުރަން ފެށީ އާދިއްތަ ދުވަހުގެ ހެނދުނުން ފެށިގެން ކަމަށެވެ. އަމްޖަދު ވިދާޅުވީ، އުދައިގެ ސަބަބުން މާ ބޮޑެތި ގެއްލުންތަކެއް ލިބިފައިވާ ކަމުގެ މައުލޫމާތު ލިބިފައިނުވާ ކަމަށެވެ.

އެކަމަކު އޭނާ ވިދާޅުވީ، އާދިއްތަ ދުވަހު އުދައިގެ އަސަރު ކޮށްފައިވަނީ މީގެ ކުރިން ނުކުރާ ވަރަށް ކަމަށެވެ. ތިނަދޫގެ ގިނަ ފިހާރަތަކާއި އަދި ހޮސްޕިޓަލް ހުންނަނީ ބަނދަރު ސަރަހައްދުގައި ކަމަށް ވާތީ، ކުރިޔަށް އޮތް ދުވަސްތަކުގައި އުދައިގެ އަސަރު އެ ތަންތަނަށް ކޮށްފާނެތީ ކައުންސިލުން ކަންބޮޑުވުން ފާޅުކުރިއެވެ.

އަމްޖަދު ވިދާޅުވި ގޮތުގައި، ތިނަދޫ އަށް އުދައެރުން، ބަސްތާ ޖަހައިގެން ހައްލެއް ނުގެނެވޭނެ އެވެ. ހައްލަކީ ބޭރު ތޮށްޓެއްލުމެވެ.

ތިނަދޫގައި ބޭރު ތޮއްޓެއް ނެތުމުގެ ކަންބޮޑުވުން ކައުންސިލުން ވަނީ މީގެ ކުރިންވެސް އެކި ފަހަރުމަތިން ސަރުކާރުގެ އިތުރުން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ސަމާލު ކަމަށް ގެނެސްފައެވެ. އަމްޖަދު ވިދާޅުވީ، މިހާރުގެ ހާލަތު އޮތް ގޮތުން ލަފާ ފުރުމަށް ވަރަށް ބޮޑަށް ހުރަސް އެޅިފައިވާ ކަމަށެވެ.

ވ.ރަކީދޫ ކައުންސިލްގެ ރައީސް އާދަމް ސާމީ ވިދާޅުވީ، ރަށުގެ ގެތަކަށް އުދައިގެ އަސަރުކޮށް ބައެއް ގެތަކަށް ފެން ވަދެފައިވާ ކަމަށެވެ. ރަށު ތެރެއަށް ވެސް ލޮނުގެ އަސަރު ވަނީ ކޮށްފައެވެ.

ރަކީދޫ އަށް ހޮނިހިރު ދުވަހުން ފެށިގެން އުދައިގެ އަސަރު ދަނީ ކުރަމުންނެވެ. ކައުންސިލުން ބުނީ، އެ މައުލޫމާތުތައް ކަމާއި ގުޅުންހުރި މުއައްސަސާތަކާއި ހިއްސާކޮށްފައިވާ ކަމަށެވެ. އެމްޑީޕީގެ މެޖޯރިޓީ އޮންނަ ރަކީދޫ ކައުންސިލްގެ ރައީސް ވިދާޅުވި ގޮތުގައި އުދައަރާ މައްސަލަ އަކީ މީގެ ކުރިން ވެސް އެތައް ފަހަރެއްގެ މަތިން ސަރުކާރުގެ ސަމާލުކަށް ގެންދިޔަ މައްސަލަ އެއް ކަމަށެވެ. އެކަމަކު މިހާތަނަށް އެކަމަށް އެކަށީގެންވާ ހައްލެއް ނުލިބުން އެއީ ރައްޔިތުންގެ އެންމެ ބޮޑު އެއް ކަންބޮޑުވުން ކަމަށް ވިދާޅުވިއެވެ.

ކުރިޔަށް އޮތް ދެ ދުވަހުވެސް ރާއްޖޭގެ އެކި ސަރަހައްދުތަކަށް އުދަ އަރާނެ ކަމަށް މޫސުމާއި ބެހޭ ގައުމީ އިދާރާ (މެޓް) އިން ވަނީ ބުނެފައެވެ. މެޓުން ބުނެފައިވާ ގޮތުން ކުރިޔަށް އޮތް 24 ގަޑިއިރު ތެރޭގައި ރާއްޖޭގެ އެކި ހިސާބަށް ވިއްސާރަކުރުމާއެކު ގުގުރާނެއެވެ. ބައެއް ރަށްތަކަށް ބޯކޮށް ވާރޭވެހުން އެކަށީގެންވެއެވެ. ދެކުނުގެ އަތޮޅުތަކަށް އިރުދެކުނާއި ދެކުނުން ގަޑިއަކު 13 މޭލާއި 23 މޭލާ ދެމެދުގެ ބާރުމިނުގައި ވައިޖެހޭނެ ކަމަށް ލަފާކޮށްފައިވާއިރު، އެހެން ހިސާބުތަކަށް ދެކުނާއި ހުޅަނގު ދެކުނުން ގަޑިއަކު ހަތް މޭލާއި 15 މޭލާ ދެމެދުގެ ބާރު މިނުގައި ވައިޖެހޭނެ ކަމަށް މެޓުން ބުންޏެވެ. ވިލާގަނޑުގައި ގަޑިއަކު ގާތްގަޑަކަށް 40 މޭލަށް ވައިގަދަވުން އެކަށީގެންވާ ކަމަށާއި، އެންމެ ދެކުނުގެ ކަނޑުތައް ގަދަވާނެއެވެ.

އެހެން ހިސާބުތަކުގެ ކަނޑުތައް އާދައިގެ ވަރަކަށް ގަދަވާނެ ކަމަށާއި، ދިޔަވަރު ބޮޑުވާ ގަޑިތަކުގައި ބައެއް ރަށްތަކަށް އުދައިގެ އަސަރު ކުރުން އެކަށީގެންވާތީ، މޫސުމަށް ސަމާލުވުމަށް މެޓުން ވަނީ އިލްތިމާސްކޮށްފައެވެ.