ބ. ގޮއިދޫގެ ޒުވާނުންނަށް ކުޅިވަރާ ބެހޭ ވުޒާރާއިން ކައިޓް ސާފިންގ ކިޓް ހަދިޔާކޮށްފިއެވެ.
ގޮއިދޫ ކައުންސިލް މެދުވެރިކޮށް މި ކިޓުތައް އެ ވުޒާރާއިން ހަވާލުކޮށްފައިވަނީ ގޮއިދޫ ސްޕޯޓްސް އެންޑް ޔޫތު ޑެވެލޮޕްމެންޓް ސޮސައިޓީއާ ގުޅިގެންނެވެ. މިފަހަރު ކުޅިވަރާ ބެހޭ ވުޒާރާއިން ވަނީ ފަސް ކިޓު ގޮއިދޫގެ ޒުވާނުންނަށް ހަދިޔާކޮށްފައެވެ.
މިކަމާއި ގުޅިގެން ކުޅިވަރާ ބެހޭ ވަޒީރު އަޙްމަދު މަޙްލޫފް ވިދާޅުވީ ރާޅުގުޑިއާ ގުޅިގެން މިއަހަރު ގޮއިދޫގައި ބޭއްވި ކައިޓް ސާފިންގ ކޭމްޕްގައި ގޮއިދޫގެ ދެ ޖިންސްގެ ޒުވާނުންނަށް ވެސް ދުނިޔޭގެ ޗެމްޕިއަނަކާއެކު އެކުޅިވަރުގެ ހުނަރުތައް ދަސްކުރުމަށް ފުރުސަތު ފަހިކޮށްދެވުނު ކަމަށެވެ. އަދި އެ ކޭމްޕުގެ ތެރޭގައި ގޮއިދޫ ޒުވާނުންގެ ހުނަރުތައް ފެނުމާއެކު އެ ކުދިންނަށް ކައިޓް ސާފިންގ ކިޓް ފޯރުކޮށްދޭނެ ކަމަށް ވައުދުވި ކަމަށާއި، މިއަދު އެ ވައުދު ފުއްދޭތީ އުފާކުރައްވާ ކަމަށްވެސް ވިދާޅުވިއެވެ.
މިއަހަރުގެ ކުރީކޮޅު ރާޅުގުޑިއާ ގުޅިގެން ކުޅިވަރާ ބެހޭ ވުޒާރާއިން ކުރިއަށް ގެންދިޔަ ކޭމްޕަކީ ވަރަށް ކާމިޔާބު ކޭމްޕެކެވެ. ހަމައެހެންމެ މިފަދަ އެކްސްޓްރީމް ކުޅިވަރުތަކުގައި ގޮއިދޫގެ ޒުވާނުން ފާހަގަކޮށްލެވެއެވެ.
