މިއަހަރުގެ ހަތަރު މަހުގައި ކުޑަކުދިންގެ 171 މައްސަލަ ހުށަހެޅިފައިވޭ: ޖެންޑަރ މިނިސްޓްރީ
މިދިޔަ އޭޕްރީލް މަހު އެކަނި 66 މައްސަލަ ގުޅައިގެން ހުށަހަޅާފައިވޭ
ރާއްޖޭގައި ހެލްޕްލައިނެއް ގާއިމްކޮށްފައިވަނީ 2009ގައި
މިއަހަރުގެ ފުރަތަމަ ހަތަރު މަހުގެ ތެރޭގައި 171 މައްސަލަ ޗައިލްޑް ހެލްޕްލައިންއަށް ރިޕޯޓްކޮށްފައިވާ ކަމަށް ޖެންޑަރ މިނިސްޓްރީން ބުނެފި އެވެ.
އިންޓަރނޭޝަނަލް ޗައިލްޑް ހެލްޕްލައިން ދުވަހާއި ގުޅިގެން ޖެންޑަރ މިނިސްޓްރީން އާއްމުކޮށްފައިވާ ބަޔާނުގައި ބުނީ މިދިޔަ އޭޕްރީލް މަހު އެކަނި، 66 މައްސަލަ ޗައިލްޑް ހެލްޕްލައިންނަށް ގުޅިގެން ރިޕޯޓްކޮށްފައިވާ ކަމަށެވެ.
އެ މިނިސްޓްރީއަށް ހުށަހަޅާ މައްސަލަތަކުގެ ތެރޭގައި އެންމެ ގިނައިން ރިޕޯޓްކޮށްފައިވަނީ، ޖިންސީ އަނިޔާއާއި ގުޅޭ މައްސަލަތައް ކަމަށް ޖެންޑަރ މިނިސްޓްރީން ބުނެ އެވެ. މީގެ އިތުރުން، އިހުމާލުވުމުގެ މައްސަލަތަކާއި ޖިސްމާނީ އަނިޔާގެ މައްސަލަތަކުގެ އިތުރުން ނަފްސާނީ އަނިޔާ އާއި ހަނގާ ކުރުމުގެ މައްސަލަތައް ވެސް ރިޕޯޓްކުރެވިފައިވާ ކަމަށް އެމިނިސްޓްރީން ބުނެ އެވެ.
އަނިޔާގެ މައްސަލަތައް ރިޕޯޓްކުރުމަށް ކުޑަކުދިންނަށް ހިލޭ ގުޅޭގޮތަށް ޤާއިމްކޮށްފައިވާ ނަންބަރުތަކުގެ ބައިނަލްއަޤްވާމީ ވިއުގައިން "އިންޓަރނޭޝަނަލް ޗައިލްޑް ހެލްޕްލައިން ޑޭ" އަކީ މަރޗު 17 ވަނަ ދުވަހު އެވެ.
ކުޑަކުދިންނަށް ކުރާ އެކި ބާވަތުގެ އަނިޔާގެ މައްސަލަތައް ރިޕޯޓްކުރުމަށް 24 ގަޑިއިރު ހިލޭ ގުޅޭގޮތަށް ސަރުކާރުން ހަމަޖައްސާފައިވާ ޗައިލްޑް ހެލްޕްލައިން "1412" ޤާއިމްކޮށްފައިވަނީ 2009 ވަނަ އަހަރުއެވެ.
މިހެލްޕްލައިން މެދުވެރިކޮށް މާލެ އާއި އަތޮޅުތަކުގައި ދިރިއުޅޭ ކުދިންގެ ތެރެއިން އަނިޔާ އާއި އިހުމާލުގެ މައްސަލަތަކުގައި އެހީތެރިކަމާއި އަޅާލުން ބޭނުންވާ ކުޑަކުދިންނަށް ތަފާތު ހިދުމަތްތައް ފޯރުކޮށްދިނުމުގެ މަސައްކަތް ކުރަމުންދާ ކަމަށް ޖެންޑރަ މިނިސްޓްރީން ބުނެ އެވެ.
މި ހެލްޕްލައިންއިން ފޯރުކޮށްދޭ ހިދުމަތްތައް އިތުރަށް ހަރުދަނާކުރުމަށް ގިނަ މަސައްކަތެއް ކުރަމުންދާ ކަމަށް އެ މިނިސްޓްރީން ބުނެ އެވެ.
އެގޮތުން ކޯލް ސެންޓަރެއް ޤާއިމްކުރުމުގެ މަސައްކަތާއި ރިޕޯޓްކުރާ މައްސަލަތަކުގައި ހަރަކާތްތެރިވާ މުވައްޒަފުންގެ ހިދުމަތުގެ ފެންވަރު ރަނގަޅުކުރުމަށް ތަމްރީނު ޕްރޮގްރާމްތައް ޖެންޑަރ މިނިސްޓްރީން އަންނަނީ ހިންގަމުންނެވެ.
