ކުށް ކުރާ ކުދިންގެ 15 މައްސަލައެއް އޭޕްރީލް މަހުގެ ތެރޭގައި ހުށަހަޅާފައިވޭ: ޖެންޑަރ މިނިސްޓްރީ
ކުޑަކުދިންނާ ގުޅޭ ކުށުގެ މައްސަލަތަކަށް ބަލާއިރު، ވައްކަން ކުރުމުގެ ތިން މައްސަލަ، މަސްތުވާތަކެތު ގެންގުޅުމުގެ ދެ މައްސަލަ
ކުޑަކުދިންނަށް ކުރާ ގޯނާތަކުން ސަލާމަތް ކުރުމަށާއި މައްސަލަތައް ރިޕޯޓް ކުރުމަށް ގުޅޭނެ ނަމްބަރު
އެކި ބާވަތްތަކުގެ ކުށް ކުރާ ކުޑަކުދިންގެ 15 މައްސަލައެއް މިދިޔަ އޭޕްރީލް މަހުގެ ތެރޭގައި ޖެންޑަރ އެންޑް ފެމިލީ މިނިސްޓްރީއަށް ހުށަހަޅާފައިވާ ކަމަށް އެމިނިސްޓްރީން ބުނެފި އެވެ.
ޖެންޑަރ މިނިސްޓްރީން ބުނީ މިފަދަ މައްސަލަތަކުގެ ތެރޭގައި ވައްކަންކުރުމުގެ ތިން މައްސަލައާއި މަސްތުވާތަކެތި ގެންގުޅުމުގެ ދެ މައްސަލައިގެ އިތުރުން ޖިސްމާނީ އަނިޔާކުރުމުގެ ދެ މައްސަލަ ހިމެނޭ ކަމަށެވެ.
އަހުލަގީ މައްސަލަތަކަށް ބަލާއިރު، ކުޑަކުދިންގެ އަހުލާގީ މައްސަލަތަކުގެ 16 މައްސަލަ މިނިސްޓްރީއަށް މިދިޔަ މަހު ހުށަހަޅާފައިވާ ކަމަށް ޖެންޑަރ މިނިސްޓްރީން ބުނެއެވެ. މިފަދަ މައްސަލަތަކުގެ ތެރޭގައި "ޓެމްޕަރ ޓެންޓްރަމްސް" އާ ގުޅޭ އަށް މައްސަލައާއި ގޯނާކުރުމުގެ ތިން މައްސަލައާއި ގެއިން ފިލައިގެން ދިޔުމުގެ ދެ މައްސަލަ އަދި ހަނގާކުރުމުގެ ދެ މައްސަލަ ހިމެނޭ ކަމަށް އެމިނިސްޓްރީން ބުނެއެވެ.
ހައްޤުތަކުން ކުޑަކުދިން މަހްރޫމްކުރުމާ ގުޅޭ ތިން މައްސަލައެއް އޭޕްރީލް މަހުގެ ތެރޭގައި ހުށަހަޅާފައިވާއިރު، އެއީ ސިއްޙީ ފަރުވާ ފޯރުކޮށްނުދިނުމުގެ ދެ މައްސަލަ އަދި ތައުލީމް ފޯރުކޮށްނުދިނުމާ ގުޅޭ މައްސަލައެއްވެސް ހިމެނޭކަމަށް ޖެންޑަރ މިނިސްޓްރީން ބުނެއެވެ.
މީގެއިތުރުން ޖެންޑަރ މިނިސްޓްރީން ބުނީ ވަކި ޖިންސަކަށް ވީތީ ކުރާ އަނިޔާ އަދި ގެވެށި އަނިޔާގެ 47 ހުށަހަޅާފައިވާ ކަމަށެވެ. މިއީ މިދިއަ އޭޕްރީލް މަހުގެ ތެރޭގައި ހުށަހެޅުނު ކުޑަކުދިންނާ ގުޅޭ 272 މައްސަލައިގެ ތެރެއިން 15 ޕަސެންޓް ކަމަށް އެމިނިސްޓްރީން ބުނެއެވެ.
ޖެންޑަރ މިނިސްޓްރީން ބުނީ މިފަދަ މައްސަލަތަކުގެ ތެރެއިން އެންމެ ގިނައިން ރިޕޯޓްކޮށްފައިވަނީ އެކި ބާވަތުގެ ޖިސްމާނީ އަނިޔާގެ މައްސަލަތައް ކަމަށެވެ. ޖިސްމާނީ އަނިޔާގެ 21 މައްސަލަ ތެރެއިން 18 މައްސަލައަކީ ޖިސްމާނީ އަނިޔާގެ ޝިކާރައަކަށްވެފައިވާ އަންހެނުންނާ ގުޅޭގޮތުން ހުށަހަޅާފައިވާ މައްސަލަތައް ކަމަށް އެމިނިސްޓްރީން ބުނެއެވެ.
މީގެ އިތުރުން މިބާވަތުގެ މައްސަލަތަކުގެ ތެރޭގައި ނަފްސާނީ އަނިޔާގެ 13 މައްސަލައާއި އިހުމާލުވުމުގެ ހަތަރު މައްސަލައާއި ބިރުދެއްކުމުގެ ތިން މައްސަލަ އަދި ޖިންސީ އަނިޔާގެ ތިން މައްސަލަ ހިމެނޭ ކަމަށް މިނިސްޓްރީން ބުނެއެވެ.
ނުކުޅެދުންތެރިކަން ހުންނަ ފަރާތްތަކާއި ދޮށީ އުމުރުގެ މީހުންނަށް އަޅާލުމާއި އެހީތެރިކަން ފޯރުކޮށްދިނުމާއި ގުޅޭ 21 މައްސަލަ އޭޕްރިލް މަހުގެ ތެރޭގައި ޖެންޑަރ މިނިސްޓްރީއަށް ހުށަހެޅިފައިވާ ކަމަށް ވެސް އެމިނިސްޓްރީން ބުނެއެވެ. މިފަދަ މައްސަލަތަކުގެ ތެރޭގައި ނުކުޅެދުންތެރިކަން ހުންނަ ފަރާތްތަކަށް އަޅާލުމާއި އެހީތެރިކަން ފޯރުކޮށްދިނުމުގެ 13 މައްސަލަ އަދި ދޮށީ އުމުރުގެ މީހުންނަށް އަޅާލުމާއި އެހީތެރިކަން ފޯރުކޮށްދިނުމާ ގުޅޭ އަށް މައްސަލަ ހިމެނެއެވެ.
އަމިއްލަ ނަފްސަށް ގެއްލުންދިނުމާ ގުޅޭ 15 މައްސަލައެއް ޖެންޑަރ މިނިސްޓްރީއަށް ރިޕޯޓްކޮށް، އެޓެންޑްކޮށްފައިވާ ކަމަށްވެސް އެމިނިސްޓްރީން ބުނެއެވެ.
