މިނިސްޓްރީ އޮފް ޖެންޑަރ އެންޑް ފެމިލީގައި މިދިޔަ އަހަރު ނިމުނު ހުރި 7 މިލިއަނަށްވުރެ ގިނަ ރުފިޔާއާމެދު ސުވާލު އުފެދޭކަމަށް އޮޑިޓަރ ޖެނެރަލް ހަސަން ޒިޔަތު ވިދާޅުވެއްޖެވެ.

އޮޑިޓަރ ޖެނެރަލް މިފަދައިން ވިދާޅުވީ އެމިނިސްޓްރީގެ މިދިޔަ އަހަރުގެ މާލީ އޮޑިޓް ރިޕޯޓުގައެވެ.

ޖެންޑަރ މިނިސްޓްރީގެ އޮޑިޓް ރިޕޯޓުގައި ވާގޮތުގައި މިނިސްޓްރީ އޮފް ޖެންޑަރ އެންޑް ފެމިލީގެ 2016 ވަނަ އަހަރުގެ މާލީ ބަޔާންތަކުގެ ތެރޭގައި ހިމެނޭ ފައިސާ ލިބުނު ގޮތާއި ހޭދަކުރެވުނު ގޮތުގެ ބަޔާނުގައި އަހަރު ނިމުނުއިރު ހުރި ފައިސާގެ ގޮތުގައި ހިމަނާފައިވަނީ 7583046 (ހަތް މިލިއަން ފަސް ސަތޭކަ އަށްޑިހަ ތިން ހާސް ސާޅީސް ހައެއް) ރުފިޔާ ކަމަށެވެ. ނަމަވެސް އެއީ ކޮން ފައިސާއެއްކަން އެންގެން ނެތްކަމަށް އެރިޕޯޓުގައި ބުނެފައިވެއެވެ.

ސަބަބެއްގެ ގޮތުގައި އޮޑިޓް ރިޕޯޓުގައި ބުނެފައިވަނީ "އިންޓަރނޭޝަނަލް ޕަބްލިކް ސެކްޓަރ އެކައުންޓިންގ ސްޓޭންޑަރޑް (އިޕްސަސް) ފައިނޭންޝަލް ރިޕޯޓިންގ އަންޑަރ ދަ ކޭޝް ބޭސިސް އޮފް އެކައުންޓިންގ" ގެ 1.4.9 ގައި ބަޔާންކޮށްފައިވާ ގޮތައް އެފައިސާގެ ތަފްސީލް މިނިސްޓްރީން މާލީ ބަޔާނުގެ ނޯޓް ތަކުގައި ނުވާތީ ކަމަށެވެ. އެގޮތުން މިނިސްޓްރީއަށް ޚަރަދު ކުރުމުގެ ހުއްދަ އޮތް ފައިސާއާއި މިނިސްޓްރީގައި ހުރިނަމަވެސް އެފައިސާ ޚަރަދުކުރުމުގެ ހުއްދަ މިނިސްޓްރީއަށް ނެތް ފައިސާގެ ތަފްސީލް ހިމަނާފައި ނުވާކަން ފާހަގަ ކުރާކަމަށް ޖެންޑަރ މިނިސްޓްރީގެ 2016 ވަނަ އަހަރުގެ އޮޑިޓް ރިޕޯޓުގައި ބުނެފައިވެއެވެ.

އެކަން އިސްލާހް ކުރުމަށް އަޅަން ޖެހޭ ފިޔަވަޅެއްގެ ގޮތުގައި އޮޑިޓް ރިޕޯޓުގައި ލަފާދެއްވާފައިވަނީ "އިންޓަރނޭޝަނަލް ޕަބްލިކް ސެކްޓަރ އެކައުންޓިންގ ސްޓޭންޑަރޑް (އިޕްސަސް) ފައިނޭންޝަލް ރިޕޯޓިންގ އަންޑަރ ދަ ކޭޝް ބޭސިސް އޮފް އެކައުންޓިންގ" ގެ 1.4.9 ގައި ބަޔާންކޮށްފައިވާ ގޮތައް އަހަރު ނިމޭއިރު މިނިސްޓްރީގައި ހުންނަ ފައިސާގެ ތެރެއިން މިނިސްޓްރީއަށް ޚަރަދު ކުރުމުގެ ހުއްދަ އޮތް ފައިސާއާއި މިނިސްޓްރީގައި ހުރިނަމަވެސް އެފައިސާ ޚަރަދުކުރުމުގެ ހުއްދަ މިނިސްޓްރީއަށް ނެތް ފައިސާގެ ތަފްސީލް މާލީ ބަޔާނުގެ ނޯޓެއްގައި ހިމެނުމަށް ދަންނަވާ ކަމަށެވެ.

މީގެ އިތުރުން މިނިސްޓްރީ އޮފް ޖެންޑަރ އެންޑް ފެމިލީގެ 2015 ވަނަ އަހަރުގެ ކޮންސޮލިޑޭޓެޑް މާލީ ބަޔާން އޮޑިޓަރ ޖެނެރަލްގެ އޮފީހަށް ހުށަހަޅާފައި ނުވުމުން 2016 ވަނަ އަހަރުގެ މާލީ ބަޔާނުގައި ހިމަނާފައިވާ 2015 ވަނަ އަހަރުގެ ޢަދަދުތަކުގެ ޞައްޙަކަން ކަށަވަރުކުރެވެން ނެތްކަންވެސް ފާހަގަ ކޮށްފައިވެއެވެ. އެގޮތުން މާލީ ބަޔާނުގައި ހިމަނާފައިވާ އާމްދަނީ އާއި ޚަރަދު އަދި މާލީ ބަޔާނުގައި ހިމަނާފައިވާ އިތުރު މައުލޫމާތުގައި ހިމެނޭ މިލްކިއްޔާތާއި މާލީ ޒިންމާތަކުގެ، އަހަރު ފެށުނުއިރު ހުރި ޖުމްލަ ކަށަވަރު ކުރެވެން ނެތްކަމަށް ވަނީ ބުނެފައެވެ. އަދި އަދި އަހަރު ފެށުނުއިރު ހުރި ނަގުދު ފައިސާގެ ޢަދަދަކީ ޞައްޙަ އަދަދެއްކަންވެސް ކަށަވަރު ކުރެވިފައި ނުވާކަމަށްވެސް އޮޑިޓް ރިޕޯޓުގައި ބުނެފައިވެއެވެ.