ދިވެހި ޕްރެމިއާ ލީގުގައި ވާދަކުރާ، އެސްޓީއޯ މިނިވަން ޗެމްޕިއަންޝިޕްގެ ރަނަރަޕް ގދ. ތިނަދޫއަށް ސްޕެއިންގެ ކޯޗަކާއި ފުރަތަމަ ޑިވިޝަނުގެ ތަޖުރިބާހުރި ނުވަ ކުޅުންތެރިއަކު ގެނެސްފިއެވެ.
ތިނަދޫ އަށް ގެނެސްފައި ވަނީ ކްލަބު އީގަލްސްގެ އުންމީދީ މިޑްފިލްޑަރު، އަހުމަދު ރިޒުވާން (ރިޒޭ) އާއި، އިބްރާހިމް މުބީން (މުއްކި) އާއި، ފޯވާޑް އަންސަރު އިބްރާހިމް (އަންކޮ) ގެ އިތުރުން ޑިފެންޑަރު އަހުމަދު ނޫމާން ޔޫސުފް (ހެލްމެޓް) އަދި ހުސެއިން ޝިފާއު ޔޫސުފެވެ.
މީގެ އިތުރުން ވިކްޓްރީއަށް ކުޅެމުން އައި މިޑްފީލްޑަރު ނިޔާޒާއި އާދިލް އަބްދުލް ރަހްމާން ވެސް ވަނީ ތިނަދޫ އަށް ގެންގޮސްފައެވެ. މިފަހަރުގެ ޓްރާންސްފާގައި ވިކްޓްރީގެ ގިނަ އަދަދެއްގެ ކުޅުންތެރިންތަކެއް ވަނީ ޓީމު ދޫކޮށްލާފައެވެ.
މިފަހަރުގެ އެސްޓީއޯ މާލެ ލީގުގެ ޗެމްޕިއަން މާޒިޔާގައި ހިމެނުނު އަލީ ހައިޝަމް (ޗުއްޕު) އާއި ޓީސީ އަށް ކުޅެމުން އައި އަލީ އިމްރާނާއި، ދެވަނަ ޑިވިޝަނުގެ ޗެމްޕިއަން ކްލަބް ޒެފްރޯލްގެ ޑިފެންޑަރު އަބްދުﷲ ޒުބައިރު (ޒުއްބަ) ވެސް ވަނީ ތިނަދޫއާ ގުޅިފައެވެ. ޒުއްބަ ވަނީ މީގެ ކުރިން ފުރަތަމަ ޑިވިޝަނުގައި މާޒިޔާ އަށް ވެސް ކުޅެފައެވެ.
މައުލޫމާތު ލިބިފައިވާ ގޮތުގައި ތިނަދޫއަށް ގެނެސްފައި ވަނީ ސްޕެއިންގެ، ޔޫއެފާ ޕްރޯ ލައިސަންސް އޮތް ކޯޗެކެވެ.
