އެމެރިކާގެ މޭޖާ ލީގު ސޮކާ (އެމްއެލްއެސް) ގެ 20 ކުޅުންތެރިއަކު ކޮރޯނާވައިރަސް (ކޮވިޑް-19) ށް ޕޮޒިޓިވް ވެއްޖެއެވެ.

ކޮވިޑް-19 އާ ގުޅިގެން މާޗު މަހުގެ އަށްވަނަ ދުވަހުން ފެށިގެން މޭޖާ ލީގުގެ ކުޅުން ވަނީ މެދުކަނޑާލާފައެވެ. މިހާރު ލީގު އަލުން ފެށުމަށް ތާވަލުކޮށްފައިވަނީ އަންނަ ޖުލައި މަހުގެ އަށްވަނަ ދުވަހެވެ. ލީގު އަލުން ފަށައިގެން ހުރިހާ މެޗުތަކެއް ކުޅުމަށް ނިންމާފައިވަނީ ފްލޮރިޑާގެ ސިޓީއެއް ކަމަށްވާ އޯލަންޑޯގައި ހުންނަ ޑިޒްނީ ވޯލްޑް ރިސޯޓުގައެވެ.

ލީގު އަލުން ފެށުމުގެ ކުރިން މޭޖާ ލީގުން އަންނަނީ ކްލަބުތަކުގެ ކުޅުންތެރިންނާ އޮފިޝަލުން ކޮވިޑް-19ށް ޓެސްޓު ކުރަމުންނެވެ. އެގޮތުން ޑިޒްނީ ވޯލްޑް ރިސޯޓަށް ކްލަބުތަކުގެ ކުޅުންތެރިން ދިޔުމުގެ ކުރިން، 668 ކުޅުންތެރިއަކު ވަނީ ކޮވިޑް-19ށް ޓެސްޓު ކޮށްފައެވެ. އެފަހަރު ކުރިއަށް ގެންދިޔަ ޓެސްޓު ތަކުން 18 ކުޅުންތެރިއަކު ވަނީ ކޮވިޑް-19ށް ޕޮޒިޓިވް ވެފައެވެ. އަދި އާދީއްތަ ދުވަހު ކުރިއަށް ގެންދިޔަ ޓެސްޓު ތަކުން އިތުރު ދެ ކުޅުންތެރިއަކު ކޮވިޑް-19ށް ޕޮޒިޓިވް ވިކަން މޭޖާ ލީގުން ވަނީ ހާމަކޮށްފައެވެ.

މޭޖާ ލީގުން 20 ކުޅުންތެރިއަކު ކޮވިޑް-19ށް ޕޮޒިޓިވް ވިއިރު، އެކި ކްލަބުތަކުން 6 އޮފިޝަލަކުވެސް ވައިރަހަށް ޕޮޒިޓިވް ވެފައިވާކަން މޭޖާ ލީގުން ވަނީ ހާމަކޮށްފައެވެ.

މޭޖާ ލީގު އަލުން ފެށުމަށް ތައްޔާރުވަމުންދާއިރު، މީގެ ކުރިން މޭޖާ ލީގުން ވަނީ މިއަހަރު ބޭއްވުމަށް ތާވަލުކޮށްފައި އޮތް ތިން އިވެންޓެއް ކެންސަލް ކޮށްފައެވެ. މޭޖާ ލީގުން ކެންސަލް ކޮށްފައިވަނީ މިއަހަރުގެ އޯލް-ސްޓާ މެޗާއި، ލީގްސް ކަޕްގެ އިތުރުން ޗެމްޕިއަންސް ކަޕެވެ. މޭޖާ ލީގުން ބުނީ މިއަހަރުގެ އިވެންޓުތައް ކެންސަލް ކުރި ނަމަވެސް، އަންނަ އަހަރު މި އިވެންޓުތައް ބާއްވާނެ ކަމަށެވެ.