ކުޑަކުދިންނަށް ކުރާ އެކި އަނިޔާތަކުގެ 122 މައްސަލައެއް މިދިޔަ އޭޕްރީލް މަހުގެ ތެރޭގައި ހުށަހަޅާފައިވާ ކަމަށް ޖެންޑަރ އެންޑް ފެމިލީން ބުނެފި އެވެ.

ޖެންޑަރ މިނިސްޓްރީން ބުނީ ކުޑަކުދިންނަށް ކުރާ އެކި ބާވަތްތަކުގެ އަނިޔާތަކާ ގުޅޭ 122 މައްސަލައެއް ރިޕޯޓްކޮށްފައިވާއިރު، އެއީ އޭޕްރީލް މަހުގެ ތެރޭގައި އެމިނިސްޓްރީއަށް ހުށަހެޅުނު މައްސަލަތަކުގެ ނިސްބަތުން 40 ޕަސެންޓް ކަމަށެވެ.

އޭޕްރީމް މަހުގެ ތެރޭގައި ކުޑަކުދިންނަށް ކުރާ އެކި އަނިޔާތަކުގެ 272 މައްސަލަ ހުށަހަޅާފައިވާ ކަމަށް ޖެންޑަރ މިނިސްޓްރީން ބުނެއެވެ.

ޖެންޑަރ މިނިސްޓްރީން ބުނީ ކުޑަކުދިންނަށްކުރާ އެކިބާވަތްތަކުގެ އަނިޔާތަކުގެ ތެރެއިން އެންމެ ގިނައިން ހުށަހެޅިފައިވަނީ ޖިސްމާނީ އަނިޔާގެ މައްސަލަތައް ކަމަށެވެ. އެގޮތުން ޖިސްމާނީ އަނިޔާގެ 37 މައްސަލަ ރިޕޯޓްކޮށްފައިވާއިރު، އޭގެ ތެރެއިން 21 މައްސަލައަކީ ޖިސްމާނީ އަނިޔާގެ ޝިކާރައަކަށް ވެފައިވާ ފިރިހެން ކުދިންނާ ގުޅޭ ގޮތުން ހުށަހެޅިފައިވާ މައްސަލަތައް ކަމަށް އެމިނިސްޓްރީން ބުންޏެވެ.

މީގެ އިތުރުން، ކުޑަކުދިންނަށްކުރާ އަނިޔާގެ މައްސަލަތަކުގެ ތެރޭގައި އިހުމާލުވުމުގެ 33 މައްސަލަ، ޖިންސީ އަނިޔާގެ 25 މައްސަލަ، ނަފްސާނީ އަނިޔާގެ 17 މައްސަލަ އަދި ހަނގާކުރުމުގެ އަށް މައްސަލަ ހިމެނޭ ކަމަށް ޖެންޑަރ މިނިސްޓްރީން ބުނެއެވެ.