ސާފިންގ އެސޯސިއޭޝަންގެ ހަރަކާތްތައްވެސް ފަސްކޮށްފި
ހަރަކާތްތައް ފަސްކުރަން ނިންމީ ކޮރޯނާވައިރަސް ރާއްޖެއިން ފެނުމާއި ގުޅިގެން
ރާއްޖޭގައި ބޭއްވި ސާފިންގ މުބާރާތެެއްގެ ތެރެއިން
މިހާރު ފެތުރެމުންދާ ކޮރޯނާވައިރަސް (ކޮވިޑް-19) ގެ ސަބަބުން މޯލްޑިވްސް ސާފިންގ އެސޯސިއޭޝަނުން ރާވައިފައިވާ ހުރިހާ ހަރަކާތެއް ފަސްކުރަން ނިންމައިފިއެވެ.
ސާފިންގ އެސޯސިއޭޝަނުން ބުނީ އެ އެސޯސިއޭޝަނުން މާޗު މަހާއި އޭޕްރީލް މަހު ހިންގަން ހަމަޖެހިފައިވާ ހުރިހާ ހަރަކާތެއް ފަސްކުރަން ނިންމައިފައިވާ ކަމަށާއި، އޭގެ އިތުރަށް ވައިޑީޕީ ޕްރޮގުރާމްތައްވެސް ހުއްޓާލަން ނިންމާފައިވާ ކަމަށެވެ.
ސާފިންގ އެސޯސިއޭޝަނުން ބުނީ އެ އެސޯސިއޭޝަންގެ ހަރަކާތްތައް ފަސްކުރަން ނިންމީ ކޮރޯނާވައިރަސް (ކޮވިޑް-19) ރާއްޖެއިން ފެނުމާއި ގުޅިގެން ކަމަށާއި، މި ނިންމުން ނިންމީ ސިއްހީ އަދި ކަމާބެހޭ ފަރާތްތަކުން ދެއްވި އިރުޝާދުގެ މަތިން ކަމަށެވެ. އަދި ލަސްކުރެވޭ މުބާރާތްތަކާއި، ހަރަކާތްތައް ފަހުގެ ތާރީޚެއްގައި ބާއްވާނެ ކަމަށް ވެސް އެ އެސޯސިއޭޝަނުން ވަނީ ބުނެފައެވެ.
ސާފިންގ އެސޯސިއޭޝަނުގެ އިތުރުން، އެފްއޭއެމް އާއި އެތުލެޓިކްސް އެސޯސިއޭޝަނުގެ ހަރަކާތްތައް ވެސް ވަނީ ފަސްކޮށްފައެވެ. އެފްއޭއެމުން ބުނީ އެ އެސޯސިއޭޝަނުގެ ހަރަކާތްތައް ފަސްކުރެވިފައިވީ ނަމަވެސް މުބާރާތްތައް ކުރިޔައްދާނެ ކަމަށެވެ. އެކަމަކު އެފްއޭއެމުން ވަނީ ޖަޒީރާ ޗެމްޕިއަންޝިޕްގެ އިތުރުން ވައިޑީޕީ ޕްރޮގުރާމްތައްވެސް ފަސްކޮށްފައެވެ.
ރާއްޖޭގެ އިތުރުން ދުނިޔޭގެ ކުޅިވަރަށް ކޮރޯނާވައިރަސް (ކޮވިޑް-19) ގެ ސަބަބުން ބޮޑެތި ގެއްލުންތަކެއް އަންނަނީ ވަމުންނެވެ. އެގޮތުން ދުނިޔޭގެ ފުޓުބޯޅައިގައި އެންމެ ބޮޑު ދެ ލީގު ކަމަށްވާ ފްރެންޗު ލީގާއި އިޓާލިއަން ލީގުގެ މެޗުތައް އަންނަނީ ފަސްކުރަމުންނެވެ. މީގެ އިތުރުން ޓޯކިޔޯގައި ބޭއްވުމަށް ހަމަޖެހިފައިވާ އޮލިމްޕިކްސް ގޭމްސް އާއި މެދު ސުވާލު އުފެދިފައިވާއިރު، މި އަހަރު ބާއްވަން ހަމަޖެހިފައިވާ ޔޫރޯ އާއި މެދު ވެސް ވަނީ ސުވާލު އުފެދިފައެވެ.
