ފަގީރުންގެ ދަފްތަރު މުރާޖައާ ކުރުމަށް ނިންމައި، ރަޖިސްޓަރ ވުމުގެ ފުރުސަތު ހުޅުވާލައިފި

ފަގީރުންގެ ދަފްތަރު މުރާޖައާ ކުރުމަށް ނިންމައި، ރަޖިސްޓްރީވުމުގެ ފުރުސަތު އިސްލާމިކް މިނިސްޓްރީން ހުޅުވާލައިފިއެވެ.

އިސްލާމިކް މިނިސްޓްރީން ނެރެފައިވާ ބަޔާނެއްގައި ބުނެފައިވަނީ، 1440 ވަނަ އަހަރުގެ މުދަލުގެ ޒަކާތް ބެހުމައްޓަކައި ފަގީރުންނާއި މިސްކީނުންގެ ދަފްތަރު މުރާޖައާ ކުރުމަށް ނިންމައިފާވާކަމަށާއި، މިހާރު އެކުލަވާލައިފައިވާ ދަފްތަރުގައި ރަޖިސްޓްރީވުމަށް ފޯމު ހުށަހެޅުމުގެ ފުރުސަތު ޖުލައި މަހުގެ 6 ވަނަ ދުވަހުން ފެށިގެން ޖުލައި މަހުގެ 23 ވަނަ ދުވަހަށް ހުށަހަޅާފައިވާކަމަށެވެ.

މި ފުރުސަތަކީ މިހާރު އޮތް ދަފްތަރުގައި ރަޖިސްޓަރ ނުވާ ފަރާތްތަތަކަށް ހުށަހަޅާފައިވާ ފުރުސަތަކަށްވާތީ، މި އަހަރު (1441) ފިތުރު ޒަކާތް ބަހާފައިވާ ދަފްތަރުގައި ހިމެނޭ ފަރާތްތަކުން ފޯމް ހުށަހަޅަން ނުޖެހޭކަމަށް މިނިސްޓްރީން ބުނެއެވެ. އަދި މިހާރުގެ ލިސްޓް މިނިސްޓްރީގެ ވެބްސައިޓުން ބެލޭނެކަން ފާހަގަކޮށް މިނިސްޓްރީން އިތުރަށް ބުނީ، ދަފްތަރުން އުނިވާން ބޭނުންވާ ފަރާތްތަކާއި ދިރިއުޅޭ ރަށް ބަދަލުވެ މިހާރު ދިރިއުޅޭ ރަށުގެ ދަފްތަރަށް ބަދަލުވުމުގެ އިންތިޒާމްތައް ސިޓީ ހުށަހެޅުމުން ހަމަޖެހިގެންދާނެކަމަށެވެ.

މާލެ ސިޓީގައި ފޯމު ބަލައިގަތުން ހަމަޖެހިފައިވަނީ އިސްލާމިކް މިނިސްޓްރީގެ ލޮބީގައެވެ. އެގޮތުން، ފޯމު ބަލައިގަންނާނީ ކޮންމެ ދުވަހަކުވެސް ހެދުނު 09:00 އިން 13:00 އަށްކަމަށާއި ދުވާލަކަށް ހިދުމަތްދޭނީ 50 ނަންބަރަށް ކަމަށް މިނިސްޓްރީން ބުނެއެވެ. އަދި ނަންބަރު ދޫކުރުމަށް ހަމަޖެހިފައިވަނީ 09:00 އިން 13:00 އަށެވެ.

އެ ދުވަހުގެ ހިދުމަތް ދިނުމަށް ހަމަޖެހިފައިވާ ޢަދަދު ހަމަވުމުން އޭގެ ފަހުން އަންނަ ފަރާތްތަކަށް ނަންބަރު ދޭނީ ޖެހިގެން އަންނަ ދުވަހު އެ ނަންބަރަށް ފޯމު ލެވޭ ގޮތަށެވެ. ފޯމް ހުށަހަޅަން އަންނަ ހުރިހާ ފަރާތްތަކުންވެސް އިޖްތިމާއި ގައިދުރުކަން ބެހެއްޓުމާއި ކޮވިޑް-19ން ރައްކާތެރިވުމަށް އަޅަންޖެހޭ ހުރިހާ ފިޔަވަޅެއް އެޅުމަށް މިނިސްޓްރީން ވަނީ އިލްތިމާސްކޮށްފައެވެ. މާލެފިޔަވައި ރަށްރަށުގައި ފޯމު ބަލައިގަތުމުގެ އިންތިޒާމް ހަމަޖައްސާނީ އެ ރަށެއްގެ ރަށު ނުވަތަ ސިޓީ ކައުންސިލުން ކަމަށް ވެސް އިސްލާމިކް މިނިސްޓްރީން ވަނީ ބުނެފައެވެ.