ހުޅުމާލެ ކައިރީ އަޅާފައި އޮތް ސަފާރީއަކަށް ދިޔަ ބިދޭސީ އަންހެނަކަށް ޖިންސީ ގޯނާކުރި މައްސަލައިގައި އަނިޔާ ލިބުނު "ވިކްޓިމް"ގެ ބަހެއް ހޯދުމަށް މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީން ނިންމައިފިއެވެ.
ހޯމަ ދުވަހު އޮތް ކޮމިޓީ ބައްދަލުވުމުގައި މި މައްސަލަ ދިރާސާ ކޮށްފައިވާއިރު، މެމްބަރުންގެ ފަރާތުން މައިގަނޑު 5 ކަމެއް ހުށައަޅައި ފާސްކޮށްފައިވެއެވެ. އެގޮތުން މި ހާދިސާއާ ގުޅިގެން ދެކެވޭ ވާހަކަތަކާއި، ވިކްޓިމްއާ ޙަވާލާދީ ނޫސްތަކުގައި ފެތުރޭ ޚަބަރުތަކުގައިވެސް ފުށުއެރުންތަކެއް ހުރުމާއެކު، މިކަމުގައި ސީދާ ވިކްޓިމްގެ ބަހެއް ކޮމިޓީން ހޯދުން މުހިއްމުކަން ކޮމިޓީ މެމްބަރުން ފާހަގަ ކޮށްފައިވެއެވެ. އެއާއެކު، އަނިޔާލިބުނު މީހާ ރުހޭނަމަ، އޭނާ ކޮމިޓީއަށް ހާޒިރުކޮށް، އޭނާގެ ބަހެއް ހޯދުމަށް ކޮމިޓީން ފާސް ކޮށްފައި ވެއެވެ.
ކޮމިޓީގައި ވާހަކަ ދައްކަވަމުން މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ ވިދާޅުވީ، މި މައްސަލައިގައި ފުލުހުން ޢަމަލު ކޮށްފައިވާ ގޮތް ތަފްސީލުކޮށް ދެނެގަންނަން ޖެހޭ ކަމަށެވެ. އަދި މި މައްސަލަ ކުރިއަށްދާއިރު، ތަހުޤީޤު އެންމެ ރަނގަޅަށް ކުރިއަށްދާކަން ކަށަވަރު ކުރުމުގައި ޕްރޮސެކިއުޓަރ ޖެނެރަލްގެ މުހިއްމު ޒިންމާތަކެއް ހިމެނޭކަން ފާހަގަ ކުރައްވައި މެމްބަރު އިމްތިޔާޒު ވިދާޅުވީ، ޕީޖީގެ ޤާނޫނީ ދައުރު އެންމެ ފުރިހަމައަށް އަދާކުރޭތޯ ވެސް ކަށަވަރު ކުރަންޖެހޭ ކަމަށެވެ.
މެމްބަރު އިމްތިޔާޒުގެ މި ހުށައެޅުއްވުމަށް ކޮމިޓީގެ މެމްބަރުން ވެސް ތާއިދު ކުރައްވައި ވާހަކަ ދައްކަވާފައި ވެއެވެ. އެގޮތުން މި މައްސަލައިގައި ފުލުހުން ޢަމަލުކޮށްފައިވާ ގޮތާއި މެދު ޕީޖީގެ ހޯދުންތަކަކީ ކޮބައިކަން ކޮމިޓީން ބަލައި، އެކަމަށް މަޝްވަރާ ކުރުމަށް މެމްބަރުންގެ އިއްތިފާޤުން ވަނީ ނިންމާފައެވެ. އަދި އަންގާރަ ދުވަހުގެ ކޮމިޓީ ބައްދަލުވުމުގައި މި މައްސަލައިގެ "ސީން" އަށް ދިޔަ އޮފިސަރާއި ބައްދަލުކުރުމާއި، ސްޓޭޝަން އިންޗާރޖާއި ބައްދަލު ކުރުމަށްވެސް ވަނީ ނިންމާފައެވެ.
އޭގެ އިތުރުން، މިފަދަ މައްސަލައެއްގައި އަނިޔާލިބުނު ފަރާތަަށް އެކަށީގެންވާ ރައްކާތެރިކަން ފޯރުކޮށްދެވިފައި ވޭތޯ ކަށަވަރު ކުރުމަށް، ޖެންޑަރ މިނިސްޓްރީއަށް ހުށައަޅައި، އެ މައުލޫމާތު ކޮމިޓީން ސާފު ކުރުމަށް ވެސް މެމްބަރުން ފާސްކޮށްފައި ވެއެވެ.
ފަސްވަނަ ކަމެއްގެ ގޮތުން މެމްބަރުން ވަނީ މި މައްސަލައާއި ގުޅިގެން ސީދާ އަނިޔާ ލިބުނު ފަރާތާ ޙަވާލާދީވެސް އެކި ގޮތްގޮތަށް ޚަބަރު ފަތުރަމުންދާކަން ފާހަގަ ކުރައްވާފައެވެ. އަދި އެކަމުގެ ސަބަބުން އަނިޔާ ލިބޭ މީހާ އިތުރަށް ފުރައްސާރައަށް (ވިކްޓިމް ބްލޭމްވުމަށް) ހުށައެޅިގެންދާކަމަށް މެމްބަރުން ވިދާޅުވިއެވެ. އެއާއެކު، މޯލްޑިވްސް މީޑިއާ ކައުންސިލާއި، ބްރޮޑްކާސްޓިންގ ކޮމިޝަނުގެ ސަމާލުކަމަށް އެކަން ގެނައުމަށް ވެސް ކޮމިޓީން ފާސްކޮށްފައިވެއެވެ.
ކޮމިޓީން ފާސްކުރި ކަންކަން:
- ވިކްޓިމްގެ ރައްކާތެރިކަން ކަށަވަރު ކުރުމަށް ޖެންޑަރ މިނިސްޓްރީން ކުރަމުންދާ މަސައްކަތްތައް ބެލުން
- ފުލުހުންގެ ތަހުޤީޤު އެކަށީގެންވާ ގޮތެއްގައި ކުރިއަށްދާކަން ކަށަވަރު ކުރުމަށް ޕީޖީން ކުރަމުންދާ މަސައްކަތް ބެލުން
- ވިކްޓިމް ރުހޭނަމަ، ކޮމިޓީއަށް ހާޒިރުކޮށް، އޭނާގެ ބަހެއް ހޯދުން
- ދޮގު ޚަބަރު ފެތުރުން ހުއްޓުވުމަށް މީޑިއާ ތަކަށް ބާރު އެޅުމަށް މީޑިއާ ކައުންސިލާ ބްރޮޑްކާސްޓިންގ ކޮމިޝަނަށް އެންގުން
- ސީނަށް ދިޔަ އޮފިސަރާއި، ސްޓޭޝަން އިންޖާރޖް ހާޒިރުކޮށް ކަން ހިނގައިދިޔަ ގޮތް އޮޅުން ފިލުވުން
