ކުޅިވަރާ ބެހޭ ވުޒާރާއިން އެޅި ފުރަތަމަ އައުޓްޑޯ ވޮލީބޯޅަ ކޯޓުގެ މަސައްކަތް ނިންމާލައިފި

ކ. ހުރާގައި ކުޅިވަރާ ބެހޭ ވުޒާރާ އާއި ހުރާ ކައުންސިލް އަދި ހުއްރިއްޔާ ސްޕޯޓްސް ކްލަބު ގުޅިގެން އެޅި އައުޓްޑޯ ވޮލީބޯޅަ ކޯޓުގެ މަސައްކަތް ނިންމާލައިފިއެވެ.

މިއީ ކުޅިވަރާ ބެހޭ ވުޒާރާގެ ފަރާތުން ރާއްޖޭގައި އެޅި ފުރަތަމަ އައުޓްޑޯ ވޮލީބޯޅަ ކޯޓު ކަމަށްވާއިރު، އެ ކޯޓުގެ މަސައްކަތަށް އެ ވުޒާރާއިން ފަސް ލައްކައާ ގާތްކުރާ އަދަދަކަށް ޚަރަދުކޮށްފައިވާ ކަމަށް މައުލޫމާތުދެއެވެ. ބާކީ ޚަރަދުތައް ކޮށްފައިވަނީ ހުރާ ކައުންސިލާއި ހުއްރިއްޔާ ސްޕޯޓްސް ކްލަބުންނެވެ.

މިކަމާ ގުޅޭގޮތުން ކުޅިވަރާ ބެހޭ ވަޒީރު އަޙްމަދު މަޙްލޫފް ވިދާޅުވީ ވޮލީބޯޅަ ކުރިއެރުވުމަށް ކުރަމުންދާ މަސައްކަތުގެ ތެރެއިން ރާއްޖޭގެ އިތުރު ރަށްރަށުގައިވެސް މިފަދަ ކޯޓުތައް އެޅުމަށް މަސައްކަތް ކުރަމުންދާ ކަމަށެވެ.

ރޭގަނޑު ވެސް ކުޅެވޭ ގޮތަށް ތައްޔާރުކޮށްފައިވާ މި ކޯޓުގެ މަސައްކަތްތައް އިއުލާން ކޮށްގެން ކުރިއަށް ގެންގޮސްފައިވަނީ ހުރާ ކައުންސިލްގެ ފަރާތުންނެވެ. މި ކޯޓު އަޅާފައިވަނީ ހުއްރިއްޔާއަށް އެރަށު ކައުންސިލްއިން ދޫކޮށްފައިވާ ހުސްބިމުގައި ކަމަށް ކުޅިވަރާ ބެހޭ ވުޒާރާއިން މައުލޫމާތުދެއެވެ.

މި ކޯޓުގެ މަސައްކަތްތައް ކުރިއަށް ގެންދިއުމަށް ހުރާ ކައުންސިލާއި އެ ރަށުގެ ޒުވާނުންގެ އިތުރުން ހުއްރިއްޔާ ސްޕޯޓްސް ކްލަބުން ފޯރުކޮށްދިން އެހީތެރިކަމަށް މަޙްލޫފް ވަނީ ޝުކުރު އަދާކުރައްވާފައެވެ.

ރާއްޖޭގައި ވޮލީބޯޅައަކީ ދެވަނައަށް އެންމެ މަގުބޫލް ކުޅިވަރު ކަމަށްވާއިރު، ވޮލީބޯޅަ ކުރިއެރުވުމަށް ކުޅިވަރާ ބެހޭ ވަޒީރު އިސް ނެންގެވައިގެން އަންނަނީ ގިނަ މަސައްކަތްތަކެއް ކުރައްވަމުންނެވެ.